Mizo Folktales Chhuizauna

Folktale hi tun tumah kan thlir zau dawn a ni a, ‘FOLK’ tih hi  hmun khata chengte (community of people) tihna a ni a, ‘TALE’ chu thawnthu tihna a ni. A  then chuan ‘Rochun thawnthu’ an ti bawk. A mah hi a zau sa avangin  hrilhfiah dan pawh thiam a har a. Folktales hi chu phuahchawp thawnthu(fiction) a ni a. A thawnthua bul tumtu ber(Principal character) hi mihring ni lo(Non-human) a nih chang a awm bawk. A thawnthu hi engtik hun atanga intan nge a nih tih te, A hmun( setting) pawh khawi lai nge ni tih kha a awm chuang lo va.Tunhma (past) thil a ni thei a, tunhnu (present) thil pawh a ni thei bawk a ni.

Folktale hi Folklore huam chhung a mi niin, chutah pawh oral Folklore hnuaiah awm a ni. Oral Folklore-ah hian Folk Narrative tih te, Folk song tih te, Proverse and Riddles te, Folk speech te a awm bawk a, chung zingah chuan Folk Narrative chhung a mi a la ni leh ta zel a ni. Chuan hnuai deuhin lang mah se  Dr.Lalruanga chuan  “Mizo Thawnthu zirnaa folktale han thlen hi a bu zawl thleng ang niin ka hria” (Mizo tawnthu Zirzauna 26) a ti hial a ni. A chhan chu Khawvela hnam hrang hrang hian folktale an nei a. An hnam thawnthu tihausatu ber chu an folktale a ni ber. Mizote pawh chutiang tho chu kan ni a. Tichuan, khawvela folktale an zirna leh an chhui zauna kan la chhuakin kan belh ve bawk dawn a ni

Mizo folktales-a zir zauna mal te te then hran hote hi ngun tak leh chik zawk a kan en chuan Myth te, Legend te nena intawm tlan theih hi a awm nual a ni. Hetiangin:

1.Nungcha thawnthu (Animal tales)

2.Thil mak leh thil tithei thawnthu (Tales of supernatural beliefs)

3.Fiamthu leh nuihzathlak thawnthu (Jokes and humourous tales)

4.Bum hmang leh inbumna thawnthu (Trickster tales)

5.Thawnthu inchherchhuan (Cumulative tales)

6.Hmangaihna thawnthu (Romantic tales).(30)

7. Thawnthu tihbaiawm (Horror tales).

Heng a chung a kan tarlan tak te kan sawi zau hma hian, eng vanga Folktales te hi lo chhuak nge an nih tih te, engtiangin nge an lo chhuah tihte hi tawi tein tarlang ila: Folktale te hi awihawm loh tak tak an nih hlawm avangin a then te chu phuahchawp liau liau an ni a, khawvel chhungah hian thil mak tak tak, mihring nihphung pangngai a awm lo thlarau lam thil pawh mak tak tak a thleng ve thin a, chung chu ‘Mystery of Natural World’ an ti. Hriatfiah kha mihringin a lo duh ta a, thawnthu chu an lo din chho ta a ni.Tin, intihhlimna a tan ( The need to entertain other and to each other) a lo ni a. Tun hma kha chuan kawttual mei chhemnaah an zing a upamin ber chuan intihhlim nan thawnthu a hriat ang chu a sawi thin a ni. Nitin nunphung leh nihphung hriatthiam (The need to impose order)nana inhrilhfiahna tha tak a lo ni a, hlauhna(Fears) an neih te leh suangtuah duhthusam ram(Dreams) te chu thawnthuin an lo phuah chhuak ta bawk a ni.

Nungcha thawnthu (Animal tales) hi Mizo te hian kan nei nual a, a then chu awihawm ve tak tak, chutihrual a awihawm lo ve tak tak te a awm bawk a ni. Chungleng leh hnuaileng indo-ah khan Sakhi leh satelin Rulpui tui an inzuan kahlen siak a, satelin Rulpui tui a bawh keh a, Rulpui thinrimin satel a um ta chiam a, chu chu Murain a lo hum a, Rulpuiin a hre chhuak leh si a. Tichuan chungleng leh hnuaileng an indo phah ta a ni. Chungleng lam hotu atan Mura  a ni a, hnuaileng lam hotu atan Rulpui a ni  bawk a, Hotu atan chuan an awm dun hlein an thlang thiam hle a ni. Tin, Mura hi sava lian tak, mihring pawh man a, ei mai thei khawp a tihbaiawm a ni a, Rulpui hi lei a chengchi-ah phei chuan hlauhawm tak a ni a, kan pi leh pu te kha chuan an hlau thei thin hle a ni. Rulfepnei te, Rulpui te, Tlubing te a awm ve nual a, Rulfepnei hi Rul lian tak sei tak, Rihdil leh Palak dilah te a awm thin nia sawi a ni, Rulpui hi hmuh thiang lo a ni a, Tlungbing hi tawi tek tawk , bingbileta kal thin niin an sawi bawk. Engpawh nise, Sap hoin Python an tih te, Anaconda an tih te, Chinese dragon te ai hian a nep chuang lo hle a ni.

