Thu A Tawp E Lumam Lemchan Thawnthu Bichianna

Thu a tawp e lumam lemchan thawnthu hi K.Saibela ziak a ni a, Chantuan Ennawm Bu 1-naah Dr.Laltluangliana Khiangte hian lemchan thawnthu dang sawm lai nen a khung khawm a. K.Saibela ziak, Thu a tawp e lumam lemchan thawnthu hi Art & Culture Drama Competition Sub- Committee chuan intihsiakna tur lemchan an duh than an hmuh mai theih loh avangin K.Saibela chu ziak ve turin an ti ta ringawt mai a,  he lemchan thawnthu hi Committee Secretary Pu Laithanga M.A, B.T chuan ziak tura a ngen avanga lo piang ta a ni. Tragi- comedy huang chhungah khung niin, a ziaktu hian kum 1980 bawr vela a ziak a ni. A bua chhuah hmasak ber hi kum 2012 ah a ni a, Felfim Computer ah chhuin, LTL Publication, mission veng, Aizawl atanga chhuah a ni. A man zat hi cheng 120 niin, copy 1000 chhut a ni. A bu chhunga lemchan sawm leh pakhat awmte hi tawi te te vek an ni a, Thu a tawp e lumam lemchan thawnthu hian phek 115-138 inkar a awh.

A lemchan tawnthu hi a ziaktu K.Saibela ziah kum, kum 1980 bawr vela mihring lo langte pawh hi an la changkang lutuk bik lo hle tih a hrait theih a. Mizo chhungkaw nunphung tlangpui, a lema chan theih tura her rem (Dramatized) a ni. A changtu hi pahnih pawimawh em em an awm a, Ralliana len Zoduhawma te anni. Tin, he lemchan chhung hi lan 13 ah then a ni a, one act play a ni. Darkar khat chhunga zawh theih tura duan a ni. Thinrimna boruak leh hlim thlak inchawhpawlh, lan thenkhat chu thil tha lo entirna a ni thung. Chan a awlsam zawk theih nan tawgkam sei tak a hmang lova, a drama pum hi action leh inbiakna (dialogue) a inzat deuhthaw a ni.

A thawnthu tlangpui:

Lan khat naah Zoduhawma te chhungkua an lo lang a, chaw an ei hma chuan chhung inkhawmna te neiin an chhungkua an inpawh tlanga an hlimtlang hle tih a hriat theih a. Zoduhawma chu tlangval chho, thian ngaina rual a ni. A nu leh pa te pawhin kawm an phal em em loh Ralliana, Mamuana leh Mahminga te chu a thian tha ber ber te anni a. Khawi hmunah pawh kal a inzui chawt mai anni a. A thian pathumte chuan eng thil sual pawh lo ti se, an kiangah a awm ve reng a. mahse tih chakna leh tih duhna erawh a nei ve ngai lo thung. Inhlawhfa chawp a lehkha zir a ni a, a thiante neih ang pawh a nei zo ve thin lo, hei vang hian a thianten an hmuhsit chang pawh a tam. Inkhawmte, lehkhazir te leh a pa puih te chu a thulh ngai chuang lova, a thiante hian a awm loh tawh phawt chuan an rel reng mai bawk a. An thiante hmuhsitna chu hre reng mahsela a kalsan thei bik si lo a.

Ralliana hi a pa zara in lalian chawp ve mai a ni a, a pa lah hi mi chapo, fate leh inchhungkhur ngaihsak lo mi a ni. A thiante leh a thawhpui dangte pawh a thuhnuaia dah duh tlat mi niin a nupui takngial pawh kut thlak hreh lo, thinrimna zawng reng chi a ni bawk. An chhungkua hi an hlim lo hle mai a, sum chu ngahin nei teuh mahsela engmah hlimna tak tak an hmu chuang lo. An pa ber lah hi a fapa in a chhun fuh em em lehnghal a, sum a mamawh tawh chuan engmah tih hreh nei lo, pa te pawisa pawh ru mai duh thin a ni. A nu leh paten an enkawl dan a fuh tawh lo a, nu leh pa mai pawh nilovin aia upa zahna a tlachham hle mai. An chhungkua hian pawn lamah intihhlimna tur an zawng a, Pathian hnaih nachang erawh an hre silo.

