Duhmanga leh Dardini Lemchan Thawnthu Bihchianna

Duhmanga leh Dardini lemchan thawnthu hi Lalsangzuala ziak a ni a, Thangzawra tih lemchan thawnthu nen bu khatah khung dun a ni. Kum 2006 khan Mizoram Publication Board hnuaia tihchhuah niin, a man hi Rs 60 a ni. A chhutna hmun hi Gilzom Offset, A/54 Electric Veng, Aizawl a ni a, copy 1,000 tihchhuah a ni. Duhmanga leh Dardini thawnthu hi phek 125 a khung len a ni a, Thangzawra tih lemchan hian phek 127-193 a awh bawk. A ziaktu Lalsangzuala hian kum 1997, Krismas urlawk zan(Dec 24) khan Duhmanga leh Dardini lemchan hi ziak tanin, a khawr pum nan erawh hun a duh rei deuh thung a ni. He lehkhabu hi a chhah lutuk lova, a pan lutuk hek lo, a khawih vel pawh nuam tak a ni.

He lemchan thawnthu hi Tragedy a ni a. Mizo Romantic tales a mi niin, Vangtlang lal Hrangvunga fapa leh hmeithai fanu Dardini-te inhmangaihna runthlak tak thawnthu a ni. Historical play emaw Chronicle play kan ti thei bawk ang. Chan ngaah thenin, Lan sawmpariat(18) lai a awm a. A hmun nghahna ber hi Vantlang khua leh Sunthla ram; Mualpui khua a ni.

A lemchan thawnthu tlangpui:

                Duhmanga chu a lenna ber thin upa min fanu Saikii-te an inthawi avangin a leng thei lova, a thiante zuiin hmeithai fanu Dardini-te in lamah chuan a chuangkai ve ta rawi mai a. Duhmanga chuan Dardini a hmuh phat atang chuan chang dang mah kan thei lovin a thinlung chu a tuiral ta nghal a. Chutiang bawkin Dardini chuan a inleng tlangval ten mipa dang laka an hual fiamna dawhkilh a sama an thiahsak chu Duhmanga dawhkilh chiah phawi hmaih luiin a inlengte pawh lunghnurin an haw phah nghe nghe a ni. Nimahsela, hmeichhe tan chuan an tlangval duhzawngte tan an mitmei piah lama an lantir ve theih dan chikhat a ni miau a. Chutia Dardini inleng berte an lungnihloh tak achinah chuan  Duhmanga chuan a mal rim ta chawt mai a.

                Chutia khawkhat nula hmeltha leh lal fapa, pasaltha hmingthang nipah fawm inzui ta chu khawchhung a deng chhuak thuai ta a. Dardini a ruka lo ngaizawngtu Chawngkhuma phei chuan Duhmanga chu a haw em em a, mahse lal fapa leh pasaltha nipah fawm han lan chu thil har tak a ni. Chutah Saikii pawh chuan an ni inzui ta daih chu a run kher mai. Duhmanga leh Dardini te chu an inhmangaihin an inthlahlel tawn thin em em a. Nimahsela, an dinhmun inthlau lutuk mai chuan Dardini chu a tihnual fo thin. An induh tawnna chu a thuk tawh em avangin Dardini chuan then chu duh sateh thin mah se a thei ngang bik si lo. Inthiamlo tak chung chuan an hmangaihna kawng chu an zawh chho dun ta zel a.

                Nikhua rei hnu chuan Duhmanga nu leh pate beng pawh a thleng ve nghal a, an fapa nakina tlang la thut mai turin upa min fanu Saikii bansana, hmeithai fanu a hel thin tih an hriat chuan an thin a sa kher mai. Lalnu Chawngi phei chuan a engamah hmain Dardini chu a khei nghal em em mai bawk a. An pahnih pawh then theih dan tur chu upa min Suaka nen chuan lal Hrangvunga-te chuan beng sikin an ngaihtuah ta nghal a. An remruat dan tenawm tak hmangin Saikii chu Duhmanga rawn hauh loin nupuiah an neihsak ta rawi a, Duhmanga chuan nupui enin a en duh hauh lova, a kiangah lah a mu ngai hek lo.