 Indo chungchang hi an tarlang tlat mai a, Ramsate hi an indo ve thin reng em?. Nge ni kan pi leh pu te kha indo thin hrim hrim an nih avangin, an thu leh hlaah Ramsate an indotir mai zawk tih hi ngaihtuahna awm thei a ni. Engpawh nise ramsate hi chu an indo ngai meuh lo niin a lang. Tin, Bak fing phakar em em mai kan hmu bawk a, heng ramsa thawnthu(Animal Tales) te hi chuan mihring nun kha an tarlang nasa em em a ni.

Chungleng leh hnuaileng indo bakah hian Zawngte leh Satel inkawm te, Puvawma tui khuap or Savawm tui khuap te, Sakei leh Dawngthlek intlansiak te, Zawngte leh Savawm te, Zawngte leh Vahmim te leh adang thahnem tak kan nei a, Ramsa thawnthu bikah hian Zawng hi alang tam ber pawl a ni a, chutah chuan fing kherek tak niin a lang bawk a ni.hei hi engvang nge ni ang Zawng hi an lo fing chalak viau thin em ni? An hmel leh an nunphung landanah hi chuan an phakar hmel em lah taka, Thawnthua a changtu(Character) an duan dan pawh hi a fuh hle a ni. Zawngte chu phakar viauin lang mah se, zawngte leh satel inkawmah erawh chuan nunze mawi tak kha a lang ve thung  a ni. Thiante duhsakna kha mawi takin an lantir a ni.

Mihring nun a thil tha lo kha thawnthute hian an tarlang tha hle mai a, entirnan insual that loh zia chugchang te pawh PuVawma tuikhurah kan hmu chiang thei bawk a. Kawm luttuk that lohzia te pawh Runginu leh Thialtea thawnthu atangin kan hmu thei bawk a ni. Thil mak deuh mai chu Sanghar leh Arpui leh Artui thawnthu hi a ni a, Sangharin Arpui a ei a, Artui chuan anu phuba chu lak tumin a chhuak ta a, tah chuan thli te, Sazu thang te, chem te, suk te, favai te, taivang te chuan an tanpui ta a, Artui chuan phuba chu a la thei ta a ni. Thil tisualtuin a thil tihsual man a hmuh (Vice punishment) kha chiang takin a lo thleng a, thil nung lo pawhin Artui kha an tanpui ta a ni. Thufingah ‘Mahni inpui te chuan puitu an hmu thin’ tih kha an lantir tha hle a ni.

Ramsa thawnthuah hian  Mihring lan ve chang a awm a, Runginu leh Thialtea thawnthu te, Chawngchilhi thawnthuah te, Lalruanga leh  Keichala thawnthuah te pawh kan hmu thei bawk a ni. Chawngchilhi thawnthuah hian Rul kan hmu a, Rul chuan Chawngchilhi a ngaizawng a , tah chuan  chawngchilhi chuan rulfa hial a lo pai ta ni. He thawnthu hi a mak hle mai a, Rul leh mihring inlaichin theih dan hi a Eden huan viau mai, chawngchilhi hian Rulfa a pai avangin a thih phah ta nghe nghe a ni. Engpawh nise hetiang ngaihtuah chhuah nachang an hria pawh hi kan pi leh pute kha an lo fing hle a ni.

