Mizo Folk Narrative leh Thu leh Hla

          Hnam tin hian rochun thawnthu kan nei theuh a, chutiang bawkin Mizo te pawh hnam la upa lo tak nimah ila,kan thawnthu te hi  hawrawp kan neih hma atang tawha tawngka a inhlanchhawng thin kan nia.Heng kan thawnthu te hian kan thu leh hla(literature) bul tanna leh tihausa tu a ni bawk.                

Folk-narrative chu hnam thawnthu,hmanlai atanga tawngka hmang a kan lo inhlan chhawn,kan hnam nun leh zia rang keng tel thawnthu hi a ni a.Folk-narrative huangah hian thil bul thawnthu(myth) kan tih te,mi huaisen  ropui te chanchin (legend) kan tih te hi an ni awm e.

Pi pute khan ziak leh chhiar tham lo mah se an awmkhawmna hmun zawlbukah te,puipunnaah te,tualmeichhemnaah te,nu leh paten an fate an mut dawn a an hrilh tam tak kan nei bawk. Chungte chu ziakin dah lo mah se tun thlengin an inhrilh chhawnna avangin kan lo hriat theih phah a ni. A pawimawhna leh kan thu leh hla a tih hausak dan langsar zual deuh te kan thawnthu behchhanin kan sawi dawn a ni.

           

1.Hla rawn chhuahna a ni :

A tir atang rengin Mizote hi zai ngaina hnam kan ni a,chu chu hnam dangte pawhin min hriat dan a ni. Mi pahnih aia tam kan awmkhawm tawh chuan zai tum mai zel hnam kan ni a, hei hian zai kan ngainanat zia pawh a tilang chiang hle awm e.                                                              

Kan hla hlui tam tak hi thawnthu ngaihnawm tak tak a nih rualin thawnthu tam takah hian hla tha tak tak kan hmu bawk a ni.Kan thawnthu tam takah hian an lunglenna leh an tawrhna te hla hmanga an inpuanna leh an inchhanna te a ni hlawm a. Heng an hla atang hian kan hla hlui kan hriatna leh vawn thatna tha tak a ni.

                    

Dardini leh Duhmanga thawnthua Dardini lungleng chu ti hian hla in a au chhuah pui a –

Duhmang kawlah ram hrang ngai ngai,

                                  A rawl tam pei maw ni linah,

                                  A zun chil le dairial kua lang

tih te leh hla dang tam tak kan hmu bawk.               

Dungtlang lal fanu Lianchhiari leh Chawngfianga inkara hmangaihna par chhuak tur palai rinawm lohna avanga Lianchiari lunglen hla tam tak te hian kan hla hlui ropuina leh hlutna min hriattir a.

Sailo lal Lalsavunga fanu Laltherin a bialpa Chalthanga a sunna hla tam tak te hi an thawnthu atanga kan hriat leh an hla atanga kan hriat te an nia. Heng an hla te hi kan thu leh hla ti hausa tu an ni chiang hle.

Heng bakah hian Chawngvungi leh Sawngkhara thawnthua hla tam tak kan hmu a,Darthiangi leh Chertuala thawnthu a hla kan hmuh te,Fiara leh Dari thawnthu kan hmuh te leh hla dang tam tak te hian kan thu leh hla a ti hausa a,kan hla hlui hriatna leh vawnhimna kawngah pawh an tangkai hle.

2.Pi pute nunphung kan hriatna :

Kan thawnthu atang hian kan pi pute nunphung leh khaw sak dan a hriat theih a. Chutiang chiah chuan pi pute thawnthu kan neih te hian a khawsak phung te, an duh leh ngainat zawng te min hrilh a. An nunphung leh an khawsak dan te,an khawtlang inawp dan te, an ngaihsan leh ngaihhlut zawng chenin an khawvel kan hriat theih phah a ni.

Heng kan pi pute nun leh khawsak phung kan  hriat atang hian kan thu leh hla kal hmang nasa takin hma min sial sak a. Hetiang kan thawnthu mil hian kan thu leh hla te hi a chhuak mek zel bawk. Thiltha inzirtirna kawngah pawh kan pi pute thawnthu kal pui dan zuiin kan la kal zel bawk.

Pi pute thawnthu atang hian lo neia khawsa thin an nih zia te, Lal te an ropui zia leh thil an tih theih zia te, hnamchawm dimhmun leh fahrah dinhmun te, khua leh khua indo a, inrun thin an nih zia chhiang takin kan hmu thei a.

