Darlalpuii Lemchan Thawnthu Bihchianna

Darlalpuii lemchan thawnthu hi Lalchungnunga ziak a ni a, Lemchan Khawvel  I – naah, Dr.Laltluangliana Khiangte  hian lemchan thawnthu dang pahnih – Lalnu Ropuiliani leh Thawmvunga te nen a khung khawm a ni. Lalchungnunga ziak, Darlalpuii lemchan thawnthu hian kum 1990-a Art & Culture Department huaihawt, Mizo hnam nunphung tarlang zawnga lemchan thawnthu inziahsiak tum khan lawmman pahnihna a lo dawng tawh a ni.  Darlalpuii hi lemchan thawnthu tawi fel tak niin, tragedy huang chhung a mi a ni a. A ziaktu hian kum 1990 bawr vel khan S.Hlimen khuaah a ziak a. A bua an chhuah hmasak ber hi kum 1994-ah a ni a, Felfim Computer-ah chhuin,  L.T.L. Publication, Mission Veng, Aizawl  atanga chhuah a ni a, a man zat erawh a inziak lo.  Kum 2012 thleng khan; tum nga chhut nawn a ni a, hemi tum hian copy 3000 chhuah a ni. A bu chhungah hian lemchan thawnthu pahnihin a karcheh a, phek 89 atanga 140 thleng a huam a. A kawm hnung lamah hian Lal fanu lainatawm tawpkhawk, Lal Sibuta’n sechhuna a chhun tih a inziak bawk.

He lemchan thawnthu hi a innghahna hun dik tak hriat a har hle a, Rev.Liangkhaia’n Mizo Chanchin  lehkhabuaa a tar lan dan atang chuan, kum 1780 bawr chho vela thil thleng niin a ngaih theih a, Sibuta lung an phun hi kum 1794 vel a ni.  Mizo hnam chanchin; lemchana chan theih tura her rem (Dramatize) a ni a. A hmun hma innghahna hi Sakhan khua leh Lalngura khua( a hming tarlan loh) a ni a, a lemchana changtu ber chu Darlalpuii a ni a, he lemchan chhung hi Chan thumah thenin, Lan 14 a awm.

A lemchan thawnthu tlangpui:

Darlalpuiite inah amah leh a nu an lo lang a, an khuaa Lalngura lo zin thu leh anmahni tihrehawmtu Sibuta chanchin an sawi a, An  hrehawmzia leh an dinhmun inthlakthleng chiang tak kan hmu tel bawk. Chutianga rilru hah taka an awm lai chuan Lalngura chu rawn leng lutin, an thlamuanpui hle tih a lang a, an nufa tan chuan a hlu hle. Hemi hnuah hian Sibuta inah chawng an chen a, Darpuii leh nula tlangval dangte pawh an awm. Darpuii chuan nuam a tih lohzia leh a pa awm ve se a tihzia chu hlain a hril a, chawng chenna atang chuan a haw hma ta bik nghe nghe. A rilru hahzia leh Lalngura chu a innghahna a nihzia a riruat theih bawk. A haw hnu hian Lalngura, Sibuta leh paho chuan zu inin, an ti ti  tih kan hmu a, Darpuii chanchin pawh an sawi nual tih kan hmu.

Chhun reh lai takin Darpuii puantah chu Lalngura’n a va len chilh a, hetah hian an induh tawnzia leh palai tirh pawh an duh dun tawhzia kan hmu thei. Lalngura hian an hrehawmna ata hruai chhuah ngei a tiam a, chutih laiin Darpuii thung chu hlauhthawnnain a la khat thung. Zan lamah Lalngura chuan Sibuta hnenah, Darpuii chu  nupui atan a duh thu leh palai tirh mai a duh tih a sawi a. Sibutate nupa chuan an duhpui loh thuin an chhang thung. Amaherawh chu hnar fithla lovin; hun thawl deuh zawk lo nghak tur leh hmanhmawh tut tut lo turin an thlah liam a ni.

Sibuta inah a fanu Lalpuii a damlo a, Lalpuii chuan amah duat em emtu, a ni, Darpuii chu a lam reng avangin an ko va, Darpuii chuan awmpuiin a enkawl a, zankhuain a buaipui bawk. A tukzingah chuan ziaawm lam pan deuh tura a lan laiin vawi leh khatah a na zual thut a, a kaih zui a. Puithiamin thawi a tum chhungin, reiloteah  a thi zui ta nghe nghe. Sibuta chuan puithiam chu a fanu thih chhanah puhin a kawlhnamin a vit hlum ve nghal a; an fanu thihna chu an nupa chuan an tuar hle a, puhmawh tur an dap ruai a ni. Darlalpuii chu an fanu thih chhanah ngaiin; an nufaa a hnawhchhuah avanga a thungrulhnaah an ngai a, Sibuta chuan khuangchawinaah sial anga chhun hlum tumin a rilru a siam fel ta a; a tlang than loh nan an lusunna chuan an hmai an thup rih thung.

Khuangchawi niin a sial sawmna tur nghaka tlangval rual an hawi an hawi laiin, Sibuta chu meithal chawi meuhin a lo chhuak a, tlangvalho remti lo chung Darlalpuii chu hnamin a hling a, sial ang maiin a kai chhuak ta a. Tlangvalho duh lo chung silai nena vaubetin, sial angin a chaih luihtir a, Darpuii nuin tap chungin an hnungah a umzui zel bawk a.

Chutih laiin Lalngura inah chuan Darpuii neih dan tur ngaihtuahin ro an rel mek thung a. Kokim taka an ngaihtuah hnuah rem an ti tlang a, tichuan Darpuii be tur palaite ruat felin hlim takin an tin darh ta a ni. A tuk zingah Sakhan nula hmeltha Darpuii rim tura an inhawrkhawm laiin, Sakhan khua atangin Zakhuma chu hmanhmawh takin a lo tlan a, zualko thu a rawn thlen ta mai a. Darpuii chunga Sibuta chet dan zawng zawng a sawi chuan, Lalngura chu phuba la tura kal nghal mai a tum a, mahse, a upateho chuan thil rel fel hmasak chu thaa an hriat avangin an khapdai thei hram a ni.

Kokim leh ngunthluk taka ro an rel hnuah Lalngura chu phuba la turin a thuihhruaite nen an thawk chhuak a, mahse Sibuta chu a lo bihruk hman avangin an tum angin phuba an la thei ta lo va. Khaw chhung leh dai vel nasa taka an dap hnu pawhin an zawng hmu zo ta lo a ni.

Lalngura inah Lalngura leh a upate an lo lang a, Lalngura rilru na thawidam tumin theih tawp an chhuah a. Sakhan khua nena inhmelmak chu tha an tih loh thu leh, phuba lakna chuan thil tha a hrin chhuah an rin loh thu sawiin, Sakhan upate pawhin ngaihdam an dilna chu zahsak tha an tih thu an sawi lang bawk. Lalngura chuan Darpuii chu hmangaihin tuar viau mah se, a upate thurawn chu pawmin phuba lak lam chu a tawpsan ta a, Mahse, Sakhan tlang dung chuan a lung a len kumkhua dawn a ni tih a sawi bawk.