                Duhmanga chuan Dardini chu a thlah chuang hauh bawk si lo. A hnuah phei chuan  Dardini zing buh deng chu a hruai haw ta tawp a, Saikii chu kawngka sul pelin a ma ta lawng lawng mai bawk a. Chutiang teh nuaih kara Dardini chu lawi lut a nih avangin an tiduhdahin an hmusit em em a. Nikhat phei chu Duhmanga ramchhuah hlanin an lo ma hial a, Saikii chu an thuin an lo ko let leh bawk a. Duhmanga ramchhuak hlawhtling taka lo haw chuan an thil tih dan a hriat chuan a thinur em em a, Saikii pawh chu a ma zui leh ta nghal a. Salu lawmnaah pawh kal lovin Dardini-te in lam chu a pan ding ta zawk a. Chutia an la inhel zel avang chuan Lal leh Suaka chuan Dardini-te nufa chu lenchilhin an vau ta hial a.

                Dardini chuan an retheih avang chuan hun harsa tak a tawk mek a, Duhmanga’n a lal thutthleng leh a thisen zawmpui ngeite nena an inhal ta chu a inthiam lo thin em em a, a nun chu a hreawm takzet a ni. A hmangaih chu a tana that zawk ringin vawi tam then chu  tum teh thin mah se Duhmanga chuan chung thil zawng zawng pawh chu chan a inhuam em em zel mai bawk si. Duhmanga chuan an awmdun theih dan chu a dap chamchi reng a. A pa Hrima khuaah chuan an tlandun theih dan tur kawng chu Dardini a hrilh a mah se ramchhuak hming puin a pa Hrima khua a han kal ang a, an in lamah hruai kir leh phawt ang che tiin mualpho leh tur awm tawh chuang lo Dardini chuan a remti ve ta a.

                Duhmanga ramchhuak lo haw chu inah pawh innghat hman loin a rammu zui leh ta a, hun rei tak a thang hlan chuan Dardini raipuar tuau tawh chu an lo ma a, mak mai duhtawk lovin an khua atangin a nu nen an hnawtchhuak ta hial a. Duhmanga rammu lo haw chuan an  hnawhchhuah thu a hriat chuan an in leh khua chhuahsanin thinlung lungchhe vankaiin Dari te khaw lam chu a pan ding ta nghal a. Dardini chuan Mualpui khuaah chuan fapa a hring a, mahse a hliam tuar lovin Duhmanga hming lam chungin a thi ta, a fapa pawh chu a ruang an delhtir a. Duhmanga’n Mualpui khua an chuankai  chuan a hmangaih chu a fapa nen mual an liam ta tih a han hriat meuh chuan pasaltha Duhmangsakeia chu a kehsawm vek a, an khua Vantlang runna leh chhiatna rapthlak tak tawrh mek chungchangah pawh tha thawh chhuah tur nei tawh lovin a hmangaih Dardini leh a fapa kiangah chuan thlafam a lawi ve ta zawk a ni.

Plot Contruction:

                Duhmanga leh Dardini lemchan thawnthu ruangam (plot construction) hi a tha tawk ang reng hle a. A plot bik hi chu a mar tha hle a, sub-plot tih tura han puh thluk theih deuh tak a awm hran lo a. Thil thlen chhoh dan a rem kawngah pawh chhiar a nuam hle bawk. Thubul phochhuahna (exposition) ah lal leh upate ti ti atangin a changtupa (hero) ber chu lal fapa a nih thu leh pasaltha huaisen a ni tih kan hmu nghal a. A changtunu Dardini chu hmeithai fanu hmeltha tak leh tlangval tamtakin an rim rawn a ni tih kan hmu bawk. Duhmanga zankhat a lenna atangin an hmangaihna mit chu a keu ta nghal a.

                An hmangaihna mit keu chuan an dinhmun inthlauhna chu a rawn hailang a, chu chuan harsatna (complication) a hring chhuak a. Chu chu he lemchan chawchah ber chu a ni ta reng a ni. Dinhmun inanglo tak an nih avangin buaina a inmung chho a, lal fapa Duhmanga tan chuan hmeithai fanu han birh tluk tluk chu Duhmanga chhungte thin a khei hle a. Upa min fanu Saikii chu nupui atan an neihsak ta tawp a. Chu inneihna chu an duh angin a hlawhtling chuang lova, Duhmanga chuan a duhthuin Dardini an la lut leh rih a. Duhmanga awm loh hlanin an lo mak sak a. An han inthen leh rih na a, Duhmanga chuan ala lenchilh reng zel tho a.

