Mizo Legend Thlirzauna

Mizote hi hnam dang ang bawkin hmanlai a\angin thawnthu chi hrang hrang kan lo nei tawh a. Kan pi leh pute khan ziak leh chhiar an thiam hma, hawrawp kan neih hma a\ang tawhin \awngkaa inhlan chhawn hmangin thawnthu chi hrang hrang an lo nei tawh a ni. Chu thawnthu huangah chuan thil chi hrang hrang- thil bul in\anna thawnthu (myth) te, mi huaisen leh mi hratkhawkheng chanchin (legend) te leh rochun thawnthu (folktales) kan tih te hi khung theih an ni hlawm.

Mizote hian thawnthu kan neih \an hun hi hriat a har viau mai a. B.Lalthangliana chuan “Rûn lui kam an awm lai, 1350 AD vela chhuak \an niin dah ila a sual lutuk lovang” tiin a sawi a. Tin, thawnthu aiin hla hi kan nei hmasa niin a lang bawk.

Mihringte nunah thawnthu hian hmanlai a\anga hmun pawimawh tak a luah avangin Mizo khawtlang nunah pawh kan pi leh pute nun zia leh rin dan te, an suangtuahna leh an ngaihsan zawngte heng thawnthu a\ang hian kan hre thei a ni. Heng thawnthu chi hrang hrang zingah hian legend hi kan sawi zui dawn a ni.

Legend

Legend chu hmasang thawnthu; hnam chanchina innghat deuh leh phuah belh ni awma rin thil, ni thei leh ni thei chiah lo thil inpawlh thawnthu tiin a sawi fiah theih a. (Theory of Literature, p-151)

Legend tih hi Old French \awng ‘legenda’ tih a\anga lak a ni a, a awmzia chu ‘thil engemaw chanchin sawina’ tih na a ni. German mithiam Brother Grimm (or Die Bruder Grimm) chuan “Legend chu hmanlai thawnthu hlui, hnam chanchin hluia innghat hi a ni” tiin a sawi a.Timothy R.Tangherlini, hmanlai thawnthu lam zir mi chuan “Legend chu thawnthu tawi, hmanlai chanchin an inhrilh chhawn \hin thawnthu a ni a. An suangtuahna leh rindan te, an hun tawn tawh leh ngaihhlut te an pholanna thawnthu hi a ni” tiin a sawi ve bawk. (wikipedia) English Dictionary \henkhatah chuan hmanlai thawnthu hlui, hnam chanchina mi ropui leh thil ti theite chanchin tarlanna thawnthu tih pawhin an sawi bawk. Tin, legend huanga mite hi mi chungchuang leh an mahni zawna a ‘ber’ te an ni \hin a. Hei hian hmanlai mai ni lo, tunlai huna mi ropui leh mi hrat khawkhengte pawh a huam tel thei bawk niin Dr KC Vannghaka chuan a sawi bawk. (History of Mizo Literature, p-201).

Legend nihphung (natures of legend)

Legend hi myth kan tihte nena in hnaih tak an ni a, chuvangin hriat fiah awlsam nan a nihphung \henkhat lo tarlang ila:-

1)      Mi ropui leh mi hratkhawkheng te chanchin a ni.

2)      A thawnthu neitute nunphung leh rindan mila kal a ni.

3)      Hnam chanchin nena kal kawp anih avangin hmanlai chanchin (history) tam tak a hmuh theih.

4)      Legend huanga mite hi mi an nihna leh dinhmun \heuha mi aia chunglam te an ni.

5)      Thil ni thei chiah lo leh awihawm chiah lo thil te pawh a tel \hin bawk.

Legend leh Mizote

Mizo thawnthuah legend huanga khung theih thil tam tak kan hmu a. Kan thawnthu neih zawng zawng a\angin chhui vek thei lo mah ila, a tlanglawn leh lar zual a\ang pawh hian tam tak kan hmu thei ang.

