Chhungkaw Hlimawm Lemchan Thawnthu Bihchianna

Khuhhawnna :

Chhungkaw hlimawm’ lehkhabu hi Vanneihtluanga ziah a ni a, Lemchan (Drama) kalphung anga duan leh ziah ni in, he Lemchan hi chan Nga ah a \hen hrang a. Lan erawh chu Chan hrang hrangah a in ang lo thluah thung a i.Phek 106 a chhah niin Pi. Remthangi (Remi) te chhungkua behchhan anga hmanga ziah a ni a,  thawnthu ngaihnawm tak a ni.

A ziaktu :

He Lemchan thawnthu ziaktu Vanneihtluanga hi Mizo thu leh hla ah chuan mikhual lo tak a ni a, thu leh hla lam ngaihsak $k tan phei chuan hriat lar leh ngaihven hlawh ber zing a mi a ni awm e. Lengzem chanchinbu, thlakip chhuak enkawltu (Editor) leh neitu a nih mai piahlam ah lehkhabu tam tak kutchhuak leh sulhnu a nei tawh a, lehkhabu hrang hrang ah a thuziah pawh hmuh tur a awm nghe nghe. Thu leh hla lama chawimawina pawh lo dawng tawh Vanneihtluanga hian kutchhuak \ha tak tak a nei a, chutih lain Lemchan lama a kutchhuak hmuh theih tura puanzar (published) awm chhun erawh he Lemchan ‘Chhungkaw Hlimawm’ chauh hi a la ni rih a, a chhuah belh zel erawh a rinawm hle thung a ni.

Thawnthu Tlangpui :

He thawnthu tlangpuiin a tarlan chu a pasal Laliana’n a boral san tak Pi.Remi (Remthangi) te chhungkaw hun hman chhoh dan a ni ber a. Pi.Remi te nupa hian fa pahnih Zama (Zamliana) kum 6 mi leh Diki (Rindiki) kum 4 mi an nei a. Hetia chhangchhe taka an awm chhoh lai hian an pa ber chuan a boral san ta tlat mai si a, Pi.Remi phur pawh a rit ta khawp mai.

            A pasal hlawh (pension) zar zovin an ei leh in chu hmu mah sela Pi.Remi chuan a fate school kalna tur a ngaihtuah a ngaih avangin harsa takin insuk leh buhthlei ilo velah a inhlawh fa hram hram a. Eizawn chu a hna ni bawk mahse fate nunkawng leh nundan zirtir pawh a kova tla tho a nih avangin Pi.Remi chuan a tlin loh chang a awm ve lek lek \hin a, banga a pasal thlalak intar chu a lo biak mawlh mawlh chang a awm leh fo \hin reng a ni.

            Sum leh paiah an harsat avangin mi neih ang an neih loh a tam a, a fapa Zama pawh \hiante tana kawm hn^wn phah hialna tur a tam phah ta. Chutiang hunah pawh Anu Pi.Remi chuan

                        “Tun hnuah retheihna zahpui loh tur. Mahni neih ang mil tawka inchei tur. Hriselna mil tawk chiah eitur. Mamawh loh chu awh loh tur. Mahse mite tih theih leh nih theih ang thei ve lo bi kanga inngaih loh tur..” ti te in a fate chu a zilh hau fova, Pi.Remi tan chuan ko rihna tham tur a tam thei hle a ni.

            Hetianga Pi.Remi’n a fate taima leh fing taka a enkawl tlat avang hian a fate an lo hleitlin takah pawh mahni thawh theih ngaihtuah a, an nu chhawk zangkhai nachang an lo hriat phah a. Zama pawh chuan class twelve a pass tak hnu chuan Quarry ah inhlawhna chang a lo hriat phah ta a, anau Diki pawh chuan inawl duh bik hauh lovin puan \hui te hial a lo zir chho ve bawk a, an chhungkua chuan an \angrual in an inchhawk zangkhai hlawm hle a ni.

            Hetianga taima leh fel taka an awm avang hian Pi.Remi fapa Zama chu a zirna ah a hlawhtling ta a, mi te nih theih loh niin Custom officer hial a lo ni ta a. Nupui leh fa te neiin, an nupa inkar tihbuai tum tu Seni(Nuseni)  pawh chu a tawpah chuan an man chhuak a, chhungkaw hlim tak niin a tawp zui ta a ni.