Lalruanga thawnthuah hian Keichala nen thianah an insiam a, an tih hmasak ber chu ‘nu leh pa inhmuhtir’ a ni. Hei hian thiana insiam tak tak tur chuan nu leh pa inhmuhsak hi a pawimawh hle a ni tih kha a tilang a ni. He thawnthuah hian dawi lam a lang nasa a, Harry potter te ai khan a nep chuang lo hle a ni. Keichala te khua atanga Lalruanga a haw dawn hian, a meitalh bawmah Keichalan thli a khungsak tlat mai a, thil mak tak chu a ni, Engpawh nise, Ramsa ai chuan mihring an chungnung zawk a ni tih kha an lantir thin bawk a. Lalruanga nau Keimi hoten an lo ei chu an chhak chhuak leh a, Lalruanga chuan a zawm leh a, mahse a zakhnuai chu a daih tak loh avangin chaichim vun a bel sak a ni( sawi dan  dang pakhatah chuan Laiking vun) .Hetiang hi Sap ho khuan an Folktales pakhat Beast master-ah chuan an lo nei ve reng  ni. Beast master chu awlein a seh bung rum a, Lasi pakhat hian a zawm khawm leh vek a, a mit kha a lo awm tawh loh avangin Mu mit kha a vuah sak ta a ni. Kan Mizo thawnthu hi a pui hle mai a, A then te chu mawl te te leh tawi te tein lang mah se zirtir leh entir nei tha tak tak te an ni.

Thil mak leh thil tithei thawnthu (Tales of supernatural belief) –ah hian Mizo te kan sang ve hle mai a, Hetiang thawnthu hi chu hmanraw danglam tak hmanga mihring nihna bak thiltihtheihna nei te an ni hlawm a, a lar zual deuh te chu-Maurawkela thawnthu te, Kungawrhi thawnthu te, Sichangneii thawnthu te, Rairahtea thawnthu te leh chhura thawnthu te hi a lar zul deuh te an ni a, hei lo pawh hi sawi tur a awm nual a, Lalrunga thawnthu te pawh kan la sawi tel thei ang chu. Thiltihtheihna hmanrua (Magic Object) kha mihring tichaktu chu a ni a, Arabian ho thawnthuah chuan ketli te atangin Ginie a lo chhuak a, an duhzawng thil a tihsak thin a, ngulhnam thiltithei(magic sword) te, thiang thiltithei (Magic stick) ten, phenglawng tum zawng a ari hria a piang lam zel chi te hnam dang hian an nei a ni.

Mizo thawnthuah hian hetiang hmanraw chi hrang hrang hi kan nei ve nual a. Chung zing a lar zual deuh te chu Sekibuhchhuak te, Bakhnute te, Zawngkhuang te, Maurawkela tui te, Lalruanga dawi te an ni. Sekibuhchhuak hi a tha khawp mai a, Chhura’n phungpuinu hnen atanga a neih a ni a, ‘Seibuhchhuakbuh chhuak e, alu lama buh , a mawng lamah sa chhuak e,’ an tih chuan buh leh sa hmin sa a lo chhuak thin a a ni. Eng sa lam nge tih chu hre chiah lo mah ila, sa tui tak chu a ni hrim hrim dawn a, a ropui ve reng reng a ni. Bakhnute hi Rulpuiin kawrpawlho ta a ruksak, Rairahtea’n a lo hum avanga Rairahtea’n a kawl ve tak a kha a ni a, A thawnthu tingaihnawmtu, leh a ruangam(plot) duangtu pawh a ni.  Duhzawng sawi a piang chu a lo awm mai zel a, rairahtea pawh hian  RengLalfanu nupuiah a neih hial phahna kha a ni a, a tha hle a ni.

Zawngkhuang hi Maurawkela Zawng khuang an ti bawk a, Lungkun Lui rala Phungpuinu ta a ni a, a neituin a duh zawng a sawi zawh a, khuang a vuak a piangin a lo awm mai thin a, a tha hle a ni. Chutiang chuan Maurawkela hian tui thuhruk a nei bawk a, hmelchhe damdawi tha tak hi a ni mai a, chu tuiin a, hmaiphih a piang chu an hmeltha em em zel mai a ni.  Lalruanga hian dawi a nei a, chu chu a hmang tangkai em em a ni. A dawi neihna hi van lam mi Vanhrika hnen atanga a neih a ni a, Mahse a dawi hi thil sual tih nan a hmang ngai meuh lo a ni.

Mizo zingah dawi lam hi a mikhual lo hle niin  alang a, Lai tuanthuah chuan Darkula leh Ralhmina te unau in pheilek nula te rimin an tlangvalte leh an lalte chenin dawi hmangin an lo thunuai tawh a ni an ti. Mizo-ah hi chuan kan dawi hman dan hi a tlangpuiin midang aia chungnung leh thiltihtheihna, theih zawk lantir tumna lam a ni deuh ber, leilung dan piah lam (Supernatural power) thlenga tihtheihna chu mizo thawnthu laimu pakhat  niin a lang.

