Mizo Thawnthu Thlirzauna

Mizote hi hnam upa lo ang a sawi kan ni a,amaherawhchu kan thu rochun neihte,kan thuhlaril te,kan rochun thawnthute chiang taka kan chhui chuan a zahpuiawm lutuk bik lo. Kan rochun thawnthu te hi hnamdangte thawnthu nen a khaikhin pawhin a danglam bikna lai tam tak kan hmu thei awm e. kan pi leh pute khan ziak leh chhiar hi an thiam har hle mai a,kum 1894 a sap Upa leh Pu Buanga ten Mizote ziak leh chhiar “a,aw,b” min siamsak hma atang daih tawh pawh khan tawngkain leh beng a hriatna in an lo inhlanchhawng nasa ve hle a.

Kan pi leh pute khan an tu leh fate awm nan,an mutthilh theihna tura thawnthu an lo hrilh leh inhlanchhawnna atangte pawhin a lo darh chho ve deuh deuh  a. Chu mai nilovin Zawlbuk a tlangval te titi leh thawnthu sawite chu a riral mai mai lovin tun hun thleng pawhin a la nung reng a.Ziak leh chhiar te neiin,kan kutziak ngei a dahthat,duh hun huna chhiar theihin a lo awm ve tawh a. Heng kan rochun thawnthu te mai pawh nilovin kan thu leh hla rochun,thuhlaril te chenin belhchian a dawl em em vek mai a.

Heng kan hnam rochun thawnthuahte hian pasaltha dinhmunte,hmeithai an nek chep dante,nula leh tlangvalte inhmangaihna rilziate,Mizo khawtlang nun a mipate dinhmun pawimawhziate,ramsa thawnthute,arsi thawnthu leh thilhmingthang dang chi hrang hrang tam tak kan hmu thei a. Heng rochun thawnthute hian kan Mizo nunah hmanlai hun chauh pawh nilovin thangtharte thleng pawhin nghawng a nei thui hle a.

 Kan rochun thawnthute hi a vaiin chhuiin zirchiang vek seng lo mah ila,a tlangpui lo thlur chhuak tai la:-

1. Nula leh Tlangvalte Inhmangaihna:- Chalthanga te thawnthu atanga lang chiang em em mai chu Laltheri chuan hnamchawm tlangval Chalthanga a hmangaih tlat a,an tuar nasa dun hle a. Chalthanga phei chuan a thih phah ta hial a. Chutiang deuh bawk chuan Lianchhiari leh Chawngfianga te thawnthuah pawh hian kan hmu a,induhtawnin,inhmangaih tawn hle mahsela an pahnih inkarah chuan buaina hrang hrang a lo chhuak a. Chhungte pawn neih remti vek mahse a khua leh tuite chuan Lal fanu tan Chawngfianga chu an duh thei thlawt silo a,an inthen phah ta a.  Heta lo lang chu rinawmnate,inpumpeknate, dawhtheihnate,tawrhnate,hrehawm zawng zawng  zawng pawh tawrh huamin nula leh tlangvalte chu an inhmangaih a,thih thleng pawhin an lo rinawm thin a ni tih chiag takin a lang a.Heng rochun thawnthu kan neih atangte hian Mizote khawtlang nun a hmangaihnain thil a tihtheihzia leh hmangaihna avanga an tawrhna te a pho lang chiang hle a.

2.Pasalthate Dinhmun:- Pasalthate dinhmun kan rochun thawnthuah hian chiang takin a lang a. Pasaltha Khuangchera te,Chawngbawla te,Taitesena te, Vanapa te thawnthu atangte pawh a lang chu Pasalthate dinhmun thatzia leh an khawtlangin an thlamuanpui thinzia chu a lang chiang hle a. Nunau chak lo, tar leh upa,nula te thleng mai chuan an ngaisang a. An mawhphurhna pawh a sang viau a,ral leh hlauhawm,ramsa leh inrun te thleng thut thut thei a nih avang chuan khawtlang tan an pawimawh hle a. Ramah sa te kapin emaw thlaihnahte pawh nise  an duhsakzia lantir nan an hlui  thin a,mite duhsakna an dawng nasa ve hle a. An pawimawhzia a lanchian leh em em na pakhat chu hmelmaten  beih thut dawn se an khuaah chuan pasalthate awmlai a ni em tiin an thlithlai hmasa ziah thin a,pasaltha te ramchhuahlai a nih chuan an bei ta thin a. Milu la hnam kan nih avangin lu lak tam chu an inelna pakhat a ni a, pasalthate chuan an khua leh tuite venhim chu an hna pakhat a ni.