An  thianho hi an inzui ngawrh hle mai a, mize inang lo tak vek anni a. Ralliana hian thian hmeichhhe pahnih khawlo zet mai a nei a, an hming chu Partei leh Ahmingi. Ruihtheihthil an duh tlang hlawm bawka an inkawmngeih fu mai lehnghal a. Zan lamah khawlaia chhuah an ching a, chu chu Zoduhawma nu leh pa te hian an duh lo hle a, mahse a thiante chu a thlah thei tak tak chuan lo a, tih ngaihna tak pawh an hre bik lo. Rei vak lo ah phei chuan Ralliana leh Partei te chu an lo innei ta hial a, Partei lah nula tlaw chi, lehkha pawh zir sang lo ani. A pasal Ralliana lah chute bawk, a nu leh pa te chuan an fapa nupui chu an duhpui lo hle a, an inneih zan atangin an in dang ta nghal a. Thawhchhuah engmah nei ta lo chu rethei takin hun an hmang a, inhlawhfa chawpin. A hmaa an lo hmusit em em thin Zoduhawma erawh chu an neih zawg zawng sengin phai lamah lehkha a zir a, rei tak a thangbo hnu chuan M.Sc chu tha takin a pass a. An khaw lamah a rawn haw hnu reiloteah chuan officer a ni ta der mai a, a let leh hnu chuan engkim chu a lo dang ta vek mai a, a thiante zawng zawng chu tumah reng hlawhtling taka zir chhuak an awm lo a. Partei lah Mamuana nen a rukin an lo inkawp reng a, a pasalin a hriat chhuah chuan a thinrim hle a, an inthen phah ta a.

Ralliana nupui Partei chuan fa a lo pai hman a, a in enkawltha bawk si lo nen tin a pai lai hian zu leh ruihtheihthil dang a tihpawlh nasat vang te pawh a ni ang an fa chu mi a ang pha lo a. An fapa Romama chu a pa in a enkawl a,  nupui dang nei leh in fa pali annei a, Romama nen panga chu a enkawl turin a ko ah chuan a tla a. Rethei takin an khawsa chho a. Heng zawg zawng hi Zoduhawma’n a hriat hnu chuan ensan a hnekin a khawngaiha an thawh theih awm tawk hna a zawn sak a, a hma a an lo hmuhsit thinna te chu a hre reng lova. Kristian chhungkuaa seilian a ni a, a hlawhtlin hnu pawhin Pathian thu chu a bansan chuang lo. Ralliana erawh hi chu a mize pangai kha a paih thei tawh meuh lo, eng anga harsa leh dinhmun hrehawmah pawh ding se a ngai reng a, a hnathawhnaah taihmak a chhuah chuang lo a, Zoduhawma chuan a hmuh chuan engmah theih a nei tawh lo, Thu a tawp e lumam tih hian a fun kim ber awm e.

Lemchangtu mizia te:

Ralliana: Thu a tawp e lumam tih lemchan thawnthua a hmingput chhan kan ti lo thei lovang. Ralliana hi chu tleirawllai pawh a awm tha duh lo, nu leh pa zah nachang pawh hre lo a ni. A pa hnathawhin a zir em avang chuan thiante erawh chu a nei thei viau a, heng hunlai phei hi chuan nu leh pa te hlawh nei tawh chu nula leh tlangval te hian an be tha thei fu a. A thatchhe em em a, a nu tirhna te chu zawm a hnekin a hnial fithla thak thak zel a, michhe fa chu hmusit a ching hle. Ruihtheihthil leh nula ngaina tak a ni ve a, kum a tlin hmain nupui pawh a nei ta reng a.

