Sangi Inleng Lemchan Thlirna

Mizote hian thu ziak kan neihna hi la rei mah suh se,  literature lamah chuan kan thang duangin hma kan sawn chak viau lawi a, a lawmawm hle. Literature peng thenkhatah chuan hmasawnna  duhawm tak kan hmuh rualin lemchan thawnthu puitling chu kan la ngah tawk lo viau niin a lang a, uluk taka han chhiar pawhin kut zungtang thliah tham emaw lek chauh kan la nei hian hmasawn kan la ngai hle tih a tilang.

William Shakespeare-a’n, “Lemchan hi mihring mize dik tak tar lanna  darthlalang a ni”  a lo ti mathlawn lo va. Chuvangin, lemchan hi Literature  peng hrang hrang zingah chuan a pawimawh  ber pawl a ni hial awm e.

Mizo kut chhuak ngei lemchan puitling  kuttang thliah tham lek kan la neih zingah,  Lalthangfala Sailo irawm chhuak ‘Sangi Inleng’  lemchan hi a chhuanawm ber a nih loh pawhin a tha ber leh duhawm ber pawl a ni  ngei ang. Sangi Inleng lemchan hi Mizo irawm chhuak lemchan zingah chuan  khawla chhut chhuah hmasak ber a ni a, a thatna  mai piah lamah; he lemchan hian  hriat a hlawh a, a lar viau nghe nghe. Chutianga lemchan tha leh lar chu dimdawina tel miah lovin I han bihchiang / thlir dawn teh ang.

Sangi Inleng lemchan thawnthu ruangam chu hetiang hi a ni a:- Nupuite thu hnial ngam lo leh nupuite thuawi lama chawimawina  dawng tur ni se, chawimawina sang ber dawng tur  ‘Ngura’ leh;  pasalte thuhnuaia dah theih kawnga  nu duhthusam ‘Thangi’ te rila rah ‘Sangi’ chuan  a tlangval ngaihsan loh tak leh  a ngei em em ‘Hranga’ hnen atangin palai a hmu ta nawlh mai a.

Duh lohte nena se chhun khuangchawi ai chuan duh berte nena bahra khur laih thlang tlat, hmangaihna chelh tlattu ‘Sangi’  chuan a hmangaih Muana  a neih theih loh ai chuan sakei hliam insehtir  mai a duh a,  mahse thian rinawm, Mawii’n chanchin zawng zawng Muana hrilhin,  Sangi chu a chhan hman ta a nih kha.  Hmangaihna palzuttu nupa chuan an tihsual hriain, Ngura meuh pawhin an chungah malsawmna hlanin, ‘Muana, Sangi hi tuna tang chuan I ta a ni ta e, Pathian Chungnungbera chuan malsawm che u rawh se” a ti  ta hial a ni.

Sangi Inleng lemchan, phek 68-a chhah, kum 1969-a chhuah, a man cheng  80, Mizo irawm chhuak lemchan puitling,  khawla chhut chhuah hmasak ber hi a ngaihnawmin  Mizo lemchan zingah chuan a chhuanawm ber pawl a ni ngei mai.  Mahse famkim lohna khawvela cheng kan nih miau avangin he  lemchan pawh hi a tha famkim bik lo tih chu kan chhiar hian kan hria ang a, chik lehzuala kan thlir phei chuan  sawisel bo a nih bik lohzia kan hmu ngei ang, famkim lohna khawvel a ni miau a lawm le. He lemchan ngei pawh hi kan thlir chian dawn avangin a thatna lam aiin a that lohna lam hian bul han tan hmasa i la.

He lemchan thawnthu hi ngun taka kan chhiar chuan tragedy ruangam pu,  tragedy tluantlinga chhuah tak si loh a ni tih kan hmu thei. Hei hi a ziaktu pawhin a pha lo va,  a lemchan hmahruaiah kan hmu bawk.  Hei hian he lemchan nih tur ang hi a nihtir phak lo va,  a uiawm em em a ni. Tragedy ruangam pu a nih ang chiah hian tragedy tluangtling hi han ni mai the se la chuan,  a that dawn vei nen. He lemchan hi uluk

                                                                                                                                        2

taka kan chhiar chuan kan rilru a hah a, chu rilru hah min chhawk dam deuhtu tur a awm miah lo hian a hlut tur angin a tihlu lo va, a pawi hle.

He lemchanah hian inkhawm chungchang a lang zauh zauh a, Sangi chu nula fel  leh rinawm tih takah a inkhawm thin tih kan hria a, a inkhawm chiah loh pawhin a tum tal chu a tum a ni.  Mahse, a nu leh pate erawh chu an inkhawm ngai miah lo tih kan hmu thei a,  Sangi inkhawm tur pawh an thulhtir hial a ni. ( p.14)

Mizo upain, “ Sunhlu kungah thei dang a rah ngai lo” an lo ti mathlawn lo va,  nu leh pa inkhawm ngai hauh si lovin fanu nula,  inkhawm taima leh fel tak an nei mai hi a mak viau.  “Sunhlu kungah thei dang a rah pawh a ni ang a, ani chu ‘Nula Rinawm Sangi’ a ni miau a lawm le.