Thawnthu Tlangpui Thlirna :

He thawnthu tlangpui han thlir thuak thuak hian tunlai mizo chhungkaw mil taka he thawnthu hi dinchhuah a ni tih a hriat a, kristian chhungkaw mamawh rinawmna leh inhmangaih tawnna te pawh he thawnthu hian a tarlang chianga, thawnthu nelawm leh zahpuiawm loh tak  niin, chhungtin te chhiar atana awhawm leh thlanawm tak a ni awm e.

He thawnthu hian inhmangaih tawnna te, induhsak tawnna te, nu leh pa hmangaihna te bakah hnathawh ho pawimawh zia leh indawmkan tlan pawimawh zia te a tarlang a, hringnun zeril a phawrh chhuak a tih theih awm e.

Thawnthu reng reng chuan hringnun zia rang a tarlang angin, he thawnthu pawh hian hlimna te, inbumna te, duhamna te, dawhtheihna te, ngaihdamna te, zah hriatna te a tarlang chuai chuai a. Mihring te nuna thil awm zawng zawng, a \ha leh \ha lo thlengin a phawrh kim ni berin alang.

He thawnthu nelawm em em na chu unau inhmangaihna hi a ni a. Tunlai chhan ah \hen leh rual chu sawi loh mahni pianpui unau ngei pawh itsik a, tuithlar an tam tehlul nen. He thawnthu hi chuan unau inhmangaihna leh induhsakna a tarlang chiang em em a. Hei hian nun dan \ha min zirtir piah lamah he thawnthu hi a tinelawm a ni.

Tin, mizo te rilru a thil dik lo tun thlenga la awm he thawnthu hian a tarlang bawk a. Chu chu mo chungchanga kan ngaihdan felhlel fo hi a ni. Mo kan neih hian mizo te chuan chhungkua ah engemaw tak thleng dawn ni te hian kan hre lawk \hin a, hei vang hian mo te pawh kan tiretheiin an inthlahrun phah thei hle \hin. Nimahsela he thawnthu hian kan chhungkuaa thil dik lo awm hi mo kan neih vanga lo thleng leh chumi avanga buai kan ni lo tih a rawn tarlang chiang hle a. Thil pangngai, buaina pangngai, hun danga lo thleng ang tho a ni tih a tarlang chiang hle a ni. Sangi avanga buaina an tawh nia Zama nu in a ngaih chu a tawpah chuan thil dang vang a lo ni a, Sangi chu mo sual tak ni lovin mo \ha tak a lo ni reng tih an hriat phah a nih kha.

He thawnthu hian a tawpa a tarlan dang leh chu thil dik lo titute chu hlobet angin an chuai \hin tih hi a ni. Seni chuan dik lo leh dawt sawi chungin Zama te chhungkua tibuai mahse a tawpah chuan man chhuah leh hriat chhuah a ni a. Chumai piah lamah Dan phal loh thil drugs a lo kawl \euh avang leh a lo thawnchhuah \hin avangin man a ni ta bawk a nih kha.

            He Lemchan thawnthu hian mihring nun darthlalang a phawrh a, hringnun a thil \ha chauh zawnga nun hmang \hinte khawvel leh midang itsik a, mahni \anghma chauh hai \hin te nun ziarang chiang takin kil tin a\angin a hrut kual a ni. Hetianga nun ziarang dik tak, thawnthu pakhat a hmuh theih leh hriat theih a ni hi a makin, he thawnthu hi thawnthu \ha leh belhfak awm tak a nih zia a tarlang thei awm e.

Lemchan Ziarang Lang Te :

            He thawnthu hi Lemchan ziarang anga ziah a nih miau avangin Lemchan thlirna tarmit in kan thlir lo thei lovang chu. Drama chi hrang zingah he lemchan hi Comedy huang chhungah a dah theih ang. A chhan ber pawh he thawnthu a harsatna hi buaina liantham pui pui an nih loh vang leh an harsatna bulpui ber pawh retheihna te, leh midang in \awngkam hmanga an lo tihbuaina chauh te an ni a. Hei vang hian he an buaina hian a thawnthu a tibuai thui viau lovin a ngaih theih a, comedy huangchhunga dah hi a him berin a hriat a ni. Tin, kawng hrang hranga tehin he Lemchan ah hian thil indawta thleng (development) mumal tak kan hmu a. Chung te chu lo thlir thuak thuak i la.