Tin, lalruanga thawnthu atanga kan hmuh danin an indawi dawnah hian an inhnial phawt a, chutah chuan a fing zawk chuan dinhmun tha a chang nghal a ni. Dawithiam ringawt kha hamthatna a la ni chuang lo va, chhiat leh tha hriatna (conscience) chu thiltihtheihna bul a ni tih kha an tarlang tha hle mai a, hei hi ngun deuh a thlir chuan a thu hi a fing hle a ni. Lalruanga chu  amah aia fing a tawn hma chu a dinhmun a tha char char a, mahse, a aia fing zawk Zangkaki a tawn takah chuan a thi ta a ni. Chhura’n Sekibuhchhuak a neih nachhan kha a fin vang a ni kan tithei bawk. Chuvangin leilung dan (Nature of law) ah chuan chak leh fing chu din khaw chhuahna a ni a, chu chu kal pel hauh lo vin, thawnthu pawh hi an din a ni a, a ropui hle  a ni .

Fiamthu leh Nuihzathlak thawnthu (Jokes and humorous tales) hi Mizo te hian kan nei tha ve hle mai a, mi chikmi leh thiam te chuan an lo chhut  a, khawvel hmun hrang hrang thawnthute leh hnam hrang hrang thawnthu te hian hetiang lam fiamthu lam thawnthu hi an lo nei nual hi a lo ni a. Mizo te chuan mi chhuanawm tak thawnthu Chhurbura thawnthu te hi jokes and humorous tales kan neih langsar deuh chu a ni. Chhura thawnthu hi chu mi pakhatah a innghat thui hle a, mi pakhatah khan fiamthu chi hrang hrang kha a kual kual a, Chutia a inbawk khawmna chu mihring chu a change a tak, a change fing leh hle si a ni a, zahmawh buru ang reng tak tak a tel nawk bawk a ni.

Stith Thompson-a, mi thiam tak chuan “ Heng thawnthu leh tehkhin thu tawi te te hi mi fing chungchuang tak chungchang a ni fova. Tin, mi fing tak leh mi a tak inkar a nih chuan a mi a zawk hi tingaihnawmtu a ni thin”. Tiin a sawi a, chung zawng zawng chu Chhura thawnthuah hian a kim tha hle a ni. Tum khat chu chengkek hi lawh mai theih tur hian a lo rah hmin tuar mai a, Chhura chuan ‘Nahaia chu nise ti hian a lo mai tur’ a ti a, a kutin a zut zut a, chumi hnuah a kungah harsa harsain a lawn chilh a lo chauh a ni awm a, a nuihzathlakin a mawl hle a ni. Chhura hi a che dangdai thei khawp mai a, bung zara ei rawngbawl a tum te, a fa ludip a khei te, a beng a vawh avanga thi emaw a in tih dan te, A chaw hmeh hming atheihnghilh te, a nupui leh fate theih nghilh te hi a mawl zia tarlang a tinuihzathlak em em chu a ni.

Lehlamah chuan a fing hle mai a, mawngping khawho a bum dan zawng zawng te, an mei a tih mih saka, dep khat zel a ti a, khaw nu ho zawng zawng a dep vek dan te, pa ho zawng zawng luia a zuan thlak tir vek te, Phungpuinu a man dan te chen hian a finzia leh chumi phena nuihna tur awm te hi thawnthu ropui tak a ni tih a tarlang chiang hle a ni. Chhura hian chanchin a nei tam hle a, pakhat sawi chuan adang sawi tur awm zel a ni a, chuvang chuan mi chanchin ngah tak, an chanchin sawi a, a dang sawi kai tur awm zel hi ‘Chhura thawnthu sawi ang’ an ti thin.

Thawnthu hlimawm tak pakhat chu hmawlhte leh artui in lawm hi a ni a, Hmawlh te chu a inrawh kang a, tah chuan artui a inchhum hmin a, an ei dun ta a ni awm a, heng thawnthu te hi jokes huang chhungah chuan kan dah thei ang. Chera leh Thauva thawnthu hi a mak ang reng hle mai a. Mura hian an pahnihin an rin loh laiin a man thut mai a, Murain abuka a dah hnuah chuan chera chuan Thauva chu mura hnehah , ‘Ka cher em a, min chawm thau rih la, ka thau hunah min ei dawn nia’ a ti a.Thauva zawk chuan,’Mawi a, kei hi min ei hnuhnung zawk rawh khai. Chera zawng i chawm thau zo chuang lo vang, kei hi ka thau duh em em mai a, min han chawm leh deuh hlek phei la chu ka thau tui viau tur a nia,” a ti thung a. Hemi te pahnih fing phakar dun, hmasial bawk si te phenah hian humourous tales tha tak a inphum tha hle bawk a ni.