Mi chak hmingthang Mualzavata te, mi huaisen leh hratkhawkheng Chhura thawnthu te, Lasi a zawl avanga \hangthar nun ning hial khawpa damrei |hasiama te, a hla phuah thiam avanga a nung chunga an phum hial Pi Hmuaki te, Hmangaihna avanga nunphung hloh hial Laltheri chanchin leh lunglen vanga fam ta Thangzawra te chanchin a\ang pawh hian Mizo te kan lo rindan leh ngaihdan lo nep bik loh zia te, an nunphung leh an suangtuahna khawvel zau takin kan hmu thei ang.

Heng thawnthu chi hang hrang a\ang hian Mizo legend hi chi li in a thliar theih anga, chungte chu kan chhui zui dawn a ni.

1.      Mi huaisen-Pasal\ha

Hmanlai Mizote hnam nunphunga mi pawimawh ber chu pasal\ha te hi ti ila kan sawi sual awm lo ve. Khua leh khua indo a, sa leh ral kara leng an ni a; chunga thlamuantu ber leh an innghahna chu pasal\ha te kha an ni. Hei vang hian kan thawnthu tam takah hian pasal\ha ngaihhlutna leh an dinhmun pawimawhna te, an ropuina leh an huaisenna tarlanna tam tak kan hmu a. Mizo legend kan neih zinga \hahnem ber chu pasal\ha huaisen te chanchin hi a ni awm e.

Chhura:- Kan thawnthu lar ber pawl- Chhura thawnthuah chuan hmalai an hlau leh \ih em em, ramhuai chi khat ang hial an ngaih Phungpuinu chu manin a chip samah a kek a, khuaa hawn tumin a sawngbawl a. Chu chu ngaingam lovin Sekibuhchhuak hmangin a intlan ta tih kan hmu a. Chhura huaisenna chuan hlawhtlinna a pe a, a finna leh remhriatna chu tuma phak loh anih zia chiang takin kan hmu.

Siamkima Khawlhring, thu leh hla thlitfim lama Zofate kawng min sah en saktu chuan Chhura hi Mizote nep bik loh zia leh kan hnam nunzia leh ngaihsan te, kan huaisenna leh kan finna phuakchhuaktu anih zia “Zalenna Ram” ah chuan ti hian a sawi-

“Heng thil pathum, huaisenna, tlawmngaihna leh a ngaihna hriatnate hi mihring nun tinuamtu leh tivengtu, mihring nih ti nuamtu, mihring tung chhova kal zawng zawngte hian kan ngaihsan (human values) te chu an ni a. Heng hi Chhura nuna awm vek a ni a, Chhura nun chu nun tam a ni” (Zalenna Ram, p-107)

tiin a sawi.

Pawthira:- Kungawrhi thawnthua amah chhanchhuaktu Pawthira hi pasal\ha huaisen leh ropui tak, thil ti thei tak a ni bawk. Kungawrhi chu Keimi tlangvalin nupuiah a nei a. A pasal chu Keimi a ni tih a pain a han hriat chuan a chhanchhuak apiang nupuiah neih tir a tiam a. Pawthira leh a \hian Hrangchala chuan an han um a, Kungawrhi chu Keimi hriat lovin lakchhuah an tum ta a. A nupui chu an hruai a ni tih a han hriat chuan Keimi chuan a han um a, Pawthira a han hmuh chuan mei chi te, tui chi te, lung chi te a theh a, mah se a lo um zel si a. A tawpah chuan Keimi (Sakei) chu a that ta a.

Kungawrhi chu lam\huamthumah an riahpui a, an inven chhawk a. Phung hovin an lo ti buai a, mah se Pawthira aw an hriat chuan mi huaisen ani tih anhria a, an hnaih ngam lova. Hrangchala’n a han ven ve chuan a hlau ta em em a, phung ho chuan Kungawrhi chu an hruai ta daih mai a. Pawthira’n a hriat chuan phung ho khaw thlengin an han um leh a, hlauhna nei miah lovin kawng hrang hrangin a han tih \haih a, atawpah chuan an lo pe ta a. An lawnchhona kawi hruiah chuan Pawthira lawn ve hmanin Hrangchala chuan a sat chat ta daih maia, han lawn kaina tur a awm ta lova, phung ho khuaah chuan rei tak a awm phah ta a. Tichuan, kawi tuhin a lo \hang lian zel a, a lawn chhuak a, Hrangchala chu a han that ta a ni.