Zoduhawma: A ni hi chu tette atang tawh pawh a kohhran ngaina mi leh thuawih thei tak a ni a. Rethei tak atanga lehkha zir chho a ni a, an neih zawng zawng sengin a nu leh pate chuan an enkawl a, a zirlaiah an tawiawm tha hle a. A lo zir chhuah hnu pawh chuan Pathian a hre reng a, tawngtai leh Bible chhiar a thlahthlam ngai lo. Thian erawh a ngaina ve hle a, amah hmusit ngawih ngawih tute pawh chu a kawm tlat peih a, a hun thawl neih ang ang chu a thiante bulah a hmang ral thin. Lehkha zir hun leh inkhawm hunah chuan leng laklawh hle mahse a kalsan ve hmak hmak thung. Rethei takin a zirlaite chu a zir chhuak a, officer hial a nih hnu pawh chuan a thiante chu a hmusit mai lova, tanpui an ngaihna zawnah chuan a la puih fan fan thung.

Ralliana pa: Ralliana pa hi he lemchanah hian lang hnem lo mahse a mizia chu a tha lo hle tih a fapa mizia atang hian a hmuh thei a. chapo tak niin nupuite leh thiante chu a thu thu a dah duh mi a ni. Chhungkua a ngaihsak lo a, chutiangin a nupui leh fate pawh. In chhungkhura pa mawhphurhna chu engmah hlen chhuah a nei meuh lo, a thawh hlawh te chu zu leh sa ah a tlak ral a. A fapa a enkawl chhoh dan a tang reng hian pa tha tak chu a ni thei lo, tawngtai  leh inkhawm a ngaihsak lova an in chhung chu a uap lo hle a.

Lemchan ziaktu themthiamna te

Thu a tawp e lumam lemchan thawnthu hi a tha hle a, a lemchanah hian zir tur a tam hle mai a. That tawk lohna lai chu lo awm ve bawk mahsela tawite si kim taka a fun thei hi a themthiamna lai chu a ni. K.Saibela lemchan ziakah hian plot, character leh settings te a ngai pawimawh a, a ti ngaihnawm zual hle a ni. He lemchan thawnthu hi tragic- comedy huangah kan dah theih dan a awm a, a tawpah Zoduhawma chuan hlawhtlinna changin hun hmasa zawng chu rethei tak leh thiantena an hmuhsit reng rengin a khawsa a. A thianpa Ralliana chu a pa thlazar hnuaiah nun nuam takin a hmang a, a tawpah an khawsak dan a inthlak thleng chiah a, Zoduhawma chuan hlawhtinna chang mahse a thianpa erawh chi rethei takin a awm ta si,Ralliana tan chuan a lungchhiat thlak hle a, comedy hlang a ni lova, tragi- comedy huangah kan dah thei awm e.

He lemchan a that ve lehna em em chu a changtupa ber Zoduhawma hi tlangval fel leh tlawmngai, sakhaw ngaihsak mi, nu leh pate zah thiam tak, mi fel tak angin sawi mahse thawnthu dang ang lo takin thian sual kawm chu a thulh chuang lo. Khawtlang tana mi hnawksak, ruihtheihthil ngaina leh nula ngaina ve tak tak te chu a thian tha ber ber te chu anni tlat thung si. A mizia erawh a danglam phah chuang lova, lehkha zir hunah te chuan a kawm lo ve leh mai thin bawk a. Hei hian ‘thian sual kawm suh, I hruai that hmain an hruai sual ang che’ tih hi he lemchanah hi chuan a dik lo hle.