                An inkar chu tha hleithei lo inbansan thei chuang si loin an awm reng a. Chu an harsatna chuan zia lam a pan theih chuang si loh avangin  Duhmanga chuan tlanbo dun dan tur rem a ruat a mahse chu a remruatna chuan harsatna vawrtawp a rawn hring chhuak ta zawk a. Duhmanga rammut hlanin an ma nawn leh a. Chumai duhtawk lovin raipuar tung tawhin khua atanga hnawhchhuah an ni leh ta zel a. Duhmanga rammu lo hawin an in leh khua chhuahsanin  Dardini-te nufa pan lam chu a panding ta nghal a, Dardini chu fa chungah a thi a, Duhmanga’n chu thihna thu a hriat chuan a tlusawp vek a,tho chhuak leh tur awm lovin a thi ve ta nghal a ni.

Title:

                He lemchan thawnthu hming atana Duhmanga leh Dardini tih hi a inhmeh hle in ka hria a. He lemchana a changtute hero leh heroine berte hming hrula a thawnthu hming a chawi hi thil inrem lo tak chu a ni hauh lo mai. Chu bakah chuan sawi tawh angin he lemchan hi hmanlai Mizo Romantic tales ami lak chhawn a, chul mam (Dramatize) leh a nih avangin; a hming lo chawi chhoh dan angin a thupui atan Duhmanga leh Dardini tih hian a lemchan pawh a phawk chhuak tha hle bawk a ni.

                He lemchan hi Duhmanga leh Dardini-te inhmangaihna kawng bumboh tak chungchang a ni a. A title tur atan reng pawh iaiawm lo sa leh inchawih em em a ni. Thawnthu awmsa a nih avangin a ziaktu hian a duh angin a title hi a her rem ringawt theih lohna lai a awm a, thawnthu awmsa a nih avangin a title bik hi chu thil fuh tak chu a ni sa reng a ni. A changtute pahnih hi harsatna leh chhiatna tuartu (victim) an ni a, an chungchang bik thlurna a ni bawk a, chutih rual chuan a ngaihnawm theih dan tur angin thil dang zeh tel a ni.

Theme:

                He lemchan theme chu hmangaihna a ni a. Chu hmangaihna chuan par a chhuang reng em tih pawh zawhna awm thei a ni. Duhmanga leh Dardini-te hmangaihna thuk leh ril tak hian chhiatna pawh a keng tel a, chu chhiatna tuartu chu an mahni chauh a ni hauh lo mai.  Hmangaihna hi a mawi a, a par chhuah pawh a mawi a ni tih hi mi tam tak hmuh dan pawh a ni. Mahse hmangaihna hian kan vela mi te pawh a tina tel ve thin tih he lemchanah hian chiang takin kan hmu  a ni.

                Dardini hmeithai fa ve meuhin lal fapa zankhat lenna mai a heti taka mitmei a hmuh zui dan leh a inleng thang tlangvalte tilunghnur khawp hial hi chu a mak ang reng hle a ni.  Hmeithai fa tan chuan cho rual loh tur leh mite en dan tur ngaihtuah pawha hnawlna tham a tlin tehreng nen a changtunu ber hian a bawh hmasa a ni kan ti thei awm e. Chutih rualin hmangaihna chuan zah pawh dawn zo lovin a siam a, ti khan a ti ta mai a ni kan ti thei bawk ang.

                Dardini hian hetiang hian mitmei lo hmuh ta lo se, Duhmanga hian Saikii inthawi zawhah a pangngai angin a awm leh thei mai ang em? Nge ni a, tlangval man to tan chuan duh duh thing thei hian Dari hi a chhuah lo zawk ang?  Hmangaihna chuan a zem a a, mawihawih zawng turin an ngaihtuahna a fim zo lo, thlan thim lam chu a tawp thlengin an zawh ta a nih kha!

                Dardini hian a neih rosum vang ngawta hmangaih a nih lohzia chu a tlangrel leh hmuhsitna tawpkhawk inmakna leh inhnawhchhuahna hial a tawn hnu pawn a hmangaih chu a danglam ngai lova, a hnukchhah dawn thleng pawn a hmangaih Duhmanga hming lam chung zelin a liam ta a ni. Hmangaih lo chu ni se chuan tlanchhuahna tur kawng chu Chawngkhuma hmang pawn a awm a mah se a thinlung lalpa chu phatsan lovin zahna, tawrhna leh thihna thlan thim hial a zawh ta zawk a ni.