Vanapa:- Pasal\ha huaisen leh tlawmngai Vanapa, Thangzachhinga chanchin hi tunlai hun thlenga kan la ngaihlut a ni. Mi thinchhe tak mai a\anga zaidam taka insiam\ha ta a ni a. A tlawmngaihna hian mi rethei leh hmeithaite khawngaihna a keng tel a, chan \ha pawh chang duh lovin a chhia leh mi duh loh zel a khawm a. An awmna khaw hrang hranga tlangval zah anih rualin, an lal te pawhin thu leh hla lak nan ber an hman a ni.

Vanapa hi a tleirawl chhuah hlim leh a tlangval deuh lai chuan a thin a chhe em em mai a. A tlawmngaihna leh huaisenna pawh chu a thinchhiatna chuan a khuhbo vek \hin. Mahse insiam\hat tumin a bei a, an khuate chuan an awi lo va, fiah an tum ta a. Vawi khat chu a thlangra tah lai chu Tlangval pakhat hian a la lawk a, a thlawh sak daih mai a, ani chuan “Diai diai a, ka chhar anga ka tah leh mai ang” tiin thinrim a hnekin a chhar a, a tah leh mai a. A tah zawh dawn \ep chuan tlangval pakhat lo kal lehin a chemin a sah chhiat sak leh ta vek mai a. Vanapa chuan aw zaidam takin, “Naktukah mau dang ka pu anga, ka tah leh mai ang” a ti leh a. A zaidam zia chu mi zawng zawng hriat a lo ni ta a ni.

Khuangchera:- Changsilh a\anga vai kapa a nun tawp thlenga Mizo hnam tana \ang ral Pasal\ha Khuangchera huaisenna hian kan hnam a ti ropui a, an mahni kap hlumtu Sap sipai lal meuh pawhina zah taka chibai a buk hial a ni. A huaisenna leh theihna a chapo pui ngai lova, mah se ral leh sakhawlh hmaah a tlanchhe ngai lo.

Vawi khat pawh a tleirawl chhuah hlimin Savawm hliam an um a. Savawm hliam chu p<kah a \ang ta tlat mai a. Tumah han luhchhuah ngam an awm si lo a, a tawpah chuan Khuangchera chuan a ning ta deuh a, “P<k chhungah khian ka han sat hlum law law ange” tih leh luh a rual ta mai a. Savawm hliam thinrim chuan rawn bei let nghalin, a chema a sah dawn lai tak chuan pawn lam a\ang chuan an lo kap hlum ta a. “Rawn kap ham lo ula chuan a hmui bung hmuaiin ka sat ang ka ti a nia” a lo ti heu mai a ni.

Neuva:- Mizo pasal\ha huaisen leh tuarchhela an sawi Neuva pawh hi a duai lo hle. A \awngkam \henkhatah pawh, “Tlum leh tlum inchenin chemteiin invit ila, kan khuaah hian kei aia thi har an awm lovang” a ti hial a, “Ka mit mu hi kher chhuak mah ula, ka la ti hlum thei tho ang che u” a la ti fan mai a a ni.

|um khat pawh a ke phahah pangang hling a vei a, a p^n so luk hnu pawh chuan na nei ang pawn a awm lova. A zual zel a, nakinah chuan a pan tlang ta hial a, a pan chu fanghmir leh khuangruah te hian an bawm a, an lut tlang mur mur mai a. Mah se ani chuan a hna thawh a \hulh chuang der lo va. Khawihlipui a vei lai pawhin tumahin an hre lova, amahin phulraw chhuat dapah a chilh tir a, a hnuaiah chuan a hnai leh thisen a far zung zung e an ti hial a. Chutiang khawpa huaisen leh tawrh chhel chu Sakei hliamin a ring ruh seh tliakin hliam na tak a tuar a, zawn pawh a duh lo va, chu a na tuar lovin a boral ta a ni.