I)                   Thubul pho chhuahna (Exposition) : He lemchan in\anna hi thihnain a ni a. A changtupa ber Zama pa chuan he thawnthu \antir ah hian min boral san nghal a. Hetia lemchan a in\an avang hian naupang kum 6 mi Zama leh a chhungte hmakhua chu a thim dawn hle tih a hriat nghal theih mai a, an chungah harsatna tam tak a la thleng dawn a ni tih pawh chiang takin a ngaihruat nghal theih amai a ni. He thubul a phochhuah dan hi \ha ve tawk tak niin a ngaih theih ang.

II)                Harsatna lo piang (Complication) : He thawnthu in\an a\ang tawhin Pi.Remi te chhungkua hian sum leh paiah buaina an tawk nghal phawt a, chutah naupangin zirna an neih loh a lo hlau bawk nen rethei takin hun an hmang chho va. Zama phei chuan a thawmhnaw \ha neih loh vangin \hiante hmuhsit hial a tawrh phah a nih kha. An lian zel a, an hautak zel a. College an kal meuh phei chuan class kal \ha hman tawh lo khawpa inhlawh te a lo ngai a. Anmahni tawkah buaina leh harsatna a lo thleng ve ta nual mai.

III)             Harsatna Vawrtawp (Climax) : Zama’n hlawh a nei chho va, nupui atan Sangi a nei bawk a. An hlim dawn choh emaw kan tih laiin buaina chuan pun lam a pan ta deuh deuh mai le. Sangi bank account a pawisa zawng zawng chu Zama nu account ah a lut phawt a, chutah  Zama nu chuan phone hmanga bum a la tawk a. Chutiang mai pawh a la ni lo, Zama te nupa inkarah chuan tu emaw an awm ve tih hriat nan Zama chuan Valentine’s Day ah thilpek a dawng nawlh thul, Sangi lah chuan midang phone-a lo tibuaitu a lo nei bawk nen, an chhungkua chu an buai nuai nuai mai a. Zama unaunu Diki lah chu Zauan a lo tlawh duh tawh lo bawk nen Bawnghnute inr<k thlengin an buai nuai nuai a ni ber mai. Tumah inring tawn reng awm lovin an inringhlel vek a. Hlimna mita meng lovin hlauhthawnna in an khat vek a nih kha.

IV)              Chinfelna (Denouement) : Nimahsela lemchan ziarang ang thlapin a tawpah zawng an buaina zawng zawng bulpui ber chu Seni a ni tih an hre ta a, man chhuah niin dan lova thil alo tih ruk te avang nen police in an man ta hial a nih kha.

V)                 A tawpna ( Solution) : Tichuan tun hmaa an inhmangaih tawn anga inhmangaih tawnin Pi.Remi te chhungkua chuan chhungkaw thar zawk leh chhungkaw hlimawm dinin hun an hmang leh ta a ni.

He lemchan hian plot mumal tak, inbiakna leh \awngkam mawi leh nalh tak bakah changtu \ha tak tak, anmahni ni awm reng tak taka mawi te a nei hlawm a. Lemchan kalphung diktak zulzui a dinchhuah a nih avang hian mizo thu leh hla tihlutu zingah a chhiar tel loh theih lovang. Mizo te hian lemchan ziaranga ziah thawnthu hi kan la nei tlem hle a, helam hi kan pachhiatna tak pawh a ni. Nimahsela he ‘Chhungkaw Hlimawm’ hian chu harsatna chu nasa takin min chhawk a ni. Tin, he lemchan hian lemchan hmanraw zei (devices) hrang hrang a rawn thil tel nual bawk a, chung te chu lo tarlang leh thuak thuak i la :

i)                    Situational Irony : He lemchan ah hian Nuseni leh Zama inkarah situational irony hi kan hmu a. Zama chuan dawra leng leh tur anga a insawi laiin Nuseni chuan a lo ning rilru hle a, “Sneaker \et bun lo pawh hi ninawm khawpa lo leng an awm a sin” a tih khum hial a ni. Nimahsela Officer a nih hnu chuan Nuseni chuan Zama chu an dawra leng turin a duh leh hle si a, a sawm ta tlut tlut zawk a. Heti ang hi situational irony chu a ni a, hei hian a thawnthu a tihausa hle a tih theih ang.