Lemchangtu hrang hrangte mizia:

Darlalpuii

Darlalpuii hi lemchan bu hming leh a changtu ber a nih avangin thlirtu leh chhiartu mit fukna ber a ni a. A pian thiamzia te,  a thatna te, a ngilneihna leh a duhawmnate avang hian mite khawngaih a hlawh hle a. A huaisenna avangin fak tlak a ni bawk. Rawng taka sial ang chhun atan chuan a uiawm lua a ni. Darlalpuii rilru thatna hi fak tlak a tling; Sibuta fanu, Lalpuii dam loh chungchangah hian a inpe zo hle a. “Keiman ka lo enkawl ang e, In duh leh mu rawh u” tiin a a laka nunrawng em em, Sibuta fanu ngei chu a enkawlsak a, Lalpuii pawhin a ngainatzia kan hmu bawk, “Ka nu…Ka ni ka ngai em mai….Zuk ko the u. Mawh, ka ni zuk ko teh u” tiin a ni chu a lam chul mai a ni. Lalngura upa min pawhin “…Darpuii chuan suahsual leh rilru chhiat vanga vela tiduhdah thin niin ka hre tawp lo mai…naupang a chhawnchhaih a a’n kilkawi dante sawn kei ka tan lung hi a dum ber mai awm e. Mi rilru tha lovin khawi lamah sawtiangin naupang va kilkawi peih suh” tia sawi atang hian a rilru thatzia tur a hriat theih a ni. Darlalpuii hi nula hmeltha tak a ni tih Lianhnawla tawngkam, “Pianphungah  leh hmelah zawng, Darpuii hi a tha thlawt a lawm” tia a sawi atang hian kan hre  thei. Sibuta’n a nghaisak hlum dawn thleng pawhin huaisen takin thu dik a la puang chhuak thei a, “Lal tha leh ngilnei i nih beisei vang chauhva  hrem thin che ka ni a sin. I nun rawnzia chu ka hre vek; ka pa turin i hrai hlum a, ka nau i vaw hlum a,” tiin mipui hmaah Sibuta sualna leh thiam lohna a la puang chhuak ngam bawk. Thih hnu piah lam thlirin, “Hei hi hre rawh, nuam i sa reng bik lo  vang. I thih hunah ka pa nen, Mambawiha nen mitthi khuaah kan lo hmuak ang che,” tiin Sibuta thil tih chu rulh let ngei a tum tih pawh ka hmu.

A chunga a thusawi atang hian Darpuii hian hma lam beiseina a nei reng thin tih kan hre thei a. A dinhmun chhiat em em lai pawhin beiseina nen hma lam hun atan a inpuahchah reng a, a thih dawn darkarah meuh pawh chu  beiseina chu a hloh chuang lo. Chuti chung chuan lemchan tluan hian Darlalpuii hi thil titu ni lovin, thil tih tuartu a ni tluan chhuak zak a ni.

Lemchan thawnthuah, a bikin tragedy-ah chuan Darlalpuii hi he lemchan lungchhiatthlak taka chang tur hian a tling tawk lo niin a lang.  A tir atang rengin mi tha, dik lohna leh fel lohna pawmawm tak tarlanna a awm lo va. Tragic flow-ah chuan Hamartia hi thil pawimawh tak a ni a, tragedy lemchan tluantlingah chuan hmuh tur a awm thin a, chu chu protagonist chungah a thleng bawk thin. Oedipus leh Macbeth lemchanahte pawh chiang takin hmuh tur a awm. Chuvangin, he lemchan atan hian amah hi a tha lutuk a ni. Mi tha chungchuang tak chu dinhmun sang atanga paihthlak a,  a dik lohna leh thiam lohna pawh lang hauh lova chhiatna rapthlak tak an chunga thlentir hi  mithiamte chuan an duh ngai lo. Hetiang a nih chuan lemchan thlirtu tan a thinrimthlak thin a ni. Chuvangin Darlalpuii hi tragic heroine tur chuan a thianghlim mah mah a ni.

Sibuta

He lemchanah hian misual (villain) chu Sibuta hi a ni a, Darlalpuii eptu atan  he lemchan ziaktu hian a hmang a ni. He lemchana Darlalpuii tuarna tawpkhawk thlentirtu leh min hmuhtirtu a ni a. A nau leh a pa thatin, puithiam a vit hlum bawk a. A farnu ngei pawh sial angin a chhun hlum a ni.

Sakhan lal Sibuta hi lal nunrawng tak a nih piah lamah a chapo hle bawk a. mahni thu duh a tina a, a lalna chungchangah, “Sibuta hian eng emaw a chhuan le? Naupangtein, khua leh tuite thlavenin a lala a…” tia Lalngura sawi kan hriat bakah, “…Palian lal sut vawn chaka fan fanho hi engah nge ka ngaihchan tehlul ang ni” , “Tu mitmei mah ka veng dawn lo, ka rawn dawn hek lo…” tia amah ngeiin a sawi ka hre bawk. Ngun taka chhutin, he lemchana action siamtu ber chu Sibuta hi a ni tluan chhuak zak a, Lalngura, Darlalpuii leh a nu chu a tuartu an ni tluan chhuak zak bawk. Sibuta nunrawnna leh a thiltih rapthlak tak hian he lemchan hi a tuam chhuak mai ni lovin a thunun kual vek a ni. He lemchana thil thleng zawng zawng hi Sibuta avanga lo awm leh a chawh chhuahte a ni hlawm a, inhnamhnawihna eng emaw a nei zel a ni. Hetia a khua leh tuite a nghaisak lai hian ama hma chu a sial thiam hle thung. In chhungah nunnem awm takin a lang a, a nupui thu lah a hnial ngam der bawk si lo.

Sibuta nunrawnna leh suahsualna phenah hian amah thlawp tlattu, lalnu a awm a, a ni hi Sibuta thinlung tiso turin tawngkam a lo nei fo thin. Lalnu hi Sibuta ang bawka chapo ve a  ni a, “Kan zik a bul em e tih lohah phei chuan rual kan chhin lohna a awm tawh bik lo” tiin tawngkam a nei a. “…Nang lah i naupan lai atanga vanduai, chhung leh khatte kutthak hnawihna i lo ni chho va…” tiin Sibuta thinlung tiso zual tur leh phuba lakna rilru pu thei tura lo fuihtu ber a ni bawk.

Sibuta hi nunrawngin chapo viau mah se leh lamah chuan hmeichhia ang chauh mai a nih chang a awm a, a fanu Lalpuii dam loh chungchangah hian hmeichhe dangte ai pawha buai leh phili zawk, rilru mumal leh fim pawh pu thei lo; a deuh ruai ang maiin kan hmu bawk. Engpawh ni se, he lemchana tawrhna leh harsatna zawng zawngte hi a taka lan chhuahtir a, thil rapthlak tak titu chu Sibuta hi a ni tho tho.