Heng bakah hian pasal\ha huaisen leh tawrh chhel Taitesena te, silai hmang hauh lova sakei tam tak thattu Zampuimanga te, mahni pawha ral bei ngam Hranghleia te leh midang tam tak kan la nei a. Heng kan hnam tana pasal\ha te hi ropui leh huaisen, an thih ni thlenga duap kai ngai lo te an ni hlawm.

Tin, pi pute nuna hlauhawm leh \ihbaiawm ber tih hial theih, Ch^wmnu chu Tumchhingi leh Raldawna thawnthuah chuan chemin a fik hmawk tih kan hmu bawk a. Sichangneii thawnthuaah pawh Ch^wmnu chu Tlumtea’n a man bet a, a pawm nawl nawl a, lungpuiah a thluak per sawkin a keuh tih kan hmu bawk a. Heng a\ang pawh hian Zofate huaisen zia leh ropui zia kan hmu chiang hle.

2.      Thu leh Hla

Mizote hian engtik a\angin nge hla kan nei \an hriat chian theih a n lo na a, kan thawnthu hlui a\ang chuan hlaah kan mikhual lo hle. Hla hi thawnthu aiin kan neih hmasa zawk niin an sawi bawk a. Tin, hla phuah thiam tam takte leh an hla hian chanchin ngaihnawm tak tak an nei hlawm bawk a. Heng hian Mizo thawnthuah hmun pawimawh tak a luah bawk.

Pi Hmuaki chu hla a phuah reng mai a, a hla phuah thiam em avang chuan an khua mite chuan “\hangthar ten hla huah tur an nei ve dawn lo, Pi Hmuaki hi kan dah bo mai loh chuan” tiin a nungchungin an phum ta niin an sawi a. Amah phumtute pawh chu hlaa umzuii, “Nauvate u, nau haia te u, \ha te te khan min han chhilh rawh u” tiin ala chah hial a ni awm e. He thawnthu pipute thlang tlak hma, run leh \iau inkara an awm hunlai vel niin a lang a. Kan thawnthu neih hlui leh hla phuah lama kan thawnthu neih hmasa ber a ni hial awm e.

Buizova:- Hmanlai zaithiam em avanga hmingthang Buizova, Chawngtui hi Mizo thawnthua zai lama mi hmingthang a ni. A thawnthu a\ang hian kan hnam nuna hla kan ngaihpawimawh zia chiang takina a tarlang awm e. Buizova chu a han zai tawh chuan thli a rawn taw heuh heuh a, sunhlu hnah te hi a \il er er \hin niin an sawi a. A zai ngaihtlak chakin khawdang a\angtein an lo kal \hin hial niin an sawi bawk. Buizova hi zaithiam hle mah se a hmel a chhe em em a, hmelchhiatah pawh Mizo thawnthua a ber kai zing a mi ni a, chuti chung chuan zaithiam ber a ni tho a, mi ngaihhlut a ni reng tho a ni.

Laltheri:- Sailo lal Lalsavunga fanu Laltheri chanchin pawh hi zofate awm chhung chuan a dai tawhin a rinawm loh. Hnamchawm tlangval Chalthanga nen inngaizawngin a fa hial a lo pai a. Chu chu a unauten an hriatin an thinrim hle a; Chalthanga’n chung chu a han hriat ve chuan a hlau chu a tlan bo a, an han um zui a, an that ta a. Laltheri’n chu chu a han hriat chuan a silhfen inbelte chu pawt thlerin, mi a ang main a nun a hmang a. Chalthanga sun chuan hla phuahin a zai ta reng mai a. Hla \ha tak tak rawn piangin, a thinrim avanga a nu leh pa a \ah hauhna te chu “Hlingvawm zai” lo chhuahna niin, hla tam tak kan lo neih phah ta a ni. Laltheri zai tih te pawhin an sawi bawk \hin.