Sawngpinga thawnthu te hi ngun taka kan en chuan fiamthu thawnthu tha tak a ni. Sava te pakhat hian ,” Na miah lovin, min perh la, thial miah lovin min ei la, sang miah lovin min e chhuak ang che, tichuan tuk thumnaah min lo en la i nupui atan min nei dawn nia,” a ti a chutiang chiah chuan ati ta a nula hmeltha deuh a lo chhuak a, nupuiah a nei ta a, Sawngpinga thianpa chuan a lo hriatin a ti ve ta a, mahse, na deuhin sava chu a perh a, thial chungin a lem a, a ek dawnah a ek a tang bawk nen a sang chhuak ta a, a tuk thum tukah chuan nu thur re ru hmelchhe em em mai a lo chhuak a, adang awm ta si lo chu a nei ta ringawt ta mai a ni. Heng thawnthu te hi nuihzathlak tak leh thufing tak pai si te an ni a, Mizote hian jokes and humourous tales lam hi kan nei tha ve hle a ni.

Bum hmang thawnthu (Trickter tales) chungchang hi Mizo folktales tichangtlung tu ber pakhat a ni a, Animal Tales-ah phei chuan thawnthu khai dingtu berte zingah a tel hial a ni. Roger D.Abraham-a chuan, “Hnam thawnthu pumpuiah hian heng mi bum chingte nungchang hi nungchang mak ber a ni hial ang. An nungchang thil langsar tak chu dan anga nun leh nunphung pangngai zawh lova an khawsa hi a ni,” a ti a. A ni reng a hengte hi thawnthu tingaihnawmtu ber an ni. Animal tales-ah hian zawng hi a lang hnem a, inbumna lamah phei chuan tel ve ngei ngei ang a ni. A tuartu a nih loh pawhin a bumtuah atang hram zel a ni.  Zawngte leh Vahmim thawnthuahte, Zawngte leh Savawm thawnthuah te,  chepa leh Savawm thawnthu te, Sakuh leh Sakhi thawnthuah te hian inbumna lam lang chu a ni a.

Arpui leh Sanghar thawnthuah hian inbumna kan hmu bawk a, Arpui hian Sanghar hi asa him nan a bum char char mahsela,  atawpah chuan Sanghar chuan a ei ta a, tah chuan Artuiin a nu phuba chu a la, Sanghar chu a thi ve ta a ni. Inbumna lamah hian kan sawi hmaih hauh lo tur chu Chhura thawnthu hi a ni a. Mizo Thawnthu Zirzaunaah chuan, “Chhura thawnthu a inbumna a lo lan dan  hi erawh chu hun laia mite aia a finzia leh a bum thiamzia a ni thung.  ‘chhura Pawvawng zuar’ thawnthua chhura Pawngvawng a a sumdawn dan te hi mak tak a ni. ‘Chhura khualzin’ thawnthua mawngping khaw nausen tulthir linga an mawng a verhsaka, an fate a thahsak te, Chhura an dan beh pawha a chhuah theih dan leh, a bula sumdawng lo kal abum leh zel theih dan te,  lipui chunga an khai pawha a chhuah theih dan te, Mawngping khaw paho belpa taivawna lipuia a zuan thlaktira, thi phiar khawpa a bum thei leh, an nupuite an hmeichhiatna pawh vawng him zo lova a bumte hi thil mak tak a ni. Amaherawhchu, chhura hi a unaupa Nahaia chuan a duh duhin a bum kawi thei thung a ni”.(Lalruanga page37).