ii)                  Verbal Irony : Nuseni leh Zama inkarah bawk kan hmu tam leh ber a, tin Sangi leh Zama nu inkarah pawh kan hmu bawk. Seni chuan Zama tihchhan tak takin thu a han sawi \hin teh nangin Zama chuan a hrethiam \hin si lo, tin a tawp lamah Zama pawhin “I music rem hlirin kan lamdun \hin a, tunah chuan ka music milin I lam ve thung tawh ang hmiang” a tih te hi Seni tan chuan hriatthiam ngaihna a awm lo mang e. Chutiang bawkin Sangi chuan an bawnghnute, a fapa in a tana a dah, lo bo ziah chu Zama nu in a nih a ring a. Tihchhan taka thu a sawi te pawh chuan Zama nu chuan a hrethiam \hin si lo. Hetiang ah hian verbal irony hi a hmuh theih a, thawnthu tihlutu pakhat a ni.

iii)                Disguise : Ze thlak kan tih mai hi he thawnthu hian a nei leh tlat mai. Zama chuan nuseni a man chhuah theih nan lemchanna hmaikawr nen nuseni chu a bel char char a, a bia a, a bulah a awm \hin. Nuseni chuan Zama Lemchan chu a ruahmanna tih reng a hre si lo. Zama thusawi pakhat “Bank a nichin lawka I tirh Vana kha I bulah ka lokal e” a tih hian he disguise hi a tichiang viau awm e.

iv)                Aside : Phunsep kan tih ang chi, midang awm ve laia rilrua thil vei leh ngaihtuah sawi chhuahna ang chi hi hmun khatah kan hmu zauh a. Nuseni chuan a hnathawk chhawrlai Sales girl a hau hnu ah an zinga pakhat chuan midang hriat ve loh turin \awngkam a lo chhak chhuak zeuh a. Heti ang chi kan hmuh hi phunsep chu a ni.

v)                  Soliloqui : Phunrukna erawh hi chu kan hmu nual thung a tih theih awm e. A bikin Pi.Remi hian a pasal thi ta a ngaih zia leh a fate hmakhua a ngaih luatah  mu hlei thei lovin a awm fova, chutiang hunah chuan a mahin a lo phunru leh sep sep \hin. Heti ang hi he thawnthu ah hian a awm nual a, soliloqui kan tih ang kha a ni.

vi)                Expectation : Thawnthu a kan rin loh deuh a thil lo thleng ang chi hi expectation emaw surprise emaw hian a huam awm e. He thawnthu hi retheihna a bul \an a nih avangin Zama hmakhua pawh chu thim hle niin alang a, nimahsela rin lawk leh beisei lawk hauh lovin a hnathawhna Quarry lamah chuan apa \hianpa chu an hotupa a lo ni hlauh a , ani chuan duhsak taka hlawh te lo pe in Manager hial a lo nih tir a nih kha.

vii)              Comic relief : A tlangpui thuin Lemchan thawnthu zingah Tragedy hian comic relief hi a nei a tih theih ang. Lemchan thawnthu urhsun tak ata zalenna min petu leh min hahchawlh tirtu \ha tak a ni. He thawnthu pawh hi Comedy kan tih reng lai hian harsatna tam takin he thawnthu pum mai hi a bawh ve tho avangin a lo thlirtu rilru chu a hah lo thei lova, hei vang hian comic relief hi thil pawimawh tak a nih phah ta.