Saikuti:- Naupan tet a\anga hla phuah thiam, khawtlang nun hla hmanga deuhna (social satire) phuahtu hmasa Saikuti chanchin pawh hi kan hnam chanchin pawimawh tak a ni bawk. An khua, Thingsaia an awm laia an sahl^m siamah chuan milu an khai ngai si lo a, Saikuti chuan-

                        Ral in rele, kai lo Laln>ma te,

                        In zuah sual e, chhuahtlang thing lenbuang

                        In zuah sual e, chhuahtlang thing lenbuang

                        Chungl<m lian^k chhunrawl a vai e

a han ti chhuak pawp mai a, an khaw Lal leh tlangvalte chu an zak bawk si a, an lal tih loh chu thinrim ngam pawh an awm lo an ti hial a ni. Saikuti hian an hun tawn leh hmun a zirin hla a phuah thiam em em a. A tlachawpin hla a phuah zung zung mai \hin a, an khua ti hming\hatu ber a ni hial a ni.

Anni bakah hian Darpawngi te, Thailungi te, Chawngvungi te leh Lianchhiari te pawh hian thawnthu lungchhiat tak tak karah hla tam tak an phuah a. Mizo hla hlui pawimawh tak tak an ni hlawm a, chutih rualin thawnthu ngaihnawm tak tak keng tel a ni bawk.

3.      Hmangaihna

Kan thawnthu neih zinga a tam ber tih hial tur hi hmangaihna lam thawnthu a ni. Hengah hian thawnthu ngaihnawm leh lungkuai tak tak te a awm a; an hmangaih te tana an inpekna thuk zia te, sum leh pai avanga inneih leh in\hen chungchang te, mi chhia leh mi \ha inkar inthlauh zia te kan hmu thei a ni. Hmangaihna avanga an nun hial pawh chan huama an khawsak dan chanchin lungchhiat thlak leh ngaihnawm tak tak thawnthu kan nei a ni.

Tlingi leh Ngama:- Mizo thawnthua a nuipui a hmangaih luat avanga mithi khua tlenga han kal Tlingi leh Ngama chanchin hi hmngaihna thawnthua Mizote thawnthu pawimawh a ni. Hlim taka an inneih laiin tling chu a boral a, Ngama chu amah ngaiin a lungleng thei em em a. Tlingi thlanah chuan zamzo phunin, a par hnu chuan an lo thliak fo mai a. Chu chu man chhuah tumin Ngama chuan a chang ta a. Safe-tumburang nupa hian an lo thliak leh ngei a. Ngama chuan a han man a, anni chuan Tlingi tirh an nih thu an sawi chuan an hnena kal ve a  ngen ta a. Phal lo hle mahse a tihluih tlat avang chuan an han hruai ta a. Mithi khua an han thleng a, an nun phung chu a dang ta em em mai a. An sangha te chu hnah thel a ni a, an chhuah phahte chu telhawng mai a lo ni a. Ngama a han khawsak ve chuan mihring anih tlat avangin a tan chuan a ho em em mai zel a. A tawpah chuan Tlingi chuan mihring awmna lamah kir leh turin leh a tan thlai chhiah dah turin a ti ta a.

Ngama chu a han harh chhuah chuan a lung a leng em em mai a. Lo lamah kalin tlai thar \ha \ha chu a phur haw a, han dah na mai tur chu a hre si lo a. An tuium hunna velah chuan a dah ta mai a. Mahse a lung lenna chu a reh thei mai si lo a. A lungleng chu a han \ap rawi rawi a, a thi a, mithi khuaah chuan a han thleng leh a. Chutah chuan engkim mai chu mithi ho hmuh ang chuan a hmu ve thei ta a. Tlingi pawh chu a lo thau ta viau a, Ngama thlai chhiah chu an lo ei a, nuam takin an lo khawsa tih te a zu hria a. Hetia mithi tawhte tana thlai a dah avang hian hmanlai Mizote’n mithite tana thlai chhiah an lo chin phah ta a ni.