Inbumnaah hian a chang chuan zahmawh rawngkai a awm nual a, Chhura thawnthu chauh ni lovah pawh a lang nual a, Khuangchera(Pasaltha ni lo zawkah) thawnthuah chuan mikhual mi tihder hrat tak te chuan khuangchera nupui chu bumin mipat hmeichhiatna an hmanpuia, chumi hnuah Khuangchera chu pawih sumdawng hnehah inbumna bawkin an hralh daih a, tun thlengin a chanchin kan hre ta lo va, chuvangin chanchin hriat lova reh vang vang te sawi nan ‘Khaungcher bo’ tiin an sawi phah ta a ni an ti. Heng inbumna thawnthu kan neih atangte hian kan hriat theih chu, kan pi leh pute kha an lo inbum ve thin a, chutih rual chuan inbum hi thil tha pai lo a nih dan te pawh hmun thenkhatah chuan kan hmu thei a ni.

Thawnthu inchherchhuan (cumulative tales) hi Mizo te hian kan nei ve khiau mai a, chutih rual chuan kan velah pawh hian hetiang lam thawnthu inchherchhuan hi an lo nei ve bawk a ni. A tam lo va, a awm chhun te hi chu a hlu em em a ni. Mizote’n Cumulative thawnthu kan neih chu Chemtatrawta a ni a, ani hian tui tichipchepah chem a tat a, a sazu chu Kaikuang lo kal chuan a chehsak hlawk a, Chemtatrawta thinrim chuan a bula khaum zamna rawpui chu a fik hmawk a, khaum thinrim chuan  Ramar ngumah a deng a, Ramar thinrim chuan Taivangbu a thai darh a, Taivang thinrim chuan Sanghal kapah a seh a, Sanghal thinrim chuan Bak awmna changel a tai thlu a, Bak thinrim chu Sai hnarah a lut, Sai thinrimin pitarte in a chil chhia, Pitarte thinrimin tuikhur hnarah a e a. Mite chuan Pitar hnehah ‘Ngati nge tuikhur hnarah I ek?” an ti a, Pitar chuan”Ngati nge Saiin ka in a chil chhiat?” a ti a, Sai hnehah “Saia, ngati nge Pitarte in I chil chhiat?” an ti a, Sai chuan “Bak ka hnarah a lut a nih kha “ a ti a, tichun an zawt chho zelah a tawpah chuan Kaikuang chu a mawhphurtu a lo ni ta a,”Meia min rawh chuan ka sen vit vet anga, Tuia min dah chuan ka dang lip lep ang” a ti a, meiah an rawh chuan a lo sen vet a, tuia an dah veleh chuan pukah a lut daih a, tichuan an hawlh ta a, chutah cuan a hmui an hawlh pawr ta vek mai a, a pawr hlen ta a ni an ti.

Hetiang inchhawng tha luttuk an lo phuah hi a lawmawm hle a ni. Assammese thawnthu pakhatah chuan Pangpar alang hmasa ber a, a par loh chhan an zawt nghal a, chumiah chuan Bawngpui a lo ni a, Bawngpui zawhah bawngpu a ni a, Chumi zawhah chawchhumtu a ni a, Thingphurtu a lo ni leh a, Thirdengtu a lo ni leh a, Meihawlpu, Chhum, Uchang an zawt leh a, a hram a vang a lo ni a, an han zawh chuan ‘Kan pi leh pute tihdan a lawm ‘ a lo ti ve hmak mai a ni.

Assamese thawnthu leh Chemtatrawta thawnthu hi  nungcha pianhmang  lo intanna thawnthu (Etiological tales) ve ve a ni a, an pawimawh hle a ni. Chutihrual chuan society nunphung a rawn lang tel ta a, chutah chuan Mizote chu a huhova, harsatna te hmachhawn a, thil fel lo lai te, inlungrual a siam tha thin an ni tih kha a lang ta a, Chutihrual chuan harsatna lo intan dang zawng zawng te, thawnthu kal chhoh dan leh a hnu leh zel a, nghawng a neih te chu a mar tha em em a, a ruangam(plot) hi a tha a, a changtu(character) an din pawh a fuh hle a, chuvang chuan cumulative tales kan nei hi a chhuanawm hle a ni.

Hmangaihna lam thawnthu (Romantic tales) hi Mizote’n kan thawnthu neih zingah chuan a tha ber berte an ni a, Hamngaihna lama pasaltha,  bikin hmeichhia a hmangaih tana a inpumpekna distinction pek tlak hial tur pawh kan nei nual a ni. Inhmangaih te thawnthuah hian mihring pangngai inngaihzawng an awm rual hian Vanmi leh lei a cheng mihring inngaihzawng te an ni hlawm a. A mak hle mai a, thil ni thei lo luttuk angin lang mahsela awihawmna tam tak nei te pawh an awm bawk a ni. Chungte chu Kungawrhi thawnthu, Keihmingi leh Hualtungamtawna thawnthu, Lasiri leh lasari, thangsira leh Thangzaia thawnthu te, Thlihranthanga leh Aithangveli thawnthu te, Tumchhingi leh Raldawna thawnthute an ni hlawm a.