                He inhmangaihna kawng bumboh zetah hian a tuartu hi anni pahnih chauh an ni hauh lo a. A hmasa berah chuan Chawngkhuma chu Duhmanga’n a lan ta nalh a, Saikii lah thianghlim chung siin mak vawihnih ngawt a tawk a. Saikii tawrhna hi a na em em a, Duhmanga khan a mutpui lo chung pawn a lo let leh duh kha a ni a, nupa nun hmang lo pawn Duhmanga kianga awm a thlakhlelhzia kan hmu thei. A dawt lehah chuan Dardini nu leh Duhmanga chhungte kha an ni.  Dardini nu khan hmuhsitna leh intham lohna awka lal leh upa atangte khan a hre chamchi thin a. Chutah a fanu neihchhun chuan a tupa vawikhat chauh a la hmuh chu mual liamsanin, amah chauhin hnutchhiah a ni. A tawp berah chuan  Vantlang khuain an pasaltha chhuanvawr Duhmangsakeia an chan a, chutah run an tawk a, lal chu thi in mi tam tak salah an man a, a farnute hial pawh an man tel ve a ni.

                Nimahsela, Duhmanga chuan engmah ti thei lovin a hmangaih chu a sun a, tha han chhuah leh reng tur awm lovin a thamral ta a ni. Hmangaihna avanga vakvaia nunkawng bumboh tak zawhte hian an hringnun khawvel chu harsatna tawrhna namen lovin an vui liam a ni. Hmangaihna avangin chu kawng chu an thlang a, thlan khur thuk tak ang maia thim chhah ni mah se beiseina mei de lam chu an zawh ta zel a. A tawpah phei chuan chu mei de chuan eng chhuah lovin thlan khur thim lamah chuan a hnuk thleng ta zawk a ni.

Dialogue (inbiakna tawngkam):

                He lemchan thatna leh fak a phuna em em chu dialogue hi a ni. A ziaktu themthiamzia leh rilna kan hmu tel bawk a ni. Lemchan tha chu a hla thu hnap (poetic) mai a ni an ti thin. Hei hi he lemchan hian a phawk chhuak zo tha hle. Chan I-na, Lan II-na tawp lamah khan Dardini phunsep thu mawi tak mai “...Karei, ka thinlung chhung chu lawm leh mangang hlauthawngin a nui lungngai si a nih hi, a hmel chu duhthusam, a kimtlang lah sawiselbo.....a inngaihtlawmna chu thang a ni si.....aw thang duhawm, hmu reng chungin maimitchhingin ka dai per dawn che em ni?... Aw zan, chhun hlimthla.....ka ruang chu hahchawlhtir ta che, mahse muthilhna chu i hnawt tiau zo si maw.... A! ka zal na’nge ka zal na’nge.” tihte hi a hla thu hnap mai a. Shakespeare-a Hamlet thawnthute pawh min hriatchhuah tir thei hial a ni.

                He lemchan thawnthu-a inbiakna zawng zawng deuh thawah hian tawng dik a hmang a, hla thu atanga he lemchan hi duang chho a nih avangin a drama pawh hi a hla thu hnap reng a ni.  Chutih rual chuan mi nawlpui tan thu un leh hriatthiam har tur a awm zeuh zeuh thung. Lemchangtute (character) mizia remin inbiakna tawngkauchheh pawh hi a inhnerem hle bawk.

                Chan IV-na, Lan II-naa Duhmanga tawngkam “A! Buangpui, ka thinlung hliam sahal hian chaw a mamawh reng reng hleinem; chawte zawng a chang chuan thilsual than thahrui samtu chauh a ni asin. En teh u inkhua saw; pasaltha rammute hlawhtlinga an lo thlen lai ni si a va reh teh duk em!” Helai thu hi he lemchan thawnthu chhiar chuan awmze thui tak a nei tih kan hre mai awm e.

                A hunlai tur awm ang mil takin an tawngkauchheh pawh hi a inhmeh hle a. Chutih rual chuan a chhiartute thangthar an nih angin a thenlai deuh hi chu a un lek lek a ni. Chutih loah chuan inbiakna tawngkam hi chu tha tawk fang a ni.

Philosophy(a thluk phum):

                He lemchan atang hian zir chhuah tur chihnih awm theiin a lang a, chung thil pahnihte chu thil inperhsan daih mah nise i han chhui dawn teh ang.