Duhmanga leh Dardini:- Lal ropui tak fapa Duhmanga leh hmeithai fanu Dardini inkara hmangaihna kawng bumboh tak mai hi Mizo thawnthua hmangaihna lungrun tak a ni. Duhmanga chu lal fapa anih avangina chhungte chuan nupui atan Saikii an duh sak a. Hun a lo kala Duhmanga chuan Dardini a han belhchian chuan a duh ta em em mai a, nupui atan hial a duh ta a. Mah se a nu leh pate chuan an duh tlat lova, Saikii chu duh lovin Dardini chu a nei lui ta tho a.

Hmanlai chuan ramchhuak reng an nih avangin Duhmanga chu a \hiante nen an ramchhuak fo va, chung hunah chuan Dardini chu a chhungte chuan an lo m^k sak \hin a. Saikii chu an lo neih sak \hin a. Mahse Duhmanga a lo hawn chuan Dardini bawk chu a han hruai leh mai zel a. Kawng hrang hranga an inkara an tlak hnu pawhin an induh a bang thei si lo a, atawpah chuan Dardini te nufa Duhmanga te ramchhuah hlanin chu an pem ta daih a.

Duhmanga rawn haw chuan a han hriat chuan engmah sawi lo chuan a zawng tur chuan a chhuak ta nghal a. An pemna khua a han thlen chuan a lo reh \hiap mai a, tleirawl pakhat a han zawh chuan Dardini chu raicheha a thih thu a lo hrilh a, Duhmanga chu a thi dang ta hial a. A lo harh leh chuan Dardini thlanah a han kal a, chutah chuan lunglenin a \ap nasa em em a, hmun dangah a kal sawn duh si lo a, a tawpah chuan a taksa a lo chau a. A hmangaih ber thlanah chuan Duhmanga chu amah ngaiin a thi ve ta nghal a ni.

Chawngmawii leh Hramngchhuana:- Mizo arsi hming kan nei leh kan hlut em em Chawngmawii leh Hrangchhuana te inkara hmangaihna hian tun thlengin Mizote thinlungah a riak reng a, van lama arsi a en chhung chuan a dai tawh ngai lovang.

Nula tlangval an nih laia khawkhat nula leh tlangval hmel\haa an sawi Chawngmawii leh Hrangchhuana te hi khaw hran, iunhlat vak lo an ni a. Mah se khua leh khua indo a, inveh reng an nih avangin an nun a ralmuang lo hle a. Hrangchhuana chu mifing tak anih avangin a rukin Chawngmawii te khuaah chuan a leng fova, a haw pah chuan naupang a ru haw fo bawk a. Chutianga a tih avang chuan Chawngmawii khuate chuan man chhuah tumin an bei a, mah se tlangval fing tak anih avangin an man thei mai lo va. Hrangchhuana chu a fimkhur lo tial tial a, a tawpah chuan an man chhuak ta a, Chawngmawii a rim \hin te pawh chu an han hre ta zel a. Tichuan an tihlum ta a, a lu chu an khaw kulh kawngka bula thinglerah an khai ta a.

Chawngmaii chuan a tuar em em a, mi hriat lovin Hrangchhuana lu chu a la thla a, a chhungte hnenah a han pe ta a. Chu thu chu Chawngmawii te khuain an hriat chuan an thin a rim ta em em a, Chawngmawii pawh chu an that ve ta nghal a. Chumi te pahnih in hmangaih em em te chu an thih hnu chuan arsi ah an chang dun ta a, arsi zingah pawh a eng mawi ber leh inhnaih tial tial a, insi riala indi \hin an lo ni ta hial a ni.

Heng bakah hian thawnthu tam tak, inhmangaihna avanga thih huam tuar ngam te, an hmangaihte tana rinawm tak awm te, an hmangaihte tana nun hlan hial te pawh tam tak sawi tur kan nei. Heng mi chungchuang leh ropuite chanchin ngaihnawm tak tak hian kan hnam thawnthu hi a ti hlu hle a ni.