Heng vanmi leh leimi te inngaihzawnnna hi thil mak  nih rualin, hnamdangin an nei a, chutihrual chuan kan bible-ah ngei ngei pawh hian chutiang lam hawi chu a lo awm reng a, Pathian fapate chuan lei a mi te chu an zuk ngaizawngin an zuk pawl a, chutah chuan mi lian tak tak an lo pian thu kan hmu thei a ni. Engpwhnise, kan pi leh pute ngaihtuahna hi a lo sang ve hle mai a, an mawl bik lohzia hei hian a tilang awm e. heng thawnthute hian tunlaia novel ang bawk hian a ruhrel (plot) te, a changtu (character) te, inbiakna (dialogue) leh a hmunhma (setting) pawh hi a nei ve thlap a. A tlangpuiin mipa lam aiin hmeichhe lam dinhmun hi a duhawm zawk zel a ni.

History of Mizo literature-ah chuan ti hian kan hmu a, “Richard M.Dorson-a chuan, ‘Inhmangaihna thawnthua a thupui ber chu thilmak danglam aiin buaina leh harsatna, khawngaihthlak leh lung tileng thei lam thilte hi a ni a. Mihring huaisenna lam aiin finna te, hriatna te, dawhtheihna leh tuarchhelna lamte hi a uar thin,” tiin a sawi a( KC.vannghaka 203), a dik hle a ni. Mihring leh mihring inhmangaihna kawngah pawh hian chutiang chu kan hmu a: Tlingi leh Ngama thawnthu te, Lianchhiari leh Chawngfianga te, Duhmanga leh Dardini te, Chhawrtuineihlala  leh Tuanpuii te, Laltheri leh chalthanga te leh a dang dang kan nei nual a, Heng zingah hian tiau kan hnua chhuak thawnthu hi a tam zawk a ni a, thil thleng tak tak te pawh an awm bawk a ni.

Mizo te indo leh inrun thin kan ni a, chutihlai chuan huaisen taka inhmangaih te an awm bawk a, Chawngmawi leh Hrangchhuana te, Chala leh Thangi te hi thih mai theih karah pawh an inhmangaihna te an vawng nung hram hram a ni. Mizo thawnthuah hian Reng Lal an lo lang a, chung hun laia hmangaihna lo lang thawnthu a awm leh a, Rimenhawii thawnthu te, Tualvungi leh zawlpala thawnthu te, Chhawnabawr Raja te hi an ni bawk a ni. Thil mak leh pakhat mihring leh ramsa inkara hmangaihna a lo lang leh a chu chu Chawngchilhi thawnthu te, Hlawndawhthanga thawnthu te hi an ni. Mizote hian hmangaihna  lam thawnthu hi a kurin a kur suau mai a,kan ngah hle mai a khawtlang nunphung pawh tam tak a tarlang tel bawk a ni.

Hmangaihna thawnthua a changtute reng reng hi hrehawm tuar leh harsa taka inhmangaih hram hram te an ni hlawm a, hei hian hmangaihna kawng hi a bum boh hle a ni tih hi a tichiang hle mai a, hringnun an tarlang tha hle a ni.

Thawnthu tihbaiawm (horror tales) lam hi mizo ten kan nei ve a, a then chu hlauhawm tak tak te, a then chu hlauhawm tur em em mahse a changtu te huaisen em a vanga hlauhawm leh si lo te an ni hlawm a, chungte chu Thinlanga thawnthu te, Phungpuinu te, Hmaidungseia te, In thum kan te, Piluti thlahrang thawnthu te, Sihhuai thawnthu te, Keimi thawnthu te kan nei nual a. Thinlanga hi ramhuai chi khat a ni a, thin lang ruak mai, hlauhawm tak a ni a, nu pakhat thinphurin, a phur chawitu tur a hmu lo va, unau hmel hai vel a ni tawh a, pa pakhat zai rat rat hi a hria a, a phur hlansak turin a ti a, a ni chuan a mah en lo tur leh a haw hunah pawh tumah hrilh lo turin a ti a, mahse chu nu chuan a en lui a, a hlau luttuk tlan haw chuan midang a hrilh bawk a, in chhung awng zawng zawng an hnawh a, pakhat an hnawh hmaih a vangin chuta ta chu lo chhuakin thinlanga chuan chu nu a tihlum ta a ni. A hlauhawm hle a ni.