Lalngura:

Darlalpuii lemchan thawnthua mi pawimawh tak pakhat chu Lalngura hi a ni. Lalngura hian phung a thlu em em a, Sibuta chawngnaa a tel vete hian a phungthlukzia leh a hawihhawmzia a tilang a, chhung leh khat inngaihsak tawnna rilru a pu a ni tih a hriat theih.

Lalngura hi lemchan thlirtu ten an tan rawn em em a ni a, mi tha leh fel, hmangaihna dik tak nei mi, mi rinawm, tanpui ngaite tanpui nan leh mahni dikna humhim nan chuan tharum thawh ngam khawpa huaisen a ni. Ze nghet tak nei a ni a, mi thusawi leh thiltihin a nun a vaw nghing ve mai mai lo va, flat character a ni tiin kan sawi thei ang. Lal ni mah se thuhnuairawlh thei tak a ni a, a upate hmaa ngaihdam dil ngam khawpin a huaisen  bawk. Dinhmun chhe bera a awm lai pawhin hla taka beiseina eng chu a thlir fan fan thei.

Darlalpuii leh a nu tan chuan innghahna leh beiseina ber a ni a, thlamuanpui tham mihring a ni bawk. A thutiam hlen ngei tumin a theihtawp a chhuah a, amaherawhchu, rin phak loh lam tanga phiarrukna a tawn avangin a tum a hlen thei ta lo mai chauh a ni. Darlalpui leh Sibutate chantuala kan hmu tawh loh thlengin a ni hi hmuh tur a awm a, he lemchan tawpna bung lutuk tur hi a ni hian a rawn tlip mam a ni.

Zakhuma:

He lemchanah hian Zakhuma hi lang tam viau lo mah se a pawimawhna hi a nep chuang lo. Mahni nunna pawh ngai pawimawh zo lovin Darlalpuii hliam tuar tan a pen chhuak a. A ni hi main plot leh sub-plot inzawmna atan a pawimawh hle a, a ni hi he lemchana khawvel pahnih suihzawmtu leh an inkal pawh theihna leihlawn pawimawh ber a ni.

Kawng dangah chuan Zakhuma hi thatna aiawhtu a ni a. Nungchang mawi leh tha kawhhmuhtu, sualna kawng zawh laite kawng dik zawhtir tur leh kawhhmuh tuma hruai chhuah tumtu a ni. Mi huaisen tak a ni a, thih mai hlauhawmah pawh a tih tur nia a hriat chu a ti mai thin. Lal sual, Sibuta pawh hlau lova thuai thal tawp ngam a ni a, Sual dova a huaisenzia hi hrilhfak tling a ni.

Plot Construction:

He lemchan thawnthu ruangam (plot construction) hi a mum tha hle a.Main plot leh sub-plot pawh a inkungkaih tha hle. Sub-plot zinga mi – Lalngura leh Darlalpuii inhmangaihna emaw, Lalpuii dam lohna emaw hi  la chhuak ta i la, he lemchan hlutna hi a kiam mai ni lovin, a lemchan hi a kim thei lo va,  heng hmun ruak luah khat tur hian thil dang eng emaw tal chu zeh luh a ngai ang. Lalpuii natna leh thihna tel lo chuan he lemchana a climax thlen theihna tur hi a vang hle a. Thawnthu vawrtawp thleng tura vawrh sangtu pawimawh ber pakhat a ni. Chutiang bawkin Lalngura leh Darlalpuii inhmangaihna hi la bo ta i la, a thawnthu hlutna a kiamin a ngaihnawmna tam tak a bo thei a, a thawnthu a kim chang lo ang a, tin, Sibuta mizia hriat theihna tam tak kan chan tel bawk ang. Hemi piah lamah he lemchana a tawpna chu a bungin a mawi tawk dawn lo hle a, thlirtu tan rilru senna tur tam tak a bo tel bawk ang.

Lalchungnunga lemchan ziah hi hmun thumaha a then thei a – a bul, a lai leh a tawp tiin.  He lemchan thawnthu hi a thubul pho chhuah dan pawh a tha thawkhat hle a, he lemchan thawnthua mi pawimawh zualte pawh Chan I-na, Lan khatnaah hian kan hmu kim nghal thei a, tin, tragedy a nih ang ngeiin thu bul intan dan pawh a lungchhiatthlakin  a hlimawm lo hle. A tir atang rengin Darlalpuiite nufa chu dinhmun chhe takah dingin, harsatna leh tawrhna an hmachhawn nghal a, a thawnthu tantirhna atangin he lemchan hi lungngaihna chhum dum chhah takin a tuam nghal mup mai a ni.

Lemchana thil pawimawh ber pakhat chu harsatna lo thleng hi a ni. Chu harsatna chu eng nge a nih tih leh engtianga lo thleng nge a nih tih a pawimawh hle a, hei hi lemchan chaw chah ber a ni bawk. Lemchana harsatna lo thleng hi lemchanin a tawn san lai ber thleng tura vawrh chhotu leh a hnu lama thil thleng tur leh kal zel dan tur hriltu pawimawh tak a nih avangin lemchan that leh that loh tehfungah pawh an hmang fo thin.

Sub-plot a mi Lalpuii dam lohna hi a pawimawh hle a, lemchan chaw chah leh harsatna vawr tawp kengtu ber pakhat a ni. Lalpuii thihna hian Sibuta mizia dik tak leh a chhungrila sualna awm chu a rawn kai tho a, puithiam chu rawng takin a vit hlum ta nghal reng a. Chu maiah chuan lungawi zo lovin a naupan laia a tawrhnaah chuan phuba lak duhna lian tak a rawn neih teltir bawk.  Sibuta’n Darlalpuii se chhuna a chhun hlumna chhan hi “dawi sutna” tiin sawi mah se, a nihna takah chuan “phuba lakna” a ni zawk tih hi a thlirtu lam chuan an hai lo.

Heta tang hian lemchan kal zel chu lungngaihna hlir a ni ta a, mi tin chu Sibuta sualna tuartu an ni vek bawk. Darlalpuii nu tawrhna a nasa ang bawkin Lalngura tawrhna pawh a nep bik lo va; Sakhan khaw mipui tumahin Sibuta chu thiam an chantir hek lo. Chutiang bawkin Lalngura khaw mite pawhin amah Darlalpuii hmu hauh lo mah se an sun em em theuh a, chu tawrhna leh sunna chuan a lemchan tawp thlengin hmun lian ber a chang zui a, lemchan tawpna pawh Lalngura sunna leh lungngaihnaa khar a ni.