3.Ramsa leh Mihringte Inneih Pawlhna:-Mizo rochun thawnthuah hian ramsa hlang thawnthute,mihring leh ramsate inpawlhnate a tam hle a. Ramsate hmanga mihringte nunphung an pho lang thiam hi a ropuina pakhat chu a ni a. Mizote thawnthuah hian pahnih chu kan hmu thei a,Chawngchilhi thawnthu leh Nula leh Zawng thawnthuahte hian. Chawngchilhi te ah chuan rul a ngaizawng a,a fa apai a,a hrinsak nge nge a. Tiang deuh bawk hian Nula leh Zawng thawnthuah pawh Zawng hian Nula chu a ngaizawng a,a nei lui a. Nula chuan fa a hrinsak ve leh a. Indonesia thawnthu nen kan khaikhin chuan a danglam nasa bik hle mai a. Indonesia thawnthuah chuan ramsa leh mihringte an inneih pawlh reng rengin mihringfa an hrintir ziah thin a,hei hi a danglamna a ni. Tun hun nen a kan khaikhin phei chuan heng kan rochun thawnthute hi an hlu zual a,awihawm loh si mahse a tak ang tak a phuah an thiam hle a ni.

4.Supernatural:- Thil awihawm loh leh nithei tur pawh a kan ruat loh tam tak rochun thawnthu kan nei a. Heng rochun thawnthu danglam bikna em em chu mihringten kantih theih hauh loh tur leh kan suangtuah phak loh chu a tak angah an chantir thiam a. Mipa lo langte reng reng chu an chak bikin an huaisen bik a, miten an chung en larh thin. Mualzavata pawh hi michak leh thiltithei,mite aia chungnung bik niin nikhat chhunglekin mualza a vah theih avang chuan Mualzavata an lo ti hial a,a tuanranna hi a ropuina em emna pakhat chu a ni. Chemtatrawta,Chepahakhata,Kawrdumbela te thawnthuahte pawh hian a lang chiang hle a. Kan Mizo rilru  nen pawh a lo inzul hle a,an rin dan leh an duhthusamte chu an tu leh fate hnen a hlan chhawng zelin rochun thawnthu tha tak a lo ni ta a ni.

5.Hmeichhe Hmingchawi Thawnthu:- Hmanlai Mizote nunah hmeichhiate an pawimawh hle a. An hmingchawi a thawnthu phuah pawh tam tak hmuh tur a awm a,heng thawnthu Chawngtinlerhi,Kelchawngi,Mauruangi,Rimenhawii leh a dang tam takahte pawh kan hmu thei awm e. Chawntinlerhi thawnthuah ngat phei chuan a dinhmun chungnunzia a lang chiang thawkhat hle mai a. Tan kham Lalpa’n nupui atan a it em avang chuan an innei ta a,an inneih hnuah phei chuan Tan khua,ram ngaw dur tha tak mai a an Lalnu a lo ni ta a.  Sa chitin tualchaina hmun,nungchate tuallenna an lo tih huai huai thin ramah chuan thuneihna sang tak mai a pasal Tan khaw Lalpa Lalchungnunga chuan a pe a, a dinhmun hi a tha hle a,ramsate chu a thuhnuaiah chuan a dah ta vek mai a. Heta chiang ta mai a lo lang chu hmeichhiate hi kan duai bik lo hle a,ramsate leh nungchate chung a leng hialte pawh kan lo ni thei tih he rochun thawnthu hian a tilang chiang em em a ni.

6.Mipate Hmingchawi Thawnthu:- Mizo rochun thawnthuahte hian mipa te hmingchawi thawnthu hi a lang nasa hle mai a. Aihniara te,Buizova te,Lianchia te, Pawngvina te thawnthu atang pawh hian kan hmu thei awm e.A ber kai chin te anni hlawm a,an lan tawhnaah chuan a tha ber emaw a hmingthang ber emaw dinhmun an hauh ziah a. Mipate hi hmanlai Mizote nunah  an dinhmun a pawimawh hle a,an inhlanchhawn thawnthuah pawh hian mipate chungnunna leh sapel theite,ramvachalte,pasalthate dinhmun pawimawhnate chu an tu leh an fate tana an inhlanchhawn zel naah pawh antelh chho ta zel a. Rochun thawnthuah pawh kan neih tam pawl a ni hial mai a.

7.Ramsate Thawnthu:- Ramsate hian pawimawhna tam tak kan pi leh pute thinlungah khan a nei a,mipate tan ramchhuah leh sa chan chu an tih tur tul ber pakhat a ni a,sa hlauhawm lakah pawh an lo inveng nasa ve thei hle a. Hei vang hian rochun thawnthuah pawh ramsate chanchin a tam hle mai a,kan hmuh theih tlem han tarlang ila:Pu vawma tui,ui leh kel,vawkpui leh uipui, sakei leh zukchal tih leh a dangahte pawh kan hmu nual a. An hun tawn mekah ramsate hian hmun pawimawh tak an luah reng zel a ni tih a lang chiang a,Pathian thilsiam mawi tak tak te hi kan pipu te khan an hmuh hmaih bik hauh lova,an thawnthu inhlanchhawn zelah pawh an lo telh ve zel zawk a.

8. Khawvel Dang(Metaphisial world):- Kan rochun thawnthua thil danglam em em mai lo lang chu khawvel dang daih,arsi te,tlangte,luite,pangpar leh hmun ropui takte,boruakte,thihhnu thlarau kalna turte,kutte,sakhaw tobul te a ni a. Heng atang ringawt pawh hian kan rochun thawnthu ropuizia a lang chiang em em mai a,nitin a kan hmuh thei leh beng a kan hriat theih tam zawkte hi Pathian thilsiamte anni a,an mawinate,an duhawmnate,mihringnun a tihhlim theih dan zawng zawngte chu thiam takin an lo inhlanchhawng a,tin,kan thihhnuah kan thlarau hi khawiah nge a kal a nga,eng lam kawng nge a zawh dawn tih pawh ‘Pialral thawnthu’ ah a lang a. Kan pipute kha mawl lutuk angin mi tam takten an lo sawi thin a,mawlna laite pawh an nei nameuh mai mahse an ngaihtuahnate kha chu a fing leh em em thung si.

Mizote rochun thawnthu danglam bikna hrang hrangte kan chhui kual a,kim takin leh a pawimawhna zawng zawngte nen chhui kim vek pawh a har hle a. A chung a kan tarlan tak point hrang hrang atang ringawt pawh hian Mizote hi Thuhlaril khawvelah hian kan mikhual lo hle tih pawh a hriat theih awm e. Khawvel huap rochun thawnthute nen pawh han khaikhin ta ila Mizote rochun thawnthute hi a nep bik mai ni lovin a chhuanawm zawk em em a ni. Kan pi leh pute kha hnam mawl tak ang a sawi thin an ni a,mahse kan rochun thawnthute chik leh uluk lehzual a kan chhui chian chuan an lo mawl lohzia kha kan hmu thiam mai awm e. Tin,khawtlang nunhona kawngah pawh an lo ngaihtuah kimzia a hriat theih a,an khawsakho danahte chuan inlungrual tak leh inngeih tlang takin an khawsa tih an thawnthu leh an thu  inhlanchhawn zel danah a hriat theih a. Thufing tak tak,belhchian dawl tak mai a an han phuah chhuak thiam ringawt maite pawh khan kan hmanlai pi leh pute thlah Mizote nih a tinuam hle a ni. An ngaihtuahna fing tak te,thil awm thei lo tur thleng pawh a thiam tak mai a awm ang tak mai a an lo phhuah chhuak thiam te kha an chhuanawm hle a. Mizoten rochun thawnthu hi khawvel pum huap pawhin han thlir ila a duai lo hle a ni.

Lehkhabu rawnte:-

1.Zofa Lalhmachhuana  -Mizo Thawnthu,volume -1,6^th edition, Zofa Run Electric veng

2.Tribal Research Institute   -Pasaltha te Chanchin,2007

3. Thanmawia RL   -Mizo hnahthlak thawnthu(Thuanthu leh ramsa thawnthu),Din Din Heaven Publication,Ranhlun South,Aizawl,2009

4.Thanmawia RL   -Mizo hnahthalk thawnthu(Hmangaihna thawnthu)

5. MBSE    -Mizo Class XII zirlaibu, Samaritan Printer, Mission veng-2012