Mihring thil tihtheih piah lam an ti thei tlat mai a, chuvang chuan an hlauhawm em em a, In thum kan te hi a lianin pi leh pute kha chuan an hlau thei em em a ni. Nausen ang tein a inlan a, chutah nausen chu an ding chiah chu palianpui maiah a lo chang thin a ni. A hmu te chu lu kawlh rawt ten an damlo thin a ni. Piluti thahrang te hi tunhnaia chhuak deuh ni mahse chanchin ngah ve tak a ni a, a thih dawn atang tawhin a ni hi chu a hrang tan a, a kut te, a lu te thlawnin mi vawm nan a hmang thin a ni.

Sih huai te hi a hlauhawm hle mai a, mihring an tina thei a, an tihlum thei bawk an tih em em thin, Keimi te hi  a hlauhawm hle mai a, mihring sakeia chang thei a ni a, saphoten werewolf  an tih ai hian a hlauhawm nep chuang lo a ni. Phungpuinu te hi mihring pawh ei mai thei a ni a, Hmaidungseia te hi a hmaidung sei tak a ni a, ahmel landan chu rapawm tak a ni bawk a, amaherawh chu Vawrselapa pa huaisen ngang chu  angam ta lo va, chutihrual chuan Phuangpuinu pawhin mi huaisen Chhurbura a tawng fuh hlauh bawk a ni. Hengah hian mihringte chu an chungnung zawk chang a awm  leh thin a ni tih hi an thawnthuah hian a lang chiang hle a ni.

Mizovin  Folktales kan neih te hi a hmun hma (Setting) time leh place te hi hriat chian an ni lo va, amaherawh chu In leh lo an din dan te an ei leh bar te, an khawtlangnun(Society) te erawh chiang takin kan hmu thei thung a. Tin, a thawnthua hi a mawl mang a, engnge buaina siamtu pawh huatna te, thikna vang te a ni a, chutihrual chuan a changtu(character) te hi an kal khat (flat) hle mai a, an mal em em thin bawk a ni. A thawnthu ruangam (plot) ah chuan a tawiin, a mawl mang hle mai a, inbeihna te a awm a, a thawnthu lai hawl a hlimawm duh bawk a, tichuan a tawp pawh hlimna bawkin an khar tlangpui bawk. Misualin an sual man an hmuh (Vice punished) te, Mi tha in an that man an hmuh(virtue rewarded) te a lang thin bawk a. Tin, a thawnthu tum(Theme)-ah hian duhamna tih te, Hmangaihna tih te, Hmasialna te, lainatna te, ngilneihna te, rinawmna te a lang thin a ni.

Kan Mizo thawnthute hi hlutin zirchian tum ila, heng atanga kan Mizo hnam nunphunga bet thil tha zir chhuah tur awm te leh thil tha lo pi leh pute pawhin an lo hnawl, Mahse vawiin thlenga kan nuna la bet, hnawl ngai nia lang site zir chhuahna hmanrua atan hman thiam tum ila, chu lovah hnam peng hrang hrang ten thawnthu an lo neih boral mai tur te pawh tih nun thar zel hi kan hnam nun chawi kanna tur leh literature thanna tur pakhat chu a ni.

BIBLIOGRAPHY:

1.Lalruanga, Dr. Mizo Thawnthu Zirzauna. Published by: Zomi Book Agent, bara Bazar Aizawl, Mizoram. Printed at New Age Printers B, 41, Electric Veng, Aizawl, Mizoram.

2. Vannghaka,KC, Dr. History of Mizo Literature. Published by Department of Mizo, Mizoram University. Printed at Gilzom offset, Electric Veng, Aizawl. First edition:2013.

WORK CITED:

1.      Govt, Hrangbana College. Mizo Thawnthu Thlirzauna.

2.      Lalhmachhuana Zofa. Mizo thawnthu Vol-1

3.      Lalhmachhuana Zofa. Mizo Thawnthu Vol-ll

4.      Lalhmachhuana Zofa. Mizo Thawnthu Vol-lll

5.      Lalhmachhuana Zofa. Mizo Thawnthu Vol-lV

6.      R.L.Thanmawia. Mizo Hnathlak Thawnthu.Vol-ll

7.      Lalhmachhuana Zofa. Chhurbura.