                Pakhatnaah chuan Dardini khan Duhmanga zankhat lenna atanga mitmei a hmuh leh ualau taka a duhna a tihlan atang khan buaina chu a inmung chho tan tawh kan ti thei ang. A chhan chu a inleng tlangval dangte tilunghnur khawp hialin mitmei a hmuh avangin a inlengte pawh haw tauin, a hnu thleng pawn inleng a hnawng phah ta a nih kha. Duhmanga lal fapa leh pasaltha ni pah fawm chu nula tawh phawt chuan an iai loh a ni vek ang chu. Nimahsela, Dardini’n heti taka a duhna a tilang lutuk leh beiseiawm lutuk a mitmei an hmuh hi chuan a dinhmun thlirin an inkar buaina tur awm ang hi chu tu pawn an ngaihruat thei nghal vek a. Heng hunlai ang na na na phei hi chuan mi tha leh mi chhe inkar a zau hle a ni. Mahni dinhmun hriatchian leh kan dinhmun mila chet kha thil tih awm reng pawh a ni.

                Duhmanga kha chuan lo hmel duh ve viau mah se nula a nei tawh a, chu chu Saikii a ni. Dardini hi an inkara tlazep zawk chu a ni a. Saikii tawrhna lam atanga han chhui phei chuan demawm tak a nih theihna lai a awm a. Saikii lahin Duhmanga a then theih loh avangin dinhmun harsa tak karah loh theih lohin a inhamtang hram hram a. Dardini’n mak vawihnih a tawk ang tho hian Saikii pawh hian chu thil chu a tawk ve vek a ni. Chutah Duhmanga chuan a nupui ni chung khan a mutpui duh lova, mak vawihnih hial tawk tawh chu nula thianghlim a la ni si. Chu thil chu khang hunlai mipa-te khan hrethiam tak maw?

                Dardini khan a hnuah a pawizia a hria a, mahse hawilet leh tur chuan a kal thui tawh mah mah si a nih kha. Chutiang chiahin Duhmanga lahin bansan har a lo ti ve tawh tumhrang nen. Buaina inchingchivet kual chuan chhiatna lam a pan ta zel a, chu chhiatna chuan heng mite pahnih chauh niloah pawh a nghawng natzia chu he lemchan atang hian a chiang hle a ni. He lemchan hi a sir lehlama thlir chuan Dardini hian a kuang lo nawrin, chu a kuang nawr sual chuan thlan thimah a hnuk lut ta a ni tih pawhin chhui tham fe a tling awm e.

                Pahnihnaah thung chuan thlirna tarmit hran vuahin i han thlir leh dawn teh ang.  Heng chhiatna zawng zawngte hi pumpelh dan kawng hran a awm a chu chu heng mite inhmangaihna hi Duhmanga chhungte khan pawm ta mai se chuan an fapa an chan lo ang a. An khuain run an tawh tum pawh khan an heti em em lo mahna le. Chutiang bawkin Saikii dinhmun tichhetu pawh kha Duhmanga chhungte remruat dan dik lo kual a ni. Saikii khan an inthen kha chu a tuar em em a, mahsechu aia natna thlentu tur chu Duhmanga pasala a nei kha a ni. Nula man to tak leh ‘kei ka ni’ inti pha ve chin tur ni si khan a pasal chuan tawh pawh a tawk duh hauh lo a ni kha. Chutah a pasal chuan hmeichhe dang hruai hawin kawngka sul pelin a ma a, vawikhat mai ni lovin vawihnih lai mak a tawk ve bawk a ni.

                Heng chhiatna zawng hi a tir khan Duhmanga chhungte khan an fapa leh Dardini kha lo suihrem ta mai se tiang em em hi chu a thleng lo tur a ni ngai a. Nimahsela lal ropui ‘kei ka ni’ ti pha tan chuan hmeithai fa, mo-a han neih a, upa min fanu han hnawng ta mai chu a harsa ta ngiang a ni ang e. Mi tha leh mi chhia inkar tihzauh lutuk hi chuan a tawpah a nghawng si per tal tuartute kan ni leh nge nge thin. Hmangaihnaah chuan phu loh leh thiang lo a awm lo an lo tih thin avangin Duhmanga leh Dardini-te inhmangaihna pawh hi a demawm hran love.