Sangi,  nula fel tak hian mi zingah a felna leh a ngaihsanawmna a hralh deuh lo maw? Sangi’n Hranga a sawina, “ Awi Phung” tih te,  “Phung, Chawm, Ramhuai”  han tih maite hi nula fel leh ngaihsanawm tak ka atanga chhuakah chuan a sitawm lu deuh.

Khawvel huapa lemchan ziah kawnga hming chher tak tak ten an ngaih pawimawh em em thin chu – mi tin a huap zo em?  Hringnun a phawk chhuak thain  hringnun hlimthla a tar lang chiang em? tih hi a ni. Chutiang chu he lemchan hian a phawk zo lo deuh niin a lang.  A lemchan thawnthu mai piah lamah  fin-thu-ril a pai em em lo tih he lemchan kan chhiar chuan kan hmu thei bawk awm e.

Tin, mihring nunphung  tar lang an ngai pawimawhin a tuar turin an tuar em,  an phu tawk an hmu em tih hi mi thiamte chuan an ngai pawimawh em em bawk. He lemchanah hian a fanu duh lo chung chung tir luitu, a kaikuang ber chu Thangi hi a ni a. Hei hian a tawrhna thu engmah kan hmu lo va, a zia lo deuh. Chu mai bakah, nasa taka Sangi ertu leh reltu Hliri zit zet pawh hian Muana a chang ta lo tih  bak hi a tuarna kan hmu lo va, a uiawm hle. He lemchan tha takah hian Dramatic Justice a awm lo a tih theih hial awm a.

He lemchana thil mak tak mai lo lang chu – man inhlan dan hi a ni. Mizo inneihna kawngah chuan Man Inhlan chu an ngai pawimawh hle thin a, chhungkhat laina, man eitute an kim hram hram thin.  Mahse, he lemchanah hi chuan chutiang a ni lo va,  holam takin Man an inhlan a, hei hian a tithawnthuin, a tak a an loh zual phah a tih theih awm e.

Tin, phek 55-naah, Ngura’n Sangi man Bela hnen atanga a lak khan, “Sangi man chu a zavaiin cheng zathum leh thutphah,  inneih niin cheng sawmhnih tih loh chu pek vek a ni”  a ti a. Mizo hmeichhe man hi cheng zali leh thutphah, cheng sawmhnih a ni thin si a. Hei hi a ziaktu hian a tisual liau liau niin a lang .

Tin, inneih nia inneih lawmna tura an ran talh reng hi a tam mai.  Hranga ten sial, bawng leh vawk an talh a,  Sangite lamin bawng leh vawk an talh bawk. Han ngaihtuah chian chuan – sial pakhat, bawng pahnih leh vawk pahnih; a sa han tam turzia mai chu!!! Vawksa hi chawhmehah, bawngsa hi chawah, sialsa hi chi, hmarcha, antam leh aieng  ilo velah an hmang dawn a ni ang e. Lemchan ziaktu hian  a ti lutuk deuh a nih hmel.

                                                                                                                                        3

Chan I-na, Lan khatnaah,  Phek 10-naa Sangi mangang tawgkam “Muana lah hian heti taka Hranga min tih avang hian min en dan hi a dang  lek lek thin a…” tih hi a indaikhalh nak mai.  “Heti taka Hranga’n…” tih hian tan se a dik hmel zawk. “Dang lek lek” tih aiah hian “Tidanglam” tih hi a rem hmel zawk bawk. Phek 18-naa, Tun atanga chawlhni kar thum hnu lamah, amaherawhchu ni se,”  tihah pawh hian dah hmasak loh tur a dah hmasa a nih a rinawm. Hranga tawngkauchheh, “…chaw kan in lamah ei dun I la…” tih pawh hi a thu kalhmang hi a  buai deuh bawk a, “…kan in lamah chaw…’  tih  a chakawm.  Sangi lehkhathawna, “…ka rilru tuma hnenah ka pe lo va…” tihah pawh hian, “…tu hnenah mah…” tih hi a dik zawk hmel. Mahse inbiakna tawngkam pangngaiah chuan ‘tu ma hnenah’ tih hi a ri ve fo bawk.

He lemchan ziaktu hian a lemchan thawnthu hmingah hian ‘Sangi Inleng’ tih a  hmang a. Sangi inleng chu Hranga a ni a, Hranga lemchan emaw, Hranga emaw tihna a nih ber chu. Mahse a bu chhunga a thupui ber erawh chu  Sangi’n a hmangaih Muana tana a rinawmna  a ni hlauh thung. He lemchana buaina siamtu ber leh misual nia lang, Hranga hming chawia he lemchan hming a kal daih mai hi a mak danglam hle a. He lemchan bu hming atana thlang tur chuan Hranga hi chu protagonist a tling zo bawk si lo. He  lai hi chu a felhlel deuh awm mang e.

Zokhaw nun, Mizo chhungkaw nunphung leh  nupui pasal inneih chungchanga  palaite thil tih dan, thian inkawm ngeih tak inkara  thil awm, nu tam tak ten an fanute tana an mi duhzawng an beihpui dante a ziak awm tawk viau a. Mizo kut chhuak ngei lemchan thawnthu  chhuanawm tak leh tha tak ‘Sangi Inleng’, Lalthangfala Sailo-in a lo ziak hi literature peng hrang zinga lemchan tihlu zualtu leh tihausatu pawimawh tak pakhat a tling a ni.