Mize chi hrang hrang an lo lang a,mahse mize chi hrang theuh an pu thung si, hei hian a thawnthu hi inkalh miah si lovin a ti ngaihnawm hle a. Phuba laktir lova a tawpa Zoduhawma’n a thianpa Ralliana a tanpuia a thawhtheihawm tawk an pafa tan hna a lo zawn sak atang te hian kristian chhungkua atanga seilian anih a pholang chiang hle. Lemchan thawnthu inzirtirn nei tha tak a ni, chhungkuaa Pathian thu awih pawihmawh dan te, kut hnathawh a pawimawhzia te, ruihtheihthil leh nulat tlangvalna lama insum loh that lohzia te, eiruk that lohzia te chu a tarlang a ni. Chuvangin affective play kan ti thei bawk ang.

A that tawk lohna lai:

Demerit lamah chuan Zoduhawma mifel takin a nu leh pa “ I mawl ve ngawt mai” a tih te, “nguar ang” ti a chhan te kha thil inhmeh tak chu a ni lo. Lan 1-naah hian “inngeih” tih tur niawm tak “inngaih” tiin a dah bawk. Lan 2-naah he mite thian dun tih torah “duh” tiin a ziak bawk a, lan 3-naah Riang tih torah “ring” a hmang bawk. Lan 4-naah Ralliana, a pain a nupui a kova Space direction-ah chuan ‘Nu a lo kal a….’ti hian a ziak a, ‘Nu’ ti ringawt lo deuh hian ziak tur niawm tak a ni. Chuan lan 6-naah Ralliana darthlalang hmaa a mawngbawr a en velte hi a mawi chiah lo mipa tan chuan. Lan 10-naah dam leh ruam khatah tiin a ziak a, ruam ni lovin ‘tlang khatah’ tih zawk awm tak a ni. A lemchangtu hi mi 26 aia tam lo a tih hi mi 28 lai a mamawh zawk a ni.

Title

He lamchan thawnthu ‘Thu a tawp e lumam’ hi a title leh a chhungthu te hi a inhmeh hle a. Rallian chu a tleirawl lai atang tawh pawha awm khawlo lak lawh, nu leh pa zilh ngai lohna chhungkua atanga seilian a ni. Harsatna hrang hrang, a vawr tawp a tawn hnu meuh pawha danglam thei lo mihring a ni. Zoduhawma tawngkam chhuak “Thu a tawp e lumam” tih hian a tichiang hle a, a inhmeh hliah hliah bawk.

Thu a tawp e lumam lemchan thawnthu leh Ramthanga te chhung lemchan thawnthu te hian in anna lai tam tak annei a, chu chu zu avanga buaina chhuak a tamzia a tarlang chiang hle mai. Ramthanga te chhung lemchanah chuan pa berin zu a heh lutuk avanga chhungkuain an tuar phahzia leh chhungkaw awhawm loh ber pawl an nihzia a lang a. Hlawh an lak tlaiah pawh mahni ina haw hmasa lovin hmeithai zu zuar inah zu in turin an liam ta zawk a, a hlawh lak a zahve aia tam chu zu manah a la pe zui a. Zu chuan a rilruah engmah pawisak lohna lian tak a vulh a, a hna ah an ban phah bawk a. A thawhpui officer lian tak tak te pawh zah zo lovin an inah zu a inkhum hmiah bawk. Hetiang deuh bawk hian Ralliana pa chu zuin a tibuai a, chhungkua a ngaihsak hman meuh tawh lo a. A fapa Ralliana pawh a naupan tet atanga zu a in thin avangin zah pah a nei tawh lo. Nupui tha lo tak mai kum a tlin hmain a nei a, rei pawh innei lovin an inthen a, fapa Romama mi ang zan lo annei hman a, a pa hian a enkawl a, an thianpa Zoduhawma chuan a theih tawpin a tanpui ve a, a sawt thei chuang lo, a nun ngaiah chuan a tang kumkhua ta mai a. Hemi thawnthu pahnih te hi a inzul ang bawkin a tilte pawh hi a inhmeh dun hliah hliah. An harsatna leh dinhmun tawn khirh tak chuan a tiharh zo chuang meuh lo a ni.