Michak leh huaisen , pasaltha te dinhmun chu khawtlangah a pawimawh ber  a nih zia leh mipa tam tak chak a nih zia te, tlawmngaihna an ngaih pawimawh zia Vanapa te, Taitesena te, Chawngbawlate leh midang chanchin atang kan hre thei a ni. Heng kan thawnthu atang hian kan tunlai thu leh hlaah pawh hmun ala luah reng a, thu leh hla tha tak tak a piang chhuah phah a ni.

3.Tawng vawn thatna a ni :

Pi pute thawnthu kha tawng vawn thatna pawimawh tak a ni bawk .  Khawvel changkannain min chim cho zel a, chutiang zelin kan tawng pawh a danglam zel a. Kan tawng upa leh tawng hlui tam tak  chu hman chu sawi loh , kan hriatthiamloh tam tak a awm ta. Kan thawnthu atang hian tawng hlui leh un te, an hman dan te, a lo chhuah dante kan hriat phah a, chu chuan kan thu leh hla nasa takin a ti hausa a ni. 

Kan thawnthu hlui tam tak atang hian tawng dik zawk kan hriat theih phah a, kan tawng hlui boral mai tur chu a hum him a ni. Raldawna leh Tumchhingi thawnthua Raldawnan a nu hnena vani an rah hmin sen anga hmeltha nula an awm leh awm lo a zawh atang te hian hmanlai nula hmeltha tehkhinna sawifiahna atana vani rah sen an lo hman thin te kan hre thei a ni . Heng thawnthu a awmchhung chuan kan tawng dik leh hlu tak tak hi vawn nun leh hriat reng a hlawh ang.

4.Literature thar min siam :

Kan thawnthu hlui te hi thu leh hla thar hringtu pawi mawh tak an ni bawk. Tawnthu chuah thar (fiction) te, hla leh lemchan (drama) huangah te thu leh hla tihausatu pawimawh tak a ni. 

Liandova te unanu lemchan thawnthu te, Darlalpuii lemchan tawnthu te, Pasaltha Khuangchera lemchan thawnthu te, Thawmvunga lemchan thawnthu te leh lemchan thawnthu thenkhat kan lo neih theih chhan chu heng kan thawnthu hlui te atang hian a ni. Kan thawnthu hlui tha tak tak behchhanin lemchan (drama) ziak mi ten an rawn ziak chhuak thin a ni.

Hla lamah pawh kan thawnthu tam tak beh chhan hian tha tak tak a chhuak bawk a . Lianchhiari tawnthu atangin nula leh tlangval inhmangaina hla tha tak a chhuah theih phah a. Khawnglungrun thawnthu atangin hla tha tak leh lungrun tak pawh a chhuak theih phah bawk a,a vai a kan sawi dawn chuan kan sawi seng awm love.

Tin , kan novel leh short story chhuak thar ngaihnawm tak tak te hi  kan thawnthu hlui tam tak behchhana ziah an ni bawk a ni.

Heng kan sawi bakah hian kawng hrang hrangin kan thawnthu hluite hian kan thu leh hla hi nasa takin a ti hausak dan a awm thei a kan sawi kim vek seng lo a ni.

Khawvelah thurochhun hrang hrangte  han thlir kualin Mizote thurochun hi a nep bik lo mai ni lovin a chhuanawn em em zawk a . Hmanlai kan pi leh pute kha hnam mawl tak anga sawi thin an ni a, mahse,kan thurochunte uluk taka han chhui chuan an lo mawl lohzia leh khawtlanga nunhona kawngah pawh an lo ngaihtuah kim zia a hriat theiha, thufing, fing tak tak te, a nihna anga lang thei mai baka zirchian dawl tak tak an lo phuahchhuak teuh mai thei te kha , hmanlai pi leh pute thlah Mizo nih a tinuamin kan thu leh hla tihausa tu a ni chiang hle.

         

                                                                                                                Lehkhabu rawnte :

1.    Thanmawia RL               -  Mizo Hnahthlak Thawnthu, Volume I & II ,    Din Din Heaven  Publication , Ramhlun South, Aizawl- 2009, 2010

2.    Zofa Lalhmachhuan      - Mizo Thawnthu Vol-I, 6^th Edition,Zofa Run, Electric Veng-2010

3.    Thanmawia RL               - Mizo Hla hlui,Din DinHeaven Publication,Ramhlun South, Aizawl-2012

4.    MBSE                             - Mizo,Class XII zirlaibu, Samaritan Printer, Mission Veng- 2012

5.    Tribal Research Institute- Pasaltha te Chanchin, 2007