4.      Mi ropui dangte

Mizo thawnthu kan neih leh hriat chinah te hian kawng hrang hrangin, a chhe zawng leh \ha zawng pawhin chanchin maksak leh ropui tak tak nei kan hmu nual bawk a. Heng mite hi kan hnam thawnthua hmujn pawimawh tak tak luahtute an ni.

Lianchia:- Hmel\ha hmingthang Lianchia Changte hi Farzawl khua a ni a. A naupan lai chuan a hmelchhiat em avangin a chhungte chuan \henrual kawm pawh an phal lo hial a, \hian kawm tur pawh a nei ngai meuh lo. A lo \hanglian zel a, a lo \hang \ha deuh deuh a, tlangval hmel\ha tak mai a lo ni ta a. A hmel\hat tak em avang chuan nula tam tak baka pawm lai nei te thleng thlengin an ngaihzawn a lo ni ta a. A muhil te hi a hmel hi a eng phet \hin niin an sawi hial a ni.

Pawngvina:- Mizo zinga thinchhe bera an sawi \hin chu Pawngvin a a ni a, a hming tak chu Pawngliana a ni a, mah se a thinchhiat em avangin Pawngvina tih hi a pu hlen ta niin an sawi.

Pawngvina hi a thinchhiat em avangin ran te pawhin an hre hialin an sawi a. A bulah chuan an tla ngam lo ni hialin an sawi \hin. Kawng chho a han kal te hi ‘hei..ha...hui..haa..’ tih duh lovin ‘de..de..deii...deiii..’ tih ngawtin a thinrim \euh thin a. Engtik lai pawhin insual hi a ngam reng mai zel niin an sawi bawk. Nupui tur pawh hmu zo lo hialin an ring a, mah se vanneih thlak takin a nei ta mial a, a nupui erawh a duat viau niin an sawi thung.

|hasiama:- |hasiama hi a hmingthanna chhan a damreina leh a se no neihna dangdai tak hi a ni a, hei hi Lasi a zawl vang niin a sawi theih bawk. Tin, mi \henkhat chuan a damreina chhan hi Pheichham a man vang niin an sawi bawk. A engpawhchu nise |hasiama hian lasi chu a zawl ngei a, sa a kap theiin buh leh bal, leh ranah a hmuingil em em a. A se no neihna hmun phei chu kham chherdawh leh ran chu sawi loh, mihring tan pawha han kal mai harsa khawpa chhengchhia a ni a. Helai hmun hi tun thlenga hmuh theihin a la awm bawk.

Tin, |hasiam hmingthanna dang leh chu a damreina hi a ni. Pheichham a man hian a thil dil zingah damrei a tel a, a han dam rei tak tak chu a ning leh hle niin an sawi a. A ha bal ringawt pawh paiper khat a tling hial e an ti. Chutianga dam chu a nin em avangin a lasi zawl chu a han sawichhuak ta vek a, chu chu thiang lo anih avangin a thi ta niin an sawi.

Aihniara:- |uanran lama Mizo zinga ber kai Aihniara hi Selesih sangsarih hunlai mi niin an sawi a. A \uan ran zia hi mite sawi huai huai a tling a, ram palailenga Tump^ng tlanchhia an um pawh a khelah a beng thak thak hman zel e an ti a ni. Ruahpui vanáwn sur hnuaiah pawh Z^wlbúk a\anga an lal in chu huh miah lovin a thleng hman e an ti bawk.

Samdala: Mizo zinga thatchhe bera an sawi chu Samdala hi a ni. Hna a thawk peih lo va, a leng lam mai mai zel a. Vawi khat chu theipui hmin tam tak hi a hmu a, a ei chak hle mai a. Mah se a lo peih ta tlat lo mai a, a hnuaiah chuan muin a tlak hun nghakin a ka a ang ta ngawt a. Vanneihthlak takin a kaah chuan pakhat hi a lo tla fuh nawlh mai a, ‘ka \hial peih a ngem aw’ tiin a la inngaihtuah nasa niin an sawi. A \hial chi sa pawh chu ‘ka lem peih a ngem aw..’ tia la ngaihtuah fe khawpa thatchhia a ni.