Hetiang anga chhal theih hi Zaua te \hiandun in Diki an chhai dan a\angin a lo in\an a, hlimawm leh nuihzat thlak tak siin a kal chho zel a, a khat tawkin lemchanah lo lang zelin Lemchan ti hmuhnawma, tinuamtu tak a lo nih phah ta a ni. Hetiang comic relief kan hmuh hian Lemchan a tinungin a tinelawm khawp mai.

            Kan sawi bak leh sawi hmaih tam tak a la awm \euh nangin lo duh tawk dawn mai ila. He Lemchan hian kan tarlan ang hian \hatna tam tak a nei a, hlimawmna tam tak a keng tel bawk a. Tin Lemchan a nih angin ziarang hrang hrang puakchhuak a nei nual bawk a, thawnthu \ha leh ngaihnawm tak a ni tel bawk nen, he thawnthu hi thawnthu \ha tak kan ti thei ang.

            Lehlam ah thung chuan he thawnthu hian mihringte kan famkim loh zia ang maiin duh khawp tawk lohna lai leh \hat tawk lohna lai tam tak a nei ve bawk a, a tlangpuiin chung te chu lo thlir leh thuak thuak i la:

i)                    He thawnthu bul \anna lan hmasa ber hi duhthu samin a \ha tawk lova, a thubul phochhuah dan leh a thawnthu kal dan pawh thlemin a in man lo deuh niin a hriat theih. He thawnthu lan \antirh ah hian mitthi puangtu te pawh chorus anga lan tir an ni lova, tin character a lang tlem hle bawk.

ii)                  Dialogue ziah a nih hian mi thuhmun sawi, a hrang anga ziah atam. Entirnan Pastorin Thu a sawi tih hriat nan ‘Pastor’ tih tarlan a nih tawh reng laiin, tumah thusawi ve an awm hauh loh lai pawhin thudanga a kai dawnin ‘Pastor’ hi ziah nawn leh tho a ni. Heti ang chi hi hmun hran hranah a awm nual a, a ziak tu hian Lemchan ziahdan en chiang deuh se duhthusam a ni ngei ang.

iii)                Hun inhlat leh kalchak lutuk hian Lemchan a tiawih awm loh mah mah a. He Lemchan hi kum 20 chuang chhunga thil thleng khungkhawm ang mai a nih avangin a lo thlirtu mipui tan tui taka lo en a har maithei.

iv)                Lemchan chu chantuala chantheih tura buatsaih a nih \hin avangin he Lemchan a thil \henkhat hi chu chantuala chan theih loh tur a awm nual. Entirnan Quarry a labour ho lung lai ang chi te hi tih theih rual loh a ni.

v)                  Lan pakhat chhunga hmun hrana thil thleng tarlan kawp a awm leh nawlh \hin. Entirnan inchhungah Zama leh anu an inbiak mawlh mawlh laiin leh Lan a la zawh hma siin Quarry ah Zama hnathawkin a lo lang leh daih a. Heti ang chi hian Lemchan ai mahin video movie lam a pawl mah mah em a tih theih awm e.

vi)                Plot a nei \ha tawk lova, a chhan ber pawh an buaina hi a lent ham loh em vang a ni a tih theih awm e. A tir ata Zama ten buaina an tawh reng reng hi an nun khawih dawt thei, thih phah hial tura an sual ngam ang tur chi a ni lem lo hlawm a. An buaina tam ber hi chingfel lo mahse hlim takin an awm tho angem tih min ngaihtuah tir thei ang.

Tlipna :

Hetianga point hrang hrang kan tarlan tak ang hian he thawnthu hian hian duh thusam loh deuhna a neihna kan tarlang a ni mai a. Chutih lai chuan he thawnthu ziaktu hi Lemchan zira, ziak \hin a nih loh avang leh tunlai chhanah mahni duhdan (self expression) an lo dah lansarh si avangin kan dem ngawt thei lovang. Hetiang a nih reng lai hian he Lemchan thawnthu hi thawnthu chhia a ni hauh lova, Lemchan kan neih zing ah rau rau pawh a \ha pawl leh keu nuam pawl tak a ni tlat a ni. He thawnthu hian nunphung piah lamah nunmawi a kentel tlat avang hian Mizo te rilru ah hmun a chang lian lo thei lova, thawnthu \ha tak a ni reng dawn ni pawhin a lang a ni.