Title:

He lemchan thawnthuah hian a changtu langsar tak tak pathum – Darlalpuii, Sibuta leh Lalngurate ka hmu a, heng mi pathumte hi lemchan thupui atana iaiawm lo leh a changtu ber atan pawha thlannahawm tak vek an tling. Lalchungnunga  hian Darlalpuii hi he lemchana a changtu ber nia ngaiin a bu hmingah pawh Darlalpuii tih hi a hmang ta a ni. Duhthlan tur dang awm bawk mah se, a chhung thu ngun taka thlir chuan he lemchan ziaktuin a thupui atana Darlalpuii a thlang hi a awm ber leh inhmeh ber niin a lang bawk.

Ziaktu thenkhat chuan Shakespare-a tih dan zuiin Sibuta pawh hi a changtu berah an dah thei tho bawk ang a, a chanchin hi khal falin a bu hming chawituah pawh an dah thei awm e.  A chhan chu-hnam chanchin lamah Sibuta hi a langsar luah a,Darlalpuii hi chu Sibuta chanchin hrula lo lang ve pakhat chauh a nihna lai a awm bawk. Macbeth ang thoin protogonist atan hman tlak a ni a,  chutiang tur chuan thlirtute rilru luahin a chungah hian mipui mit a fu thup reng a ni. Amaherawhchu, Sibuta hi thangtharten anchhia kan lawh kumkhua tur a nih avangin Sibuta hliahkhuh thei turin Darlalpuii a chanchin khalh chhuak a, chantualah a pho chhuah thei hi he lemchan ziaktu themthiamna ropui tak a tling a, lemchan thawnthu bu hming atan pawh thlannahawm berah a rawn chhuah ta a ni.

Lalchungnunga hian a lemchan hming atana thlan chakawm ngawih ngawih turin Darlalpuii hi a rawn pho chhuak a, Hmeichhe hmeltha leh pian nalh, nungchang tha leh nelawm; naupang pawhin an nel leh an ngaih ngawih ngawih theih mi a nih tir a, tin, a taimakna hi faktlak a tling. Favang awllen lai pawhin a kut a awl lo va, an chhungkaw khaidingtu leh thawktu ber a ni tih pawh sawi leh chuan a ngai lo.A tlawmngaihzia leh a tuarchhelzia mawlh mai hian rilru a hneh a, amah tiduhdah a, a pa leh a nau thahsaktu, anmahni inngei atanga hnawtchhuaktu tan pawh phunnawi hauh lovin a thawhsak a, tanpui an ngaihna laiah theih tawp chhuahin a tanpui bawk. Hemi piah lama Sibuta tawngkhumna pawh chhang let hauh lovin a tuar chhuak thei.

Darlalpuii huaisenna mawlh mai hi faktlak a tling. Harsatna, lungngaihna, manganna leh tuarnate chu indelhbehtir lovin a phur kang a, harsatna eng ang hnuaiah pawh beidawnna rilru pu duh lovin hmabak eng awm thei nia a hriat chu a thlir hram hram zel a ni. Thihna kut vawtin a man mek lai; patling meuh pawhin khawngaihna dila an te ruai hun tur angah pawh huaisen takin harsatna chu a tuar tlang a. A hnukchah thleng pawhin mangan leh tanpuina ngenin amah indahhnuai ngai lo. Sibuta pawh a chhuahchalin, a chunga phuba a la lak ve ngei tur thu “…“Lal tha leh ngilnei i nih beisei vang chauhva  hrem thin che ka ni a sin. I nun rawnzia chu ka hre vek; ka pa turin i hrai hlum a, ka nau i vaw hlum a. Hei hi hre rawh, nuam i sa reng bik lo  vang. I thih hunah ka pa nen, Mambawiha nen mitthi khuaah kan lo hmuak ang che,” tiin Sibuta thil tih chu rulh let ngei a tum tih pawh ka hmu. 

Heng chauhte pawh i thlir hian, Darlalpuii hian thlirtu mipui mit a la a, a nungchang leh a thiltihte avangin mitin ngainat a hlawh a, a hmelthat leh amaha thil awm hrang hrangte avangin mitin tan a ngaihzawnawm hliah hliah theih. A mah hian mipuite ngaihtuahna hruaiin, a chunga thil thleng tur hi mitinin an ngaichang thuap reng a. A chunga harsatna leh tawrhnate avangin mi tin khawngaih a hlawhin khawngaihna mittui hial an seng a, chu chuan a tawp thlengin thlirtu mipuite chu a thunun thei. He lemchana a changtu ber  a nih bawk avangin he lemchan thawnthu bu hming atana  hman pawh hi a inhmeh ber a ni.

Historical Play or Chronicle Play:

Lalchungnunga hian Darlalpuii lemchan thawnthu a ziah hi hnam chanchina thil thleng chanchin behchhana a ziah a nih avangin hisrotical play emaw, chronicle play emaw  tiin a sawi theih awm e. Hetiangah hi chuan Hnam Chanchina thil thleng chu a ngai ang angin emaw, tlem her danglam deuhin emawa tarlangin, drama-a chan theih turin an her rem thin. Lemchangtu leh thil thleng pawimawh zualte tar langin, a tul angin lemchangtu mi dangte pawh an zep tel thin a ni.

A thawnthu ruangam thlir hian Mizo chanchina thil thleng tak tak, hnam chanchin ziaktute pawhin an lo ziah tawhsa chu thawnthu ruangamah hmangin lemchan a rawn ziak a. Hman huna  lo awm tawh ngei a ni a, a chanchin tichiang turin ‘Sibuta lungphun’ pawh Tachhip dai thlangah a awm nghe nghe. Mizo hnam chanchinah Sibuta chu chhungpui fa  a ni lo va, a pa turin a hrai hlum a, a nau chu a vaw hlum bawk. Chu chu lemchan chhungah hian hmu chiah lo mah i la Darlalpuii thusawi atangin a thleng ngei tih kan hre thei a. Darlalpuii leh Lalngura inngaihzawnna te, Sibuta’n Darlalapuiite nufa a hnawhchhuah thu te, sial anga a chhun dan leh  chanchin lungngaihthlak zawng zawng hi hnam chanchina thil thleng ziak dan ang a ni. K.Zawla lehkhabu Mizo Pi Pute Leh An Thlahte Chanchin – ah chiang takin kan hmu thei.

He lemchana mi pawimawh ber ber- Darlalpuii, Sibuta, Lalngura lo langte hi a taka awm ngeite an ni a; Darlalpuii nu pawh hi a taka awm ngei a ni. Tin, Darlalpuii’n a pa leh a nau a sawite pawh hi a taka mihring awm an ni bawk. K.Zawla ziak dan chuan Dungtlang lal pathum zinga pakhat Hulianan thlang tlaa Aithawr tlanga a awm laiin Sibuta hi Sakhan (Tachhip) khuaah a lal a,  a ropui hle tawh a ni. A hnam chungchanga ngaihdan hrang hrang awmte zingah  ‘Palian’ hnam chu mi pawm dan tlanglawm ber  nia hriat a nih thu a sawi. Chutih rualin, Thangur emaw, Saivate emaw, Rawite hnam emaw nia ngai an awm bawk.

A thawnthu innghahna hmunte pawh hi a tak ngei, hmun awm ngei, historical place a hmang bawk. He lemchan hi khaw pahnihah a innghat a,  kan hmuh zin zawk leh pawimawh zawk chu Sibuta khua, Sakhan(Tachhip) hi a ni. He hmunah hian Sibuta leh Darlalpuii leh a nu an cheng a, chutah chuan lemchangtute kan hmu ber. Khaw pakhat zawk, Lalngura khua hi he lemchanah hian a hming tar lan ni lo mah se, Hmuifang tlang lal ni ngeiin a lang a, Lallianvunga fapa a ni.

Darlalpuii lemchan thawnthu innghahna hun dik tak hi hriat theih chiah ni lo mah se, 1700-1800 AD bawr vela thil thleng ngei niin a lang a. He  lemchan ziaktu pawh hian history-a Sibuta hun lai  mil thei ber turin engkim a tar lang a. Sibuta hun laia an khawsak dan te, an tawngkam leh tawngkauchheh mil tur ber te, an rilru ngaihtuahna thlengin he lemchanah hian tar lan a ni. Chuvangin, a innghahna hun chungchangah chuan Sibuta leh Darlalpuiite hun lai (1700 – 1800 vel) a hmang a ni.

Lemchangtute inbiakna tawngkam tam tak hi chu phuahchawp niin a lang a, an mize mil leh an hun tawn mil  turin an tawngkam hi a chhep rem niin a lang. Hetih rual hian an inbiakna thenkhat erawh chu hnam chanchina  a lan dan ang anga seng luh a ni thung. Chan III-na, Lan iii-naa  Khuma’n Darlalpuii leh Sibuta inbiakna tawngkam a rawn sawi chhawn “Sibut, heti em hian ka chungah i rilru a lo chhiat hi ka ring lo a sin. I rilru chu ramhuai rilru tluk lek a nih hi”  “Kan naupan lai khan zangkhua a la bungbu ang ka tih kha, a bungbu ta a nih hi, i hre lo’m ni?”  “Hria e, ka hria a sin. Lal thaa leh ngilnei i nih beisei vang chauha hrem thin che ka ni a sin. I nunrawnzia chu ka hre vek; ka pa turin i hrai hlum a, ka nau i vaw hlum a. Hei hi hre rawh; nuam i sa reng bik lo vang. I thih hunah ka pa nen, mambawiha nen mitthi khuaah kan lo hmuak ang che.” tihte hi K.Zawla ziak atanga a lak chhawn ngei niin a lang.

Tragic Flaw :

Darlalpuii chunga vanduaina leh chhiatna lo thleng hi a chhan bulpui ber chu Sibuta niin kan puh deuh thup awm e. Hei hi a dikna chen chu a awm ngei mai. Amaherawhchu, ngun tak chhut chuan, Darlalpuii hian ama tuhrah a seng  zawk niin a lang. Amaha thil bet chi hrang hrangte chu tha hle mah se, a finna leh chakna lam a tlem deuh avangin ama hma a sial kaw zo lo niin a ngaih theih. A chhan chu Sibuta chunga pawi khawih hmasatu a nih vang a ni. He lemchanah hian Darlalpuii hi fel leh tha lutuk niin hmu  mah i la, Sibuta hian chhan leh vang awm lovin a nghaisa lo tih kan hmu. He lemchana ka hmuh theih chi piah lam, he lemchanin a huam chin bak hma lamah hian chanchin thui tak a awm ngei a. Darlalpuii’n hrehawm taka a lo nghaisak thinna chu Sibuta chuan “Zangkhua a la bungbu ang” tiin a lo vau lawk ngei tawh a, chu chu he lemchanah hian a takin kan hmu ta a tih theih awm e.

Darlalpuiite nufa hian hetiang dinhmun an tawh hnuah leh ngaihthatthlak loh tak tak thil a thlen hnuah pawh Sakhan khua chhuahsan lova an la awm reng hi thil mak tak a ni. He khua hi Darlalpuiite nufa tan chuan hmun thlakhlelhawm ber, an nunhlui engkim innghahna leh mite ngaihsan leh zah an hlawhna hmun ni mah se, Sibuta nungchang leh an chhungkaw chunga a chet dan zawng zawngte atang hian he hmun hi an tan a him lo a ni tih an pawm thiam lo hi thil pawi tak a ni.  Chu chu a tawpa  Darlalpuii’n a nun a chan phahna chhan lian tak a tling bawk. Sibuta’n an chunga a thil tih duh dan leh an nunna atan pawha him lo a ni tih an hre chiang em em a. An nun himna tana tlan chhuak lova he hmuna an awm reng avang hian Darlalpuii hian a nun a chan phah a ni.

Lalngura hi mi fel leh rintlak, tlamuanpui tham tak ni mah se, mihring ve mai bawk a nih avangin tih theih chin leh thlen phak chin a nei ve bawk a, thil engkim thunun thei leh chingfel thei a ni bik lo. Chu chu mihringte nihna a ni. Chutiang zawng zawng hmu thiam lo tur khawp chuan Darlalpuii hi a a lo vang tih chu a rin thei a. Chuti chung pawha ama tih theih ang tih tum lo va, Lalngura kuta a innghat lutuk hi a tihsual lian tak pakhat a ni. Darlalpuii leh a nu hian Sibuta hreng atanga chhuak turin chakna an nei a, amaherawhchu, thei reng siin Lalngura lak chhuah hun kher an nghak hi an tisual ta a ni ber. Lalngura kutah hian innghat lutuk lovin anmahni theihna hi hmang ve se la chuan Darlalpuii pawh hian hei aia rei hi a nun a hmang theiin a rinawm.

Lemchan ziaktu themthiamna hrang hrangte:

Darlalpuii lemchan thawnthu hi history-a innghat lemchan a nih avangin he lemchan ziaktu Lalchungnunga hian zalenna zau taka a hman a rem lo va, plot, character leh setting-ahte fimkhur a ngai em em a, history lam thil thlengte chiang taka tar lang chungin he drama tha tak hi a khawr chhuak thei a ni.

Hnam chanchin awmsa Dramatize tur hian themthiam a ngai thin reng a, Sibuta hi mi challang sa a nih avangin a kianga character dang protogonist-a hmang tur chuan a harsa hle ang tih a rin theih. He lemchan ziaktu hian hnam chanchina langsar sa leh hriat  hlawh zawk  Sibuta chanchin leh a nihnate tidanglam chuang hauh lovin, history-a character lang ve pakhat, Darlalpuii chu protagonist ni thei tura a chhawp chhuak thiam hi a themthiamna ropui tak a ni.

He lemchan ziaktu hian Dramatic Device thiam taka hmangin, a lemchan lan hrang hrangahte hian a zep tel bawk a. Darlalpuii nu thusawi “…Chutin hmanhmawh lem ma’ che, chunga Pathianin mal min sawm chek ang a…” tiin verbal irony tha takin a rawn zep  a ni. Chan I-na, Lan 3-naah Lalngura tawngkam, “Ka tu leh fate lo piang tur tan pawh ranngo rawn zawn nan ka la rawn hmantir fovang” tiin Situational Irony kan hmu bawk. Hemi bakah hian Darpuii tawngkam, “Ka pa damlai ni se ka va’n ti tak em! Engpawhnise, tuilairap zawng ka ni ta lo ve. Mahse, engati nge maw thawnawp  ang chauha rilru ka la put a, ka lawmna hi chhuhsak ka la hlau em ni dawn. Rilru natna hian min chiah hneh lutuk a ni ta ve ang. Mihring chin hriat a ni lo hlauhte hi a vanneihthlak zawk phian hi a” tiin Soliloquy tha tak kan hmu bawk.

Lemchan thawnthu thenkhatah chuan awlsam takin a changtu ber, main character hi a hriat mai thin a, he lemchanah hi chuan a changtu ber chungchanga inhnial theih tak turin lemchangtu mi pathum Darlalpuii, Lalngura leh Sibuta a din chhuak a, a changtu ber dinhmun luah thei tur khawpin an buk a inang tlang a ni. Hei vang hian he lemchan ziaktu hi character din chungchangah a hniam lo hle tih a hriat theih a. Character zir chian tlak tak tak a rawn chhawp chhuak thei a ni.

Tragedy ziarangah chuan unity of action hi mithiamte chuan an ngai pawimawh hle thin a. Chutiang bawkin he lemchanah hian a thawnthu hi pakhat, ngil taka kal chho ngar ngar ang mai a ni. Sub-plot ni anga lang pahnih- Lalpuii chungchang leh Lalngura leh Darlalpuii inhmangaihna pawh hian a main plot a tibuai lo mai ni lovin a main plot atana tangkai em em, Darlalpuii hun tawn chhoh vek a nih avangin main plot nen a inkungkaih tha em em a. A lemchan thawnthu hi kal khata kalin a sub plot tih buai lohin ngil takin a kal zar zar kan ti thei ang.

Lalchungnunga hian Darlalpuii lemchan hi tragedy firin a ziak a, comedy nen a pawlhsawp ve lo. Lemchan thawnthu tantirh atang hian boruak zangkhai hip tur a vang hle a, Protagonist tana beiseina eng lo lang ve det det pawh villain hmang hian tihtawp zel a ni. He lemchan pumpui hi Sibuta sualna, nunrawnna leh a thinrim hrikthlaknain a tuam chhuak vek a, a tir atanga a tawp thlengin chu chu lemchangtu dangte pawhin an tuar a ni. Sawiselbo khawpa fel Lalngura thinlung pawh nasa takin a hliam tel a ni. Lalchungnunga hian hetiang taka tragedy tha a khawr chhuak thei hi fak a phu hle a ni.

Lemchana thil pawimawh tak ni thin chu harsatna lo thleng hi a ni. He lemchanah pawh hian harsatna leh buaina chi hrang kan hmu a, lemchangtu nun tluang tha tur leh malsawmna dawn tur te, beiseina kawl eng turte pawh harsatna puandumin tuamin a rawn tihnawk zel a. He lemchana harsat lo thlengte hi hringnuna thleng thei awm reng leh pawm tlan theih turin he lemchan ziaktu hian a hun tak zelah a rawn thlentir thin a, heng harsatna thlengte hi a pawmawm thlap thei vek a ni. Awiawm loh leh awm ang lo lutukin harsatna a piantir lo va, hei lemchan ziaktu themthiamna leh he lemchan hlutna tizualtu a ni a, tragedy a nihna tura hmanraw pawimawh ber pakhat a ni bawk.

History lamah chuan Darlalpuii kan hmuh theih chin hi a tlemin a tawi hle a, chuti chung chuan he lemchan ziaktu hian lemchan thawnthu tawi fel takah history-a thil thlengte chu tawi fel tak leh kimchang takin a rawn khung khawm thei a. Mizo hnam chanchina langsar chin hmaih hauh si lovin Lan 14 lekah a khung khawm thei hi a themthiamna kawng dang leh chu a ni. Lemchan awmze nei puitling tluan tha tak din chhuakin thil pawimawh leh tar lan tul chin chu a kim thawkhat hle a ni.

Tragedy lemchana pawimawh tak pakhat chu katharsis hi a ni a, hetiang hlauhthawnna, hlauhna leh lainatna siam thei hi tragedy lemchan hlawhtlinna pakhat a ni thin. Darlalpuii lemchanah pawh hian katharsis/catharsis hi hlawhtling taka hman a ni a. Darlalpuii leh a nu chunga Sibuta chet duh dan atang hian hlauthawnna lian tak a thlirtu ten an nei nghal a. Darlalpuii, mi tin ngainat leh thlirtu mipuite ngainat, a mizia, hmel leh pianphung avanga mite ngaihzawn ruk huai huai chungah chuan Sibuta’n a suahsualna, nunrawnna leh thinrimna a hri tla chho mawlh mawlh a, hei hi a tir atang renga mite hlauhthawn ruk a ni.  Heng a tawrhna avang leh a duhawmnate avang hian Darlalpuii chuan lainat a hlawh phah lehzual a, a tawpa a chunga thil thleng avang hian mi tinte khawngaih, mite mittui tlak phahna leh an thinlunga khawngaihna leh lainatna nasa tak puttirtu ni turin he lemchan ziaktu hian a din chhuak bawk a ni.

He lemchan tihlutu leh a ziaktu themthiamna tar langtu lian tak pakhat chu a dialoque tha tak tak mai hi a ni. He lemchan chhungah hian a hun laia an tawngkam awm tak tak hman a ni a,  a changtute inbiakna tawngkamte hi a sawitu nena ngaihbelin an sawi awm tak tak leh an tawngka chhuak awm tak tak a hmantir thiam hi faktlak a ni. Darpuii nu tawngkam, ‘…Zawlze dang pu a nih loh phawt chuan kan lamah chuan a tang vein ka hria a ni” tia a fanu a hnemnate hi a tha hliah hliah mai. Heng bakah hian tawng upa thahnem tak a zep tel thiam bawk a ni.

Hemi hrulah hian Lalchungnunga tawngkam thiamzia leh chheh nalh theihzia kan hmu bawk. “…Duh leh Darpuii chu Ngura thinlungah leh laikhumah lo zal mawlh se la…”  “…Darpui,ainawn chuan kangthai a dip e tih thil thua ainawn chu phunsawn niin a insawi a” han tihte hi a ziaktu tawngkam chher chhuah liau liau, hmanpui ve atana itawm ngawih ngawih a ni a, a mawiin a sawi tum a chiang a, thu a thup nalh em em bawk. Hetianga tawngkam mawi hi hmuh tur a thahnem hle a ni.

He lemchan ziakltu hian heng tawngkam leh thusawi awm sa hrang hrang : “Sibut, heti em hian ka chungah i rilru a lo chhiat hi ka ring lo a sin. I rilru chu ramhuai rilru tluk lek a nih hi”  “Kan naupan lai khan zangkhua a la bungbu ang ka tih kha, a bungbu ta a nih hi, i hre lo’m ni?”  “Hria e, ka hria a sin. Lal thaa leh ngilnei i nih beisei vang chauha hrem thin che ka ni a sin. I nunrawnzia chu ka hre vek; ka pa turin i hrai hlum a, ka nau i vaw hlum a. Hei hi hre rawh; nuam i sa reng bik lo vang. I thih hunah ka pa nen, mambawiha nen mitthi khuaah kan lo hmuak ang che.” He lemchan ziaktu hian Mizo history ziaktu ten an lo hman tawngkam tam tak chu a ngai ngaiin a seng lut thiam hle a, a sawitirtu leh a sawitir hun pawh a inremin, history ziaktute thu hman sa reng a ni tih pawh hriat loh khawpin a chhep rem thiam a ni

History lam atang thlir chuan Darlalpuii hi Sibuta hming leh chanchin hrula lo lang ve pakhat ang chauh a ni a, amaherawhchu, he lemchan ziaktu Lalchungnunga erawh hi chuan Sibuta chanchin leh hmingthanna chhan zawng zawng paih bo si lovin Darlalpuii hi he lemchan chhungphumah a hmangin, lemchangtu pawimawh berah a chher chhuak thei a ni.

A that tawk lohnate:

Darlalpuii lemchan hi kawng hrang hrang atanga thlirin a thain belhchian pawh a dawl hle a, amaherawhchu, mihring hi chu famkim lo leh tihsual chang nei thin kan nih miau avangin felhlel deuh lai leh that tawk lohna laite pawh a nei ve nual a, chungte chu a langsar zual lo thlir i la:

Mizote hi mi ina kan chuankai dawn reng rengin kawngka kik hmasa lo emaw, aw thian hmasa lo emaw chuan puitling chin chu an pawng luh tawp ngai meuh lo. Amaherawhchu, he lemchan Chan I-na, Lan 1-naah hian, Darpuiite nufa ti ti mawlh mawlh laiin Langura chu kawngkaa lo ding reng tawh ang maiin kan hmu a, zanah lehnghal, veng hmawra hmeithai nufa chuan kawngkhar lo chuan an awm a rinawm lem loh a, inleng mi dang an nei lo tih chiang takin a hriat bawk. Helai tak hi chu tlema siam rem deuh atan a itawm ngawt mai.

Darpuiite ina Lalngura leng Chan I-na, Lan 1-na a mi hi thil pangngai tak a ni a, amaherawhchu, Lalngura haw turin a mangtha pawha Darpuii’n a mangtha let ve miah lo hi thil nihphung lo tak a ni. Lalngura’n “…Mangtha mai zawk le” a tih zawhah hian , kualkhung chhungah ‘A chhuak ta a’ tiin dah ni se, Hemi dawt chiahah hian Darpuii hian ‘Mangtha’ ve ta bawk se. Tichuan, kualkhung chhungah bawk ‘Darpuii paw’n la kaih dahthain thuk a thawlh a. Mu turin a insiam a’ tih nise, helai lan kharna hi chu a duhawm zawk ngei ang.

Lemchanah chuan action hi a pawimawh em em a, Chan I-na , Lan 3-naah hian action awm ngei tur nia lang, mahse action awm hmaa a lan tawp ta mai a awm a. Lalnuin, “…Kawng hi ka’n kharsak ang che u.” tia a sawi zawh rual chiahin a Lan hi a tawp zui nghal mai a, helai hi thiltih awm leh ngei tur niin a lang si a. He thu a sawi zawh hian ‘Lalnu chu kawng khar turin a tho va’ tih emaw, ‘Lalnu chuan kawngka chu a khar a’ tih emaw hi kualkhung chhungah awm leh ngei tur niin a lang bawk.

Chan I-na Lan 3-naah, Ngura tawngkam, “…Lu-a kel hmul to…” tih kan hmu a. hei hi a hmang dangdai hle niin a lang. Hman dan tlanglawnah chuan “Lu-a kel sam to” tia hman thin a ni a. Chu chu lu tuak sawina atana hman a ni. Lu-a kel hmul to han tih chuan thil dang daih min mitthlatir a, chu chu mihring lu-a kel hmul lo to ta ang hi a ni. He tawngkam hi a dik lo hulhual chu kan ti ngam chiah lo nang a, hman dan tlanglawn deuh chu a awm ve a ni.

He lemchana inkoh dan chiang lo tak mai pakhat chu Darpuii’n Lalngura a koh dan hi a hi. Darpuii hian Lalngura hi ‘Ngura’ tiin a ko ve mai a, A chang phei chuan ‘Lalngur’ tiin a ko bawk. Helai ngawr ngawrah hi chuan buaina tur a awm lo va, kum inrualpui tawk tak emaw, Darpuii hi a upa zawk emaw ni mai turah a ngaih theih. Amaherawhchu, Chan III-na, Lan 3-naah, Khuma tawngkam atanga kan hriat, “…A chah dawn tep paw’n e, ‘U Lalngur’ tiin i hming a lam an ti a ni…” tih kan hmu leh bawk. He laia koh dan inang lo hi a eng emaw zawk zawk tal hi siam that atan a itawm hle mai.

He lemchan phek hmasa berah hian Darpuii nu tawngkam “…Pathianin mal min sawm chek ang a…” tih kan hmu a, kum 1700-1800 inkarah hian Pathian tih tawngkam hi an lo cheh tawh viau em ni ang tih ngaihtuahna a tithui hle. Heng hunlai hian an hman tlanglawn a la rinawm lo hle. Kum 1894, August ni 1 atangin Bible hi Mizo tawngin an letling tan a, hetah pawh hian a tirah chuan Pathian tih an hmang lo. Khuanu tih tur nge Pathian tih zawk tur tih pawh an inhnial fe a ni.

Chan II-na, Lan 1-na tawpah hian action la awm ngei tur niin a lang bawk.  Lalpuii’n “ ka ni…a vawt em mai, puan min sin thattir the. A eng si, ka puankha han zar phui the” tia a ni a ngenna hi action awm lova helai lan a tawp zui nghal mai hi chu a uiawm deuh a ni. Kualkhung chhungah, “Darlalpuii chuan a vahnu chu puan a sin thattir a, puanin a zar hliah a” tih hi awm leh se la a inhmeh lehzualin a rinawm.

A dawt lehah chuan Chan II-na Lan 2-naah,  Lalpuii dam lo chungchangah lalnu tawngkam hian ngaihtuahna a tithui hle mai. “…Bawlhmun atanga puithiam a rawn kir hun chuan biaklai lungawina a rawn hawn ngei ang a…” tih kan hmu a. hei hian an inthawina chauh piah lamah, Mizo sakhuaah hian ramhuai hi kan lo be reng em  ni tih zawhna lian tak a siam thei. Khawsik thawina atan hian Daibawl hi an hmang ber a. Tuihuai a nih chuan arpa an hmang a, ramhuai a nih chuan arnu an hmang thin. Heng huai pahnihte hi kan biaklai an lo ni reng a nih chuan Mizote hi ramhuai be hnam angin min chhuah der tihna a ni dawn a. a fuh chiah lo deuh niin a lang. tin, “daibawla thawidam zawh loh hi chu an awm khat viau a nia” tiin lalnu hian a sawi bawk a, hei pawh hi pawm a harsa deuh. Daibawl hi khawsik thawina naran a nih avangin dampui loh chang an nei ve fo va, chumia an beidawn hnuah chuan Bawlpui an hmang leh thin a ni.

Chan III-na, Lan 6-naah hian awkhrawl tih kan hmu a, heta awkhrawl hmanna hi a dik chiah lo niin a lang. Hman dan dikah chuan, ‘mi duhawm leh pamham’ lam sawina atan hman thin a ni a. hetah hi chuan Sibuta nunrawnna leh lal hrawtna sawina atan a hmang thung a. hei chu  siam danglam  atan a tha khawp mai.

Lemchan thawnthuah, a bikin tragedy-ah chuan Darlalpuii hi he lemchan lungchhiatthlak taka chang tur hian a tling tawk lo niin a lang.  A tir atang rengin mi tha, dik lohna leh fel lohna pawmawm tak tarlanna a awm lo va. Tragic flow-ah chuan Hamartia hi thil pawimawh tak a ni a, tragedy lemchan tluantlingah chuan hmuh tur a awm thin a, chu chu protagonist chungah a thleng bawk thin. Oedipus leh Macbeth lemchanahte pawh chiang takin hmuh tur a awm. Chuvangin, he lemchan atan hian amah hi a tha lutuk a ni. Mi tha chungchuang tak chu dinhmun sang atanga paihthlak a,  a dik lohna leh thiam lohna pawh lang hauh lova chhiatna rapthlak tak an chunga thlentir hi  mithiamte chuan an duh ngai lo. Hetiang a nih chuan lemchan thlirtu tan a thinrimthlak thin a ni. Chuvangin Darlalpuii hi tragic heroine tur chuan a thianghlim mah mah a ni.

Lemchan zir mi ten tragedy duhtuina mual atana an thlirin, lemchana an ngaih pawimawh em em thin; three unities hi duh angin a vawng tha tawk lo tih a lang bawk. Unity of action chu sawisel ngai loah lo dah ta i la, unity of place lai ber hi duhthu a sam ta lo a ni. He lemchanah hian Setting of place pahnih kan hmu a, chu chu Sibuta khua, Sakhan leh Lalngura khua (Hmuifang khua ni ngeia lang)-te kan hmu a ni.Hei hian tragedy kalhmanga unity of place chu a vawng tha lo deuh tih a lang a, amaherawhchu, hetiang tel lo pawh hian lem chan tha tak chu a ziah theih tho bawk ang.

Darlalpuii lemchan kan thlira lungawithlak loh ta ber mai chu Dramatic Justice/Poetic Justice kan hmu ta lo hi a ni. Darlalpuii hi sualna reng ei lo ang maiin a lang a, an naupan laia Sibuta a hremna thin zawng zawngahte chuan tumah rengin thiam loh an chantir lo. Tin, amah leh a nu tawngka ngei atang pawhin chu chu a pawmawm hle bawk. Chuti a nih lai chuan sualna nei lo leh fel lohna reng nei lo chungah hetiang em ema tawrhna nasa a thleng mai hi pawm thiam a har a, a lungchhiatthlak rualin a thinrimthlak em em a ni. Hei tak hi Tragedy lama mi thiam ten a changtu (protagonist) thlan fimkhur ngai an tih lai tak chu. Oedipus leh Macbeth lemchante kan thlir chuan error of  judgement(hamartia) kan hmu thin a. Chu chu protagonist chungah a ni fo thin.

He lemchanah hi chuan mi fel, sualna reng nei lo chungah tawrhna leh vanduaina, luangngaihna leh thihna hial a thlentir a, chutih rualin mi sual, thil tisualtu leh tualthattu chungah eng hremna mah lek a ni ve lo thung. Hei hian he lemchan hi chhiar a tinuam lo a, rorelna dik a awm loh avangin a chhiartu leh thlirtu mipui thinlung nasa takin a tiner thei a, mi tam takin an hlut loh phah thei bawk a ni.

Heng a chunga duhthu a sam tawk lohna  thenkhat kan han tar lan avang hian he lemchan hi lemchan tha a tling lo tihna emaw, zirtlak leh chantlak loh tihna emaw a ni hauh lo va, a lemchan bu pumpui atang kan thlir hian he lemchan hian that lohna aiin thatna tam tak a nei zawk. A thatna leh hlutna tam tak karah a that tawk lohna leh duhthu a sam tawk lohna te hi a lo lang ve det det chauh a ni a, mi thiam zawk leh mit fim zawkin an thlir phei chuan, tuna a that leh hlutna kan han tar lan mai bak pawh hi hai chhuah tur tam tak an hmu ngei ang.

Engpawh ni se, Darlalpuii lemchan thawnthu hi tragedy tha tak a ni a, Mizo ten tragedy lemchan kan neih zingah phei chuan a tha ber pawl a tling hial awm e.

Lehkhabu rawnte:

Khiangte, Dr.Laltluangliana : Lemchan khawvel I-na, Aizawl, L.T.L.Publication, 2012, 5^th edition.

Khiangte, Dr.Laltluangliana : Thuhlaril, Aizawl,Felfim Computer, 2005

Lalthangliana.B. : Mizo Chanchin, Kolkata, Swapna Printing Works (P) Ltd. 2014

Lalrinawma. Rev. V.S. : Mizo Ethos : Changes And Challenges, Aizawl, Gilzom Offset, 2005

Renthlei, Darchuailova : Tlang Thawveng, Aizawl, , Gilzom Offset, 2009

Renthlei, Nununa : Guide book on Drama, Aizawl, Gilzom Offset, 2013

Siamkima : Zalenna Ram, Aizawl, Gilzom Offset, 2002

Thanmawia.R.L. : Mizo Hla Hlui, Aizawl,Gilzom Offset, 2012

Tribal Research Institution : Monoliths and Landmarks of Mizoram, Kolkata, Unik Colour Printers, 2001

Vannghaka, Dr. K.C. : Literature Kawngpui, Aizawl,Gilzom Offset, 2011

Zawla. K : Mizo Pi Pute Leh An Thlahte Chanchin, Aizawl, Gosen Printers