Legend pawimawhna

Kan hnam thawnthua mi ropui leh chungchuang, thil ti thei bik te tthawnthu hian pawimawhna tam tak a nei a. Kan hnam nun mai bakah kan thu leh hla huangah pawh dinhmun pawimawh tak a luah mek a ni. Heng kan legend pawimawhna chi hrang hrang te chu:-

1)      Hnam zia nunphung hriatna pawimawh tak a ni. Kan thawnthu neih te hi kan hnam nunphung mila duan anih avangin kan pi leh pute nun leh an khawsak phung te chu heng thawnthuah hian tarlan anih avangin an nunphung hriatna hnar pawimawh tak a ni.

2)      An ngaihhlut leh ngaihsang zawngte kan hriatna hnar a ni bawk. Hmanlai thawnthu hrang hranga mi hmingthang leh ropui, mi hratkhawkhawngte chanchin a\ang hian kan pi pute ngaihhlu zawng (value system) chiang takin kan hmu thei a. Pasal\ha leh mi huaisen te, khawtlang tana hlimna leh muanna thlen tu leh hmel\ha leh neinungte an ngaihsan zia chiang takin kan hre thei.

3)      Hnam huaisen leh fing, ngaihtuahna leh suangtuahna ram thleng pawha dai zau kan nih zia kan hre thei bawk. Kan pi leh pute thawnthu a\ang hian kan hnam finna thuk tak a lang tam hle a. Ral rel thiamna te, mithi khua an ngaih dan leh thihhnu piah lam nun te, tlawmngaihna an inzirtirna kawng leh nun dan \ha nei tura an thawh hlawk zia te kan hre thei bawk.

4)      Mi ropui leh hmingthang ni tur hian vanneihna dawn \ul \hin mah se nasa taka beih a ngaihzia chiang takin kan hmu thei a. Chu chuan dawhtheihna leh taimakna, tawrhchhelna leh huaisenna, inpekna leh hmangaihna a keng tel tlat tih kan hre thei a. Chung chu mihring nun atan thil pawimawh tak anih avangin kan ngaihhlut thiam a pawimawh.

Heng a\ang hian kan hnam thawnthua mi ropui leh hratkhawkhengte chanchin leh kan hnam tana a hlutna kan hre thei a. Hnam dang aia kan hnuaihnung bik loh zia leh kan ropuina tam tak kan hmu thei a ni. Hnam thawnthu hian hnam nun nasa taka a nghawng avangin hriatir, zir leh chawinun hi kan tih tur \heuh anih zia kan hriat a \ul hle bawk a ni.##

work done by Lb Vanchhawng

***************************************************************

Lehkhabu rawnte:

1.      Thanmawia RL                       -           “Mizo Hnahthlak thawnthu” Volume 1-III, Din Din Heaven Publication, Ramhlun South, Aizawl-2009, 2010

2.      Zofa Lalhmachhuana   -           “Mizo Thawnthu” Vol-1, 6^th Edition, Zofa Run, Elecric Veng-2010

3.      Lalbiaklina HRK                     -           Pasal\hate Chanchin, Lengchhawn Press-2006

4.      Thanmawia RL                                   -           Mizo Hla hlui, Din Din Heaven Publication, Ramhlun South, Aizawl-2012

5.      Siamkima                                -           Zalenna Ram, 3^rd Edition, MC Lalrinthanga, Khatla, Aizawl-2002

6.      Dept. Of Mizo, MZU              -           Theory of Literature, Gilzom offset-2013

7.      Dept. Of Mizo, MZU              -           History of Mizo Literature, Gilzom Offset-2013

8.      http/en.m.wikipedia.